Salmus 118:1-29
118 Allillata ruranqampita Teyta Jehoväta agradecikuyë.+
Pëqa imëpis alläpa kuyakoqllam këkan.
2 Kananqa Israel,“pëqa imëpis alläpa kuyakoqllam këkan” nitsun.
3 Kananqa Aaronpa kastankuna,“pëqa imëpis alläpa kuyakoqllam këkan” niyätsun.
4 Kananqa Teyta Jehoväta respetaqkuna,*“pëqa imëpis alläpa kuyakoqllam këkan” niyätsun.
5 Alläpa yarpachakurmi Teyta Jehoväman* qayakurqä.
Teyta Jehoväqa* wiyamarqanmi, y alli següru* sitiumanmi pushamarqan.+
6 Teyta Jehovämi yanapëkäman, manam imatapis mantsashaqtsu.+
Nunaqa manam imanamanqatsu.+
7 Teyta Jehovämi yanapëkäman,* pëmi yanapaman.+
Tsëmi chikimaqkuna ushakäyaptin kushishqa rikaräshaq.+
8 Nunakunaman confiakunantsikpa rantinqa,Teyta Jehoväman confiakunqantsikmi mas alliqa.+
9 Mandakoq nunakunaman confiakunantsikpa rantinqa,Teyta Jehoväman confiakunqantsikmi mas alliqa.+
10 Mëtsë nacionpita nunakunam atacayämarqan.
Peru Teyta Jehoväpa jutinchö pärapuptïmi qeshpir ëwakuyarqan.+
11 Awmi, atacayämarqanmi, entëru lädupam atacayämarqan.
Peru Teyta Jehoväpa jutinchö pärapuptïmi qeshpir ëwakuyarqan.
12 Mëtsika abëjanömi atacayämarqan.
Kashaman nina prendirkur juklla upireqnömi ushakäyarqan.
Peru Teyta Jehoväpa jutinchö pärapuptïmi qeshpir ëwakuyarqan.+
13 Ishkinäpaqmi fuertipa tanqayämarqan.*
Peru Teyta Jehovämi yanapamarqan.
14 Teyta Jehovämi* imëkapitapis tsapäman, kallpayoqtam tikratsimany imëpis salvaman.+
15 Teyta Dios chikeqninkunata vencishqa kaptinmi,alli nunakunaqa carpa* wayinkunachö kushishqa qayëkachar këkäyan.
Teyta Jehoväpa derëcha kaq rikranqa alläpa poderösum.+
16 Teyta Jehoväpa derëcha kaq rikranqa venciskirmi pallarirëkan.*
Teyta Jehoväpa derëcha kaq rikranqa alläpa poderösum.+
17 Noqaqa manam wanushaqtsu, kawëkäshaqmi.
Tsëmi Teyta Jehovä* llapan ruranqanta willakushaq.+
18 Teyta Jehoväqa* fuertipam castigamarqan.+
Peru manam wanutsimarqantsu.+
19 Allita ruraq nunakuna yëkuyänan punkuta kichayämuy,+tsëpa yëkur Teyta Jehoväta* alabanäpaq.
20 Këmi Teyta Jehoväpa punkun.
Këpam alli ruraq nunakuna yëkuyanqa.+
21 Teyta Dios, mañakamuptï wiyamashqa kaptikiy salvamashqa kaptikim alabashqëki.+
22 Albañilkuna mana väleqtanö rikar jitariyanqan rumim,esquïnachö ëwaq maestra rumi tikrashqa.+
23 Këqa Teyta Jehoväpitam shamushqa.+
Noqantsikpaqqa alläpa shumaqmi.+
24 Tsë junaqtaqa Teyta Jehovämi patsätsishqa.
Tsë junaqqa alläpa kushishqam kashun.
25 Teyta Jehovä, salvayämänëkipaqmi rogakayämü.
Teyta Jehovä, chikimaqkunata venciyänäpaq yanapëkayämë.
26 Teyta Jehovä bendicïkullätsun pëpa jutinchö shamoqta.+
Teyta Jehoväpa wayimpitam mañakayämushaq qamkunata bendiciyäshunëkipaq.
27 Jehovämi Diosnintsik,pëmi aktsimantsik.+
Rämëkikuna aptarkur, alabar ëwëkaqkunawan+altarpa waqrankuna kaqyaq ëwayë.+
28 Teyta Dios, qammi Diosnï kanki. Qamtam alabayashqëki.
Teyta Dios, noqaqa qamtam alabashqëki.+
29 Allillata ruranqampita Teyta Jehoväta agradecikuyë.+
Pëqa imëpis alläpa kuyakoqllam këkan.+
Nötakuna
^ Hebreu idiömachöqa “mantsaqkuna” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ O “jatun”.
^ O capazchi “yanapamaqkunawan juntu këkan”.
^ O capazchi “tanqarkamarqëki”.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ Kënöpis niyanmi: toldu.
^ Kënöpis niyanmi: joqarëkan.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
