Salmus 148:1-14
148 ¡Teyta Jehoväta* alabayë!
Ciëluchö këkaqkuna, Teyta Jehoväta alabayë.+
Mas altuchö këkaqkuna, Teyta Diosta alabayë.
2 Angelkuna+ y ciëluchö këkaq soldädukunapis pëta alabayë.+
3 Killa, inti o rupay y ciëluchö chipapaq estrëllakuna,qamkunapis Teyta Diosta alabayë.+
4 Mas altu kaq ciëlukuna,y ciëluchö këkaq pukutëkuna, Teyta Diosta alabayë.
5 Tsë llapankuna Teyta Jehoväpa jutinta alabayätsun,pë mandakuptinmi llapan rurakarqan.+
6 Pëmi tsëchö imëyaqpis kayänampaq churashqa,+tsëchö kayänampaq mandakunqanqa manam ni imëpis cambianqatsu.+
7 Patsachö kaqkunapis Teyta Jehoväta alabayë,lamarchö jatusaq animalkuna y mëtsika yakukuna,
8 runtu, rashta,* yana pukutëkuna, räyukuna,palabranta cäsukoq fuerti vientukuna,+
9 jatusaq jirkakuna, taksha jirkakuna,+früta wayoq plantakuna, cedrukuna,+
10 chukaru animalkuna,+ llapan wätana animalkuna,lätëpa pureq animalkuna, volaq* animalkuna,
11 gobernantikuna, mëtsë nacionchö täkoq* nunakuna,mandakoqkuna, llapan juezkuna,+
12 jövinkuna, shipashkuna,* awkinkuna y wamrakuna,llapëki juntu Teyta Diosta alabayë.
13 Tsë llapankuna Teyta Jehoväpa jutinta alabayätsun.
Pëpa jutinqa alläpa shumaqmi manam imawampis igualantsu.+
Patsachö y ciëluchöpis pëllam respetashqaqa.+
14 Llapan shonqunkunawan sirweq Israelpa tsurinkunatam, mas puëdeq kayänampaq yanapanqa.
Pëta mana qonqaq sirweqninkunatam,mas kushishqa kayänampaq yanapanqa.
¡Teyta Jehoväta* alabayë!
Nötakuna
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ Kënöpis niyanmi: rapi; janka.
^ Kënöpis niyanmi: päreq; vuëlaq.
^ Kënöpis niyanmi: täraq; päraq.
^ Hebreu idiömachöqa “ollquwan manaraq oqllanakushqa” ninmi.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
