Salmus 20:1-9
-
Akranqan nunata Teyta Jehovä salvan
-
Wakinqa carrëtankunaman y cawallunkunamanmi confiakuyan, “peru noqantsikqa Diosnintsik Jehovämanmi jutimpa mañakuntsik” (7)
-
Cantaqkunata dirigeqpaq. David qellqanqan salmus.
20 Mana allikunapa pasanqëki höra qayakuptiki, Teyta Jehovä wiyëkulläshuy.
Jutimpa qayakuptiki Jacobpa Diosnin salvëkulläshuy.+
2 Sagrädu sitiunchö këkanqampita yanapëkulläshuy,+y Sion jirkanchö këkanqampita yanapëkulläshuy.+
3 Qarëkunata pëpaq apanqëkita yarpëkullätsun,qarëkunata rupatsiptiki kushikutsun. (Sëlah).
4 Shonquyki munanqanta rurëkamutsun,+yanapashuptiki imata rurëta munanqëkipis rurakätsun.
5 Teyta Diosnintsik salvamanqantsikpitam kushishqa qayëkachäshun,+Diosnintsikpa jutinta alabarmi bandërakunata pallarishun.*+
Llapan mañakunqëkita Teyta Jehovä ruramutsun.
6 Kananqa allim musyä akranqan nunata Teyta Jehovä salvanqanta.+
Qayakuptinqa derëcha makinwanmi sagrädu ciëlupita salvamun.+
7 Wakinkunaqa guërrapaq carrëtankunaman y cawallunkunamanmi confiakuyan,+peru noqantsikqa Diosnintsik Jehovämanmi jutimpa mañakuntsik.+
8 Pëkunaqa ishkirmi ushakäyashqa,peru noqantsikqa Teyta Dios yanapamashqam sharkurquntsik.*+
9 Yanapamänapaq qayakunqantsik junaqmi Teyta Dios wiyamäshun.+
¡Teyta Jehovä, gobernaqta salvëkullë!+