Salmus 33:1-22
33 Qamkuna, allita ruraq nunakuna, Jehovä Dios imëkata ruramunqampita kushishqa qayëkachäyë.+
Alli shonquyoq nunakuna, qamkuna alabayanqëkiqa alläpa shumaqmi.
2 Taksha arpata tocar Jehovä Diosta agradecikuyë,jatun arpata tocarnin cantar alabayë.
3 Mushoq cancionta pëpaq cantayë,+kushishqa qayëkachar instrumentukunata shumaq tocayë.
4 Teyta Jehovä ninqankunaqa imëpis allillam,+llapan ruranqampis confiakuypaqmi.
5 Teyta Diosqa alli ruraqmi, y pitapis juzgarqa justiciatam ruran.+
Teyta Jehovä alläpa kuyakoq kanqantaqa, kë patsachö imëkata ruranqanchömi rikantsik.+
6 Ciëlu rurakänampaq Teyta Jehovä niptinmi ciëlu rurakarqan,+y poderninmi* ciëluchö llapan kaqkunata rurarqan.
7 Lamar yakutapis pözumannömi juk sitiullaman qochakätsin,+laqcheqsëkaq yakutanam jatusaq pözukunachö katsin.
8 Patsachö llapan kaqkuna Teyta Jehoväta respetayätsun,+imëkata wayoq patsachö kawaq nunakuna, Teyta Diosta alläpa respetayätsun.
9 Pë parlaptinmi imëkapis rurakarqan,+y mandakuptinmi llapampis alli rurashqa quedarqan.+
10 Mëtsë nacionchö nunakuna mana allikunata rurayänampaq pensëkäyaptimpis,+ Teyta Jehoväqa manam permitishqatsu.
Manam dejashqatsu mëtsë markachö nunakuna munayanqanta rurakuyänanta.+
11 Peru Teyta Jehoväqa imatapis rurëta munanqantaqa imëpis ruranqam,+shonqunchö pensanqantaqa manam ni imëpis cambianqatsu.
12 Teyta Diosmi sirweqninkuna kayänampaq nunakunata akrashqa.+
¡Teyta Jehovä Diosninkuna kaptinmi, tsë nunakunaqa kushishqa kawakuyan!+
13 Teyta Jehoväqa ciëlupitam rikarëkämun,nunakuna imanö kayanqantam rikëkämun.+
14 Ciëlupitam patsachö nunakuna imanö kayanqanta rikëkämun.
15 Pëmi llapan nunakunapa shonqunta ruran,y llapan rurayanqantam musyëkan.+
16 Manam mëqan gobernantitapis soldädunkunatsu salvan,+y alli pelyëta yachaq soldädupis manam kikimpa kallpanwantsu salvakun.+
17 Salvakuyänampaq cawallukunaman confiakuyanqampis manam välintsu,+cawalluqa kallpayoq karpis manam chikeqninkunapita salvëta puëdintsu.
18 ¡Peru cuentata qokuyë! Teyta Jehoväqa alläpa kuyakoqmi,yanapanampaq shuyarëkaqkunatam rikëkany respetaqkunatam* salvan.+
19 Tsënöqa rikëkan wanuypita o wañuypita salvanampaqmi,y mallaqë tiempuchöpis kawëkaqta katsinampaqmi.+
20 Noqantsikqa Teyta Jehovä salvamänapaq kaqmanmi confiakuntsik,pëmi yanapamantsik y escüdu cuentam imëkapita tsapämantsik.+
21 Imëkata ruramunqampitam kushishqa këkantsik,y sagrädu jutinmanmi confiakuntsik.+
22 Teyta Jehovä, qamtam shuyarëkäyaq.+
Qamqa alläpa kuyakoqmi kanki, imëpis kuyëkayämë.+
Nötakuna
^ Hebreu idiömachöqa “pëpa jamanin” ninmi.
^ Hebreu idiömachöqa “mantsaqkunatam” ninmi. Rikäri “Bibliachö palabrakunata entiendinapaq” neqta.
