Salmus 50:1-23
Asaf+ qellqayanqan salmus.
50 Jehovällam poderösu Diosqa,pëmi entëru patsachö* këkaq nunakunata qayëkätsin.+
2 Sion jirkapitam Teyta Diosqa chipapämun,tsë jirkaqa alläpa shumaqmi.+
3 Teyta Dios shamurqa manam upällatsu kakunqa,+pëpa puntanchöqa ushakätsikoq ninam këkan.+
Entëru lädunchömi räyupis janrarany tamyanqampis mantsakëpaqmi wiyakan.+
4 Sirweqninkunata juzganampaqmi, ciëluchö kaqkunata y patsachö+ kaqkunata qayëkatsir kënö nin:+
5 “Llapan shonqunkunawan sirwimaqkunata qayatsiyämuy,animalkunata pishtar noqawan acuerduta ruraqkunata”.+
6 Teyta Diosmi Juezqa,tsëmi ciëluchö kaqkunapis justicia ruranqanta willakuyan.+ (Seläh).
7 Teyta Diosmi kënö nin:
“Sirwimaq Israel nunakuna wiyayämë,kananmi niyashqëki mana allikunata rurayanqëkita.+
Noqam Diosnikikuna kä.+
8 Manam qarëkunata ni animalkunata pishtëkur rupatsiyämunqëkipita corregiyashqëkitsu.+
9 Noqaqa manam wätakunqëki töruykita ni cabrëkitapis wanätsu.*+
10 Noqallapam mëtsë montikunachö y mëtsë jirkakunachö këkaq chukaru animalkunapis.+
11 Mëtsë jirkakunachö pishqukunatam reqï+y llapan animalkunam noqapa.
12 Kë patsa y patsachö imëka wayunqankunapis noqapam.
Tsëmi mallaqarpis qamtaqa ni imata mañakümantsu.+
13 Noqaqa manam töru ëtsatatsu miküni cabrapa yawarnintatsu upü.+
14 Tsëkunata qaramanqëkinöqa, noqa Llapanta Gobernaq Poderösu Diosnikita, alabamarmi agradecikamänëki+y llapan änimanqëkitam cumplinëki.+
15 Mana allikunapa pasayanqëki tiempu qayamë+y noqam salvashqëki.
Tsëmi alabamanki”.+
16 Peru mana alli nunataqa Teyta Diosmi kënö ninqa:
“¿Qamqa imanirtan mandakunqäkunapaq+ y ruranqä acuerdupaqpis parlar purikanki?+
17 Mëtsika kutim qamtaqa corregirqoq y parlaparqoq,peru manam cäsukunkitsu.+
18 Qamqa ladronkunatam chaskipanki,+y majankunata engañaqkunawampis juntakankim.
19 Ulikurkurmi o llullakurkurmi pitapis mëtapis parlapanki,nunakunata engañëqa alläpam gustëkushunki.+
20 Wawqikipaqpis mana allikunatam parlanki,+tsë mamallapita këkarmi pantanqankunatapis willakur purinki.
21 Tsëkunata ruranqëkita rikarnin upälla kakuptïmi pensarqunki noqapis qamnölla kanqäta.
Peru kananmi sï corregishqëki,ruranqëkikuna imanir mana alli kanqantam nishqëki.+
22 Kananqa mana cäsumaq nunakuna,kë ninaqpaq kaqman shumaq pensayë.+
Manaqa llapëkitam ushakätsiyashqëkiy manam ni pï salvayäshunkitsu.
23 Noqapaq apayämunqëki mas alli qarëqa, agradecikamar alabayämanqëkim,+y munanqänö kawakuyanqëkim.
Tsënö nunatam noqaqa salvashaq”.+
Nötakuna
^ Hebreu idiömachöqa “inti o rupay yarqamunan y jeqanan” ninmi.
^ Kënöpis niyanmi: necesitätsu.