Salmus 52:1-9
Cantaqkunata dirigeqpaq. Maskil.* Ahimëlecpa+ wayinmanmi Davidqa chashqa karqan, tsëtam Doeg jutiyoq edomïta nunaqa Saulta willarqan. Tsëta willakunqampitam Davidqa kë salmuta qellqarqan.
52 Teyta Diosnintsikqa alläpa kuyakoqmi y kuyakoq këtaqa manam imëpis dejantsu.+
Puëdeq nuna, ¿imanirtan mana allikunata ruranqëkipita alabakunki?+
2 Qalluykiqa alli afilashqa cuchillunömi,+mana allikunata rurananllapaqmi imëpis parlëkan y pïmëtam imëkata creitsin.+
3 Qamqa allikunata ruranëkipa rantinmi, mana allikunata rurëllaman yarparäkuykanki.
Rasumpa kaqta parlanëkipa rantinmi imëpis ulikunki o llullakunki. (Sëlah).
4 Parlanqëkiwanqa pïmëtam llakitsinki,ulikuytaqa o llullakuytaqa alläpam yachëkunki.
5 Tsënö kanqëkipitam Teyta Diosqa,juk plantata sutarir jitareqnö wayikipita jitarishunki.+
Ushakätsishunkim y mananam kë patsachöqa imëpis kawankinatsu.+ (Sëlah).
6 Alli ruraq nunakunaqa tsëta rikëkurmi espantakuyanqa+y burlakurmi kënö niyanqa:+
7 “Këmi tsë nuna, tsapëkunampaq Diosnintsikman confiakunampa rantin kikinllaman confiakoq nuna.+
Riquëzankunamanmi confiakurqan,+y mana allikunata rurananllapaqmi imë hörapis yarparëkarqan”.
8 Peru noqaqa, Teyta Diospa wayinchömi atska rämayoq olïvu plantanö kashaq.
Alläpa kuyakoq Teyta Diosmanmi+ noqaqa imëpis confiakushaq.
9 Teyta Dios, qamtam alabashqëki, qammi imata karpis ruranki.+
Sirwishoqnikikunapa puntanchömi jutikiman confiakamushaq,+qamqa alläpa allim kanki.
Nötakuna
^ Tsë palabra ima ninan kanqanqa manam musyëllatsu. Rikäri “Bibliachö palabrakunata entiendinapaq” neqta.
