Salmus 59:1-17
Cantaqkunata dirigeqpaq. “Ama ushakätsitsu” niyanqan tönuchö cantayänampaq. Miktam. Davidta wanutsita munarninmi+ Saulqa soldädunkunata mandarqan Davidta wayinchö cuidayänampaq, tsëmi Davidqa kë salmuta qellqarqan.
59 Dios Yaya, chikimaqkunapita salvëkallämë,+conträ churakaqkunapita defendïkallämë.+
2 Mana allita ruraq nunakunapitay maqakoqkunapita salvëkamë.
3 Mëtsëman churanakuykurmi shuyaräyäman.+
Puëdeq nunakunam atacayäman.
Teyta Jehovä, tsënö rurayämänampaqqa manam ima jutsatapis* rurarqötsu.+
4 Mana allikunata mana rurëkaptïmi, maqayämänampaq cörripa shayämun.
Teyta Dios, yanapëkamänëkipaqmi qamman rogakamü.
5 Angelkunata mandaq Jehovä, qammi israelïtakunapa Diosnin kanki.+
Mëtsë nacionkunachö nunakuna imanö kayanqanta rikëkullë.
Traicionëru nunataqa mana llakipar* castiguëkuy.+ (Sëlah).
6 Pëkunaqa cada paqasmi shayämun,+y kanikoq allqunömi cällikunachö+ puëdeq tukur puriyan.+
7 Pëkunaqa imëka mana allikunatam niyan,espädawan tuksikoqnömi parlayan.+
Y “¿piraq wiyamäshun?” niyanmi.+
8 Peru qamqa Teyta Jehovä, pëkunapitam asikunki,+y mëtsë nacionkunachö nunakunapitapis burlakunkim.+
9 Teyta Dios, qammi kallpayoqta tikratsimanki, qammi imëka mana allipitapis tsapämanki.+
Alkäbum këkäshaq y qamllamanmi confiakamushaq.+
10 Alläpa kuyamaq Teyta Diosmi yanapamanqa,+chikimaqkuna ushakäyaptinmi kushishqa rikaräshaq.+
11 Teyta Dios, chikimaqkunataqa amaraq wanutsitsu, poderösu kar oqrakashqanö puriyänanta permitïkuy.
Tsënöpam marka mayïkuna ruranqëkita rikäyanqa.
Teyta Jehovä, qamqa tsapäkoq escüdu cuentam kanki.+
12 Pëkunaqa orgullösu karmi shiminkunawan jutsata* rurayashqa,nuna mayinkunatam maldiciyashqa y imëkata parlarmi engañayashqa.+
Tsënö kayanqampita kikinkuna sufriyätsun.
13 Pëkunata cölerar ushakätsi,+ amana masqa kawayätsunnatsu.
Jacobpa kastankunata y entëru patsachö nunakunatapis,qam gobernanqëkita musyayätsun.+ (Sëlah).
14 Pëkuna cada paqas shayämutsun,y kanikoq allqunö cällikunapa puëdeq tukur puriyätsun.+
15 Wakpa këpa mikuyta ashir puriyätsun.+
Mikuyaptimpis ama pachankuna juntatsuntsu, punuyänampaqpis ama sitiuta tariyätsuntsu.
16 Noqaqa Teyta Dios, puëdeq kanqëkipitam alabar qampaq cantamushaq.+
Patsa waräriptinmi, alläpa kuyakoq kanqëkita parlashaq.
Qammi imëka mana allipitapis tsapämanki.+
Llakikunqä hörakunaqa, yanapëkamänëkipaqmi qamman qayakamü.+
17 Teyta Dios, qammi kallpayoqta tikratsimanki, qampaqmi cantamushaq.*+
Qammi imëka mana allikunapita tsapämanki, alläpa kuyakoq karmi, imëpis kuyamanki.+
Nötakuna
^ Kënöpis niyanmi: pecädutapis.
^ Kënöpis niyanmi: ankupar; kuyapar.
^ Kënöpis niyanmi: pecäduta.
^ O “qampaqmi müsicata tocamushaq”.
