Salmus 64:1-10
-
Mana allita rurayänampaqmi parlëkäyan, peru Teyta Diosmi salvan
-
“Tsënö këkäyaptinmi Teyta Diosqa flëchëkunqa” (7)
-
Cantaqkunata dirigeqpaq. David qellqanqan salmus.
64 Teyta Dios, qayakamuptï wiyëkallämë,+chikimaqkunaqa mantsëpaqmi kayan, salvëkallämë.
2 Wanutsiyämänampaq willanakuykaq nunakunapita salvëkallämë,+mana alli nunakunapita defendïkallämë.
3 Conträ parlayanqanqa, fïlu espädanöraqmi shonqüman chan.
Flëchawan flëchaqnömi, imëka mana allikunata niyäman.
4 Mana culpayoq nunatam imëkata niyan,mana mantsarmi imëkapita culpatsayan.
5 Mana allita rurayänanllapaqmi parlëkäyan,yachëllapa trampata churayänampaqmi pensayan.
Y “manam cuentata qokuyanqatsu” niyanmi.+
6 Mana allikunata, juknöpa juknöpa rurayänampaqmi pensayan,pakëllapam tsëkunata rurayänampaq willanakuyan.+
Mana allita rurayänampaq pensëkäyanqantaqa manam musyëta puëdintsiktsu.
7 Peru tsënö këkäyaptinmi Teyta Diosqa flëchëkunqa,+illaqpitam chëkatsinqa.
8 Kikinkuna parlayanqanllam mana alliman chätsinqa.+
Tsëmi rikaqnin nunakunaqa penqaparnin, peqankunata o umankunata kuyutsiyanqa.
9 Tsëta rikëkurmi nunakunaqa mantsakäyanqa,Teyta Dios ruranqanta entiendirmi willakuyanqa.+
10 Alli ruraq nunakunaqa, Teyta Jehovä yanapaptinmi kushikur pëman tsapänampaq ëwayanqa.+
Alli shonquyoqkunaqa, Teyta Dios yanapanqampitam kushishqa parlayanqa.
