Salmus 68:1-35
-
“Llapan chikeqninkuna puntampita qeshpir ëwakuyätsun”
Cantaqkunata dirigeqpaq. David qellqanqan salmus. Cancion.
68 Teyta Dios sharkutsun, chikeqninkuna mantsakar ëwakuyätsun,llapan chikeqninkuna puntampita qeshpir ëwakuyätsun.+
2 Teyta Dios, qoyëta o qoshnita vientu apakoqnö, karuman apakuy,ninachö cëra tsulloqnö llapan mana alli nunakuna ushakäyätsun.+
3 Peru allita ruraqkunaqa kushishqa kayätsun,+Teyta Diospa puntanchö alläpa kushishqa kayätsun.
Kushikurnin saltëkachäyätsun.
4 Teyta Diospaq cantayë, jutinta alabar cantayë,*+tsunyaq pampakunachö* cawallun montashqa purikaqta cantapäyë.
Pëpaqa Jehovämi* jutin,+ puntanchö kushishqa kayë.
5 Sagrädu täkunanchö+ këkaq Teyta Diosqa, papäninnaqkunapa teytanmi,y viudakunapa yanapaqninmi.*+
6 Mana pïnin kaq waktsakunataqa Teyta Diosmi wayiyoq kayänampaq yanapan.+
Prësu këkaqkunata librarmi alli kawakuyänampaq yanapan.+
Peru mana cäsukoqkunaqa imapis mana kanqan tsunyaq sitiuchömi kawayanqa.+
7 Teyta Dios, sirwiyäshoqnikikunata pushar,*+tsunyaq jirkapa ëwaptikim, (Sëlah)
8 patsapis kuyurqan.+
Tsëchö qam kaptikim tamyapis tamyamurqan y Sinaï jirkapis kuyurqan.
Qammi Israelpa Diosnin kanki.+
9 Allipam tamyatsimurqëki Teyta Dios,sirwiyäshoqnikikunata kallpayoq kayänampaq yanaparqëki.
10 Qam munaptikim carpa* wayikunachö kushishqa kawakuyarqan.+
Waktsakunatam llakiparnin* wanayanqankunawan* yanaparqëki.
11 Teyta Jehovä mandakushqa kaptikim,alli noticiakunata willakoq warmikunaqa mëtsika soldädukunanömi kayan.+
12 Gobernantikunapis y soldädukunapis mantsakarmi qeshpir ëwakuyan.+
Wayichö quedaqkunaqa guërrachö ganar apayämunqan cösaskunatam chaskiyan.+
13 Campamentu* lädunchö ninawan qoñükur quedakushqa karpis,palumanö shumaq adornukunatam chaskiyanki.
Tsë adornukunapa älanqa pläta metalpitam kanqa, y plümannam alli kaq örupita kanqa.
14 Kë markakunachö gobernantikunata, Llapanta Puëdeq Teyta Dios mëtsëpa qarquriptinqa,+Zalmon jirkachömi rashtarqan.*
15 Basan jirkaqa+ Teyta Diospa jirkanmi,tsëchöqa altu puntayoq mëtsika jirkakunam kan.
16 Altu puntayoq jirkakuna, ¿imanirtan Teyta Diospa jirkanta chikipar rikapäyanki?+
Tsë jirkatam Teyta Diosqa täkunampaq* akrashqa.
Tsëchömi Teyta Jehoväqa, imëyaqpis täkunqa.+
17 Teyta Diospaqa, mëtsikam guërrapaq carrëtankuna, manam yuparpis ushashwantsu.*+
Teyta Jehoväqa Sinaï jirkapitam sagrädu sitiunman shamushqa.+
18 Qammi altu sitiuta ëwakur,+nunakunata prësur trabajatsinëkipaq apakurqëki.+
Teyta Jehovä,* nunakunatam qarëtanö apakurqëki,awmi, mana cäsukoq nunakunatapis pëkunawan kanëkipaqmi apakurqëki.+
19 Teyta Jehovä alabashqa këkullätsun.
Pëmi llakikushqapis y yarpachakushqapis cada junaq yanapamantsik,+ pëmi salvamaqnintsik. (Sëlah).
20 Noqantsikpaqqa Llapanta Gobernaq Teyta Jehovällam salvamaqnintsik.+
Rasumpa Dios karmi wanuypitapis salvamantsik.+
21 Teyta Diosmi chikeqninkunapa peqankunata o umankunata pakipunqa,y jutsa* rurëta mana dejaqkunapa peqankunatapis pakipunqam.*+
22 Teyta Jehovämi kënö nishqa:
“Yapëmi Basanpita+ y lamar rurimpitapis kutitsimushaq,
23 tsëmi chikeqnikikunapa yawarninta jarur ushanki,+y allquykikunapis tsë yawartam laqwayanqa”.
24 Teyta Dios vencir ëwanqëkita y sagrädu sitiuykiman yëkunqëkitaqa llapankunam rikäyäshunki.
Qammi Gobernamaqnïkuna kanki.+
25 Puntatam cantaqkuna ëwayan,qepantanam panderëtata+ tocaq shipashkuna ëwayan,mas qepantanam cuerdayoq instrumentuta+ tocaqkuna ëwayan.
26 Mëtsika nunakuna juntarëkäyanqanchö Teyta Diosta alabayë,Israel kashqa kaptinmi qamkunaqa kawëkäyanki, llapëkikuna Teyta Jehoväta alabayë.+
27 Tsëchömi këkan Benjamin,+ pëqa jövin karpis llapantam mandëkan.
Tsëchömi Judächö mandakoqkuna këkäyan cantëkaq mëtsika nunakunawan.
Tsëchömi këkäyan Zabulonchö y Neftalïchö mandakoqkunapis.
28 Teyta Diosmi nishqa puëdeqta tikratsishunëkipaq.
Teyta Dios, qamqa poderösu karmi yanapayämarqëki, kanampis llapankuna musyayätsun poderösu kanqëkita.+
29 Templuyki Jerusalenchö kaptinmi,+gobernantikuna qarëkunata apayämunqa.+
30 Teyta Diosqa cäña rurinchö chukaru animalkunata, törukunata+y mallwa törukunatam mantsakätsin.
Tsënöqa ruran mëtsë markapita nunakuna qonqurikuyänampaq, y pläta qellëta apayänampaqmi.*
Peru guërrallachö kakoq nunakunataqa mëtsëpam qarqunqa.
31 Egiptupitam broncipita rurashqa cösaskunata apayämunqa,*+Cus nunakunapis Teyta Diostam punta puntata qarëkunata qarayanqa.
32 Patsachö gobernantikuna Teyta Diospaq cantayë,+cantar Teyta Jehoväta alabayë,* (Sëlah)
33 cawallun montashqa ciëluchö purikaqta cantapäyë.+
Teyta Dios parlanqanqa alläpa fuertim räyunöran wiyakan.
34 Poderösu kanqampita Teyta Diosta alabayë.+
Pëmi Israelchöqa gobernanti,y poderösu kanqanqa ciëluchömi rikakun.
35 Sagrädu täkunanchömi Teyta Diosqa espantakuypaq këkan.+
Pëmi Israelpa Diosnin,Pëmi nunakunata kallpayoqta y poderyoqta tikratsin.+
Teyta Dios alabashqa këkullätsun.
Nötakuna
^ O “müsicata tocayë”.
^ O capazchi “pukutë jananchö”.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ Hebreu idiömachöqa “juez” ninmi.
^ Hebreu idiömachöqa “puntanta ëwarqëki” ninmi.
^ Kënöpis niyanmi: toldu.
^ Kënöpis niyanmi: ankuparnin; kuyaparnin.
^ Kënöpis niyanmi: necesitäyanqankunawan.
^ O capazchi “Üsha corralkuna”.
^ O “Zalmon jirkata rashtëkoqnö o rapïkoqnö karqan”.
^ Kënöpis niyanmi: täränampaq; päranampaq.
^ Hebreu idiömachöqa “10 kuti 1.000 y mëtsika 1.000” ninmi.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ Kënöpis niyanmi: pecädu.
^ O “lapir wanuratsinqam”.
^ O capazchi “jarur ushayänampaqmi”.
^ O capazchi “gobernanti mandanqan nunakuna shayämunqa”.
^ O “müsicata tocayë”.
