Salmus 9:1-20
Cantaqkunata dirigeqpaq. Mut-laben* nötachö cantayänampaq. David qellqanqan salmus.
א [älef]
9 Llapan shonqüwanmi alabashqëki Teyta Jehovä,llapan ruranqëkikunam alläpa shumaq, tsëkunapitam willakushaq.+
2 Ruranqëkikunata rikarmi kushishqa kashaq,Llapanta Gobernaq Poderösu Dios, jutikita alabarmi cantamushaq.+
ב [bet]
3 Chikimaqkuna noqapita qeshpir ëwarqa,+puntëkichö ishkirmi wanuyanqa o wañuyanqa.
4 Alli ruraq kanqäta musyarmi qam defendimanki,y gobernar täkunëkiman jamëkurmi justiciata ruranki.+
ג [guímel]
5 Mëtsë nacionpita nunakunatam qayaparqunki+ y mana allita ruraqkunatam ushakätsirqunki,y pëkunataqa* manam imëpis yarpäyanqanatsu.
6 Chikishoqnikikunataqa ushakätsirqunkim,mana alli qorata* sutar jitareqnömi markankunatapis ushakätsirqunki,pëkunataqa manam ni pï yarpanqanatsu.+
ה [he]
7 Peru Teyta Jehoväqa gobernar täkunanchömi imëpis këkanqa,+tsëpita gobernamurmi justiciata ruramunqa.+
8 Pëmi justiciata rurar entëru patsachö nunakunata juzganqa,+y llapan nacionchö nunakunata juzgarmi justiciata ruranqa.+
ו [waw]
9 Nuna mayinkuna sufritsiyaptin sufreq nunakunataqa Teyta Jehovä defendinkim,+llakishqa kayanqan höram yanapanki.+
10 Jutikita llapan reqeqkunam qamman confiakayämunqaTeyta Jehovä+ ashishoqnikikunataqa manam imëpis dejankitsu.+
ז [zayin]
11 Sion jirkachö kawaq Jehovä Diosta, cantarnin alabayë,llapan ruranqankunata nunakunata musyatsiyë.+
12 Teyta Diosmi sufreq nunakunapa biennin yarqunqa,+ pëman waqar qayakuyanqantaqa manam qonqanqatsuy sufritseq nunakunataqa llapantam ushakätsinqa.+
ח [jet]
13 Teyta Jehovä, qammi wanuypita o wañuypita salvamëta* puëdinki,tsënölla kanampis llakipëkallämë,*chikimaqnïkunam alläpa sufritsiyäman.+
14 Sion markapa punkunman* churakëkurmi llapan ruranqëkikunata willakushaq,+y salvamanqëkipitam kushikushaq.+
ט [tet]
15 Nacionkunachö nunakunaqa kikinkuna rurayanqan uchkuman jeqaqnömi kayan,jukpaq churayanqan trampata jaroqnömi kayan.+
16 Teyta Jehovätaqa reqiyan nunakunata imëpis juzgar castiganqampitam.+
Mana allita ruraq nunaqa kikin ruranqan trampallamanmi ishkishqa.+
(Higayon.* Sëlah).
י [yod]
17 Mana allita ruraq nunakunaqa llapampis Sepultürachömi* ushayanqa,tsënöllam Teyta Diosta qonqëkoq entëru nacionkunachö nunakunatapis pasanqa.
18 Teyta Diosqa manam waktsakunata imëpis qonqanqatsu,+pëkuna shuyaräyanqanqa cumplikanqam.+
כ [kaf]
19 ¡Teyta Jehovä, jinan höra shamuy! Ama dejënatsu nunakuna munëninta rurayänanta.
Entëru nacionchö nunakunata kikiki juzguë.+
20 Jehovä Dios, pëkunata mantsakätsi,+mëtsë nacionchö nunakuna musyayätsun wanoqlla o wañoqlla kayanqanta. (Sëlah).
Nötakuna
^ Rikäri “Bibliachö palabrakunata entiendinapaq” neqta.
^ Hebreu idiömachöqa “jutinkuna” ninmi.
^ Kënöpis niyanmi: jachata.
^ Hebreu idiömachöqa “wanuypa punkumpitam sharkatsimarqëki” ninmi.
^ Kënöpis niyanmi: ankupëkallämë; kuyapëkallämë.
^ Hebreu idiömachöqa “Sionpa warmi wamrankuna” ninmi.
^ Rikäri “Bibliachö palabrakunata entiendinapaq” neqta.