Salmus 96:1-13
96 Teyta Jehoväpaq mushoq cancionta cantayë.+
¡Entëru Patsachö nunakuna Jehovä Diospaq cantayätsun!+
2 Teyta Jehoväpaq cantayë, jutinta alabayë.
Salvakoq kanqanta cada junaq willakuyë.+
3 Puëdeq kanqanta entëru nacionkunachö willakuyë,imëka rurashqankunata entëru markakunachö willakuyë.+
4 Teyta Jehovällam puëdeq Diosqa, pëllatam alabanantsik.
Pëwanqa manam ni ima diospis igualantsu, tsëmi pëllata respetanantsik.
5 Wakin markakunapa diosninkunaqa manam imapaqpis välintsu.+
Peru ciëluchö imëka kaqkunataqa Jehovä Diosmi kamashqa.+
6 Pëllam respetashqa Diosqa, y imëkata ruranqampis alläpa shumaqmi.+
Pë kanqanchöqa alläpa kallpayoq y shumaqmi kayan.+
7 Mëtsë markachö familiakuna Jehovä Diosta alabayë,puëdeq y kallpayoq kanqampita Jehovä Diosta alabayë.+
8 Teyta Jehoväpa jutinta alabayë,+imëka qarëkunata aparkur patiunkunaman yëkuyë.
9 Jehovä Diospa puntanman alli vistishqa qonqurikuyë.*
Patsachö llapan nunakuna, puntanchö mantsakar karkaryäyë,
10 llapan nacionkunachö kënö willakuyë: “Kananqa Jehovä Diosmi gobernamäshun.+
Kë patsaqa* alli segürum këkan y manam kuyutsita puëdiyantsu.
Pëmi justiciata rurar mëtsë markachö nunakunata juzganqa”.+
11 Ciëlupis patsapis kushikuyätsun,lamarpis y tsëchö këkaqkunapis kushikur bunrurüyätsun,+
12 Chakrakunapis y tsëchö kaqkunapis kushikuyätsun.+
Montikunapis kushikur Teyta Diospaq cantayätsun,+
13 Jehovä Diospa puntanchö kushikur cantayätsun.
Pëmi shamuykan* patsachö nunakunata juzganampaq.
Pëmi justiciata rurar entëru patsachö nunakunata juzganqa+y patsachö nunakunata juzgarqa, alli kaqllatam ruranqa.+