Tsë revistaqa entienditsikamurqan llapan nunakuna y angelkunapis Teyta Jehoväpa jutinta respetayänan precisanqantam. Jehovälla llapanta gobernaq kanqanta o pëlla alli kaq gobernaq kanqanta cuentachö katsir y pëllata mana dejëpa sirwirpis jutintam respëtuwan rikëkäyan.

Peru ¿imanirtan kananqa Jehoväpa jutin respetashqa kananta mas precisaqpaq churantsik? Kimallata rikärishun.

Juk, Eden huertachömi, Satanasqa Jehoväpa jutimpaq o Jehovä imanö kanqampaq mana kaqta parlarqan. Ëvata yachëllapa tapurmi entienditsikurqan, Diosqa mana alli kanqanta y prohibinqanwanqa kushishqa mana kayänampaq kaqta. Tsëpitanam Satanasqa cläru nirqan, Jehovä ninqanqa mana alli kanqanta. Tsënö nirqa, ulikoq o llullakoq kanqantam nikarqan. Tsënömi Satanasqa Jehoväpa jutimpaq mana allita parlarqan. Tsëta ruranqan höram ‘Diabluman’ tikrarqan, Diablu ninanqa “mana kaqpita acusakoq” ninanmi (Juan 8:44). Ëvaqa Satanas ninqanta creirmi Jehovä Dios ninqanta cäsukurqannatsu, tsënöpam Dios alli gobernaq kanqantaqa mana kaqpaq churarqan (Gen. 3:1-6). Kanan witsampis, Satanasqa Jehoväpa jutimpaq o imanö kanqampaqmi mana allita parlëkan. Tsëta creirmi nunakunaqa Jehovä ninqankunata cäsukuyannatsu. Jehoväpa jutimpaq tsënö alläpa mana allita parlayanqanta musyarmi, Jehoväpa sirweqninkunaqa alläpa llakikuyan. Satanas tsënö mana kaqta parlanqampitam, kanan witsanqa imëka sufrimientuta y imëka mana allikunata rikantsik.

Ishkë, Jehoväqa llapan kamanqankuna alli kananta munarmi, jutinta respetatsinqa y mana kaqta parlayanqampita limpiuta tikratsinqa. Pëpaqqa jutinta respetatsinanmi masqa precisan. Kikinmi kënö nin: “Sagrädu jutïtaqa respetatsishaq[mi]” (Ezeq. 36:23). Y Jesusnam Diosman mañakuyänampaq yachatsikurnin kënö nirqan: “Jutillëki respetashqa këkullätsun”. Tsënö nirmi Jesusqa cläru rikätsikurqan Jehoväman mañakurninqa, jutin respetashqa kanampaq mañakunantsik precisanqanta (Mat. 6:9). Bibliachöqa kutin kutinmi tarintsik Jehoväpa jutinta respetanantsik precisanqanta. Wakin textukunam kënö nin: “Teyta Jehoväpa jutinta alabayë” (1 Crön. 16:29; Sal. 96:8). “Müsicata tocar jutinta alabayë” (Sal. 66:2). “Jutikitam imëpis alabashaq” (Sal. 86:12). Jerusalen templuchö Jesus këkaptinmi, Jehoväqa ciëlupita parlapämurqan. Jesusmi nirqan, “Teyta, jutikita respetatsillë”. Tsënö niptinmi Jehoväqa “respetatsirqömi, y yapëmi respetatsishaq” nirqan (Juan 12:28). a

Kima, Jehoväpa jutin imëyaqpis alabashqa kanantam munan. Pensarishun, Mil Watapa Jesus gobernar ushariptin Jehoväpa jutinta imanö rikäyänampaq kaqman. ¿Imanöraq nunakuna y angelkunapis Jehoväpa jutinta rikäyanqa? Tsëta entiendinapaq yarpärishun, nunakuna Jehoväta sirwiyanqampaq y Jehovälla alli kaq gobernanti  kanqampaq Satanas mana allita parlanqanta. Tsë tiempuchöqa manam Jehoväta nunakuna sirwiyanqampaq mana allita parlayanqanatsu. Nunakunaqa jutsannaqna karmi y ushanan kaq pruëbata pasashqa karmi Jehovätaqa mana dejëpa sirwita puëdiyanqa, y mana wanurnam kawakuyanqa. Y ¿Jehovä mana alli gobernaq kanqantatsuraq pensayanqa? Manam. Tsë tiempuchöqa clärum musyakanqa Jehovälla mas alli kaq gobernanti kanqanta. Tsëmi nunakunaqa rakikar ushashqanatsu kayanqa. Llapankunam nunakunapis y angelkunapis Jehovälla alli kaq gobernaq kanqanta següru kayanqa. Peru ¿imaraq pasanqa Jehoväpa jutinwanqa?

Diospa jutinqa chipyëpa respetashqanam kanqa, y manam tsë jutipaq ni pï mana kaqkunata parlanqanatsu. Diospa jutintaqa ciëluchö y Patsachö kaq sirweqninkunapis imëyaqpis respetayanqam. ¿Imanirtan tsënö respetayanqa? Jehoväqa imëkakunatam rurarnin sïguinqa. Këllaman pensarishun: Jesusmi katsinqan cargunta Teytanta entreganqa, tsëmi “Teyta Diosllana” imëkatapis ruranqa (1 Cor. 15:28). Tsëpitanam, kë Patsachö Diospa sirweqninkunaqa “Diospa tsurinkuna kar alläpa shumaq libri këta” tariyanqa (Rom. 8:21). Y Jehovä ciëluchöpis y Patsachöpis familiankuna unïdu kayänanta munanqanmi cumplikanqa (Efes. 1:10).

Tsë llapan cumplikäriptin, ¿imanöraq Jehoväpa familiankuna sientikuyanqa? Ciëluchö kaq y Patsachö kaqkunapis Jehoväpa jutintaqa llapan shonqunkunawanmi alabayanqa. Diosnintsik yanapaptinmi David kënö nirqan: “Jehoväqa alabashqa këkullätsun […]. Shumaq jutin imëyaqpis alabashqa këkullätsun” (Sal. 72:18, 19). Mana wanuypana kawarninqa, Jehovä imëkakunata ruramoqta rikarninmi jutintaqa llapan shonquntsikwan alabashun.

¿Imatataq Jehoväpa jutinqa yarpätsimantsik? Kikin Jehovä imanö kanqantam. Tsëmi jutinta yarparqa, kuyakoq kanqanta yarpärintsik (1 Juan 4:8). Manam imëpis qonqashuntsu kuyakoq karnin Jehovä kamamanqantsikta, kuyamarnintsik Tsurimpa vïdanwan salvamanqantsikta y kuyakoq karnin alli gobernanti kanqanta. Kuyakoq karnin imëkawan bendicimanqantsiktam rikäshun. Mana wanuypa imëyaqpis kawarninqa, imëkakunata ruramoqta rikarmi Teytantsik Jehoväta y jutintapis kushishqa cantar alabashun (Sal. 73:28).