• YURIKUNQAN WATA: 1963

• NACIONNIN: GRAN BRETÄÑA

• MAS REQINAPAQ: ALLI TRABÄJUTAM DEJARQAN

PUNTA KANQÄ:

Londres markapa sur lädunchö këkaq Croydon niyanqan distrïtuchömi yurirqä. Papänïkunaqa San Vicenti niyanqan islapitam kayarqan. Wamrankunaqa isqunmi kayarqä, y noqam joqta kaq karqä. Mamänï Metodista niyanqan religionchö kaptimpis, noqataqa manam religionkuna gustamarqantsu. Wamra karqa imëkatam yachakuyta munarqä. Vacacionchö karqa wayïpa amänunchö këkaq qochapa kuchunchömi, bibliotëcapita prestakunqä mëtsika librukunata leyeq kä.

Colegiuta ushanqäpita ichik tiempullatam yanapëpaq këkaqkunata yanapar qallëkurqä. Puntataqa wayinnaqkunata, invälidukunata y fäcil yachakuyta mana puëdeqkunatam yanaparqä. Tsëpitanam salor asuntupita masta yachakunäpaq universidächö estudiarqä. Estudiar ushariptïqa llapampis allim yarqurqan. Alli trabäjuyoq karmi atska qellëta ganar imëka jananchö kawakurqä. Emprësä kichëkurmi nunakuna imanö kayanqampita masta musyapakur qallëkurqä. Trabäjüta ruranäpaqqa laptop niyanqanta y Internetllatam wanarqä. Avionwanmi juk nacionkunata seguïdu viajaq kä, gustamanqan hotelchömi atska semänakuna quedakoq kä. Tsëchöqa amänunchö imëka shumaqkunatam rikapakoq kä. Ejerciciuta y masäjita rurayänan sitiuta, y salon de bellëza niyanqantapis allim provechaq kä. Kushishqa kanäpaq imäpis mana faltanqantam pensaq kä. Tsënö kaptimpis, yanapëpaq këkaqkunamanqa manam yarpachakuyta dejarqätsu.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ?

Mëtsika watapam ‘¿imanirtan kë Patsachö këkantsik? ¿imapaqtan nuna kawan?’ nirnin yarpachakurqä. Peru tsëkunapaq Bibliachö ninqanmanqa manam ichikllapis pensarqätsu. 1999 watachömi nanä Margaretwan amïgan watukamaq shayämurqan. Ishkanmi Jehoväpa testïgun kayarqan. Amïgan shumaq parlapämaptinmi cäsi mana cuentata qokurlla Bibliapita yachakuyänäpaq änirqä. Tsënö kaptimpis, trabäjüchö y imëkata rurar alläpa ocupädu kaptïmi, Dioswan amïgu kanäpaq fäciltsu karqan.

2002 wata usya witsanmi, nunakuna imanö kayanqanta musyapakuychö doctoräduyoq këta munar Inglatërra nacionpa inti o rupay jeqanan lädumpa sur lädunta ëwakurqä. Tsëchömi wamräwan juntu Jehoväpa testïgunkuna rurayanqan reunionman mas seguïdu ëwayarqä. Universidächö estudiashqa karpis, manaraq Bibliapita yachakurqa, manam allillaqa musyarqätsu imanir problëmakuna kanqanta y tsëkunata imanö ushakätsita. Mateu 6:24 ninqanmi alläpa yanapamarqan. Manam Teyta Diospa y Imëkayoq Këpa sirweqnin këta puëdintsiktsu, tsëmi mëqanta sirwinäpaq kaqta decidinä karqan. Decidinqäqa imata mas puntaman churanqätam rikätsikunan karqan.

Ultimu kaq wataqa, ¿Existe un Creador que se interese por nosotros? a neq libruwan juk Testïgupa wayinchö Bibliapita yachakuyanqanmanmi atska kuti ëwashqa karqä. Tsëchömi yachakurqä kamakoq Yayantsik Jehovälla nunakunapa problëmanta ushakätsita puëdinqanta. Tsënö kaptimpis, “imapaq kawanqantsikta musyanapaqqa manam juk Kamakoqmanraqtsu creinantsik” nirmi universidächöqa yachatsikuyaq. Tsëqa manam gustamarqantsu. Ishkë killallaraq estudiëkarpis, estudiëkanqanta dejëkurmi Jehoväwan mas amïgu kanäpaq kallpachakurqä.

Proverbius 3:5, 6 ninqanmi imanö kawanqäta cambianäpaq yanapamarqan, tsëchömi kënö nin: “Ama kikiki yachanqëkillamanqa confiakuytsu, sinöqa, Teyta Jehoväman llapan shonquykiwan confiakuy. Imata rurarpis, pëtaraq puntata yarpanki munanqannö ruranëkipaq. Tsëta ruraptikiqa, alli kawakunëkipaqmi yanapashunki”. Doctoräduyoq kë, imëkayoq kë o reqishqa këpis, Teyta Diosta mas alli reqiwanqa manachi ichikllapis igualanmantsu. Teyta Dios Patsa imanö kananta munanqampita y noqantsikrëkur Jesus wanunqampita masta yachakurqa, masmi Diosllatana sirwita munarqä. 2003 wata abril killam Jehoväpa testïgun kanäpaq bautizakurqä. Tsëpitaqa ichikllapa ichikllapam mas sencïllulla kawakunäpaq kallpachakurqä.

¿IMAKUNACHÖTAN YANAPAMASHQA?

Dioswan amïgu kanqäqa imapitapis masmi välin. Teyta Diosta reqirmi kananqa yamë y kushishqa kä. Pëta sirweqkunawan juntu këpis alläpam gustaman.

Kananqa Bibliapita y reunionkunachö yachakunqäwanmi alläpa kushikü. Yachakunqäpita jukkunata parlapëpis alläpam gustaman. Tsëmi 2008 wata juniu killapita llapan tiempüwan Bibliapita yachatsikü. Tsënömi nunakunata yanapä mas alli kawakuyänampaq y shamoq tiempuchö Shumaq Patsachö kawëta puëdiyänampaq. Kananqa imëpitapis mas kushishqa y mas allim sientikü. Imapaq kawanqäta musyanäpaq yanapamanqampitam Teyta Diosta alläpa agradecikü.

• YURIKUNQAN WATA: 1973

• NACIONNIN: AUSTRIA

• MAS REQINAPAQ: PUKLLË Y APOSTËMI GUSTAQ

PUNTA KANQÄ:

Austria nacionchö Braunau jutiyoq taksha markachömi yurirqä. Rïcu nunakunalla kawayaptinmi tsëchöqa mana allita ruraqkunaqa kaqllatsu. Familiä catölicu kaptinmi noqapis catölicu karqä.

1984 wata 11 watayoqllaraq këkaptï pasanqantaqa manam imëpis qonqashaqtsu. Futbolta pukllayanqäpita rätunllatam juk alli amïgüta cärru wanuratsirqan. Amïgü wanunqantaqa atska watapam qonqëta puëdirqätsu. Wanurishqa ima pasamanqantsikmanmi imëpis pensaq kä.

Colegiupita yarqurqa electricistam karqan. Tsëpita ichik tiempullatam pukllar y apostar qallëkurqä. Mëtsika qellëta apostarpis manam qellëtaqa pishipakurqätsu. Pukllachöpis atska tiempum pasaq kä. Heavy metal y punk niyanqan müsicatam wiyaq kä. Jukwan jukwanmi oqllanakoq kä, y discotëcakunachö y fiestakunachömi päraq kä. Llapan munanqäta rurarpis manam kushishqatsu karqä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ?

1995 watam Jehoväpa testïgun edäna nuna punkuman qayakamurqan, y wanurishqa ima pasamanqantsikta willakoq librutam qaramarqan. Amïgü wanunqampita llakishqaraq karmi tsë libruta chaskikurqä. Wanurishqa ima pasamanqantsikpaq willakunqanllatatsu manam leyirqä sinöqa llapan librutam.

Wanurishqa ima pasamanqantsikpita y maskunapitam yachakurqä. Catölicu karmi Jesucristumanqa markäkoq o yärakoq kä. Peru Bibliapita alli yachakurmi Jesuspa Teytan Jehovä Dioswampis alli amïgu tikrarqä. Teyta Dios noqantsikpaq yarpachakunqanta y reqinantsikta munanqanta musyarqa alläpam kushikurqä (Mateu 7:7-11). Sentimientuyoq kanqanta y ninqankunata cumplinqantapis yachakurqämi. Tsënö kanqanta musyarmi Bibliachö willakunqankuna imanö cumplikanqampita masta musyëta munarqä. Tsëkunapita yachakunqäqa Diosman mas markäkunäpaqmi yanapamarqan.

Ichik tiempullachömi cuentata qokurqä Jehoväpa testïgunkunalla Bibliachö ninqanta entiendiyänampaq nunakunata yanapayanqanta. Publicacionninkunachö yurimoq textukunatam apuntaq kä, tsëpitanam catölicu Bibliächö asheq kä. Mas yachakunqämi yanapamarqan alli kaq religionchö këkanqäta mas següru kanäpaq.

Bibliata estudiarmi yachakurqä Jehoväqa mandakunqankunata cäsukunata munanqanta. Efesius 4:22-24 ninqanta leyirmi cuentata qokurqä, ‘unë portakunqämannö këkaq’ ‘unë imanö kanqäta’ dejanäpaq kaqta, y ‘Teyta Dios munanqannö jukläyana portakunäpaq’ kaqta. Tsëpitaqa jukwan jukwan oqllanakuytam dejarqä. Imëkayoq këta munatsimaptin y imatapis ërayëpa munatsimaptinmi pukllakunata y apostëtapis dejarqä (1 Corintius 6:9, 10). Tsëta logranäpaqqa unë amïgükunatam dejanä karqan y Dios munanqannö portakoq alli amïgukunatam ashinä karqan.

Tsëta rurëqa manam fäciltsu karqan. Peru Testïgukuna rurayanqan reunionkunaman ëwarmi alli amïgukunata tarirqö. Bibliapita yachakurmi sïguirqä y yachakunqämanmi pensaq kä. Ichikllapa ichikllapam wiyanqä müsicata, imata logrëta munanqäta y imanö altsapäkunqäta cambiarqä. 1995 watam Testïgu kanäpaq bautizakurqä.

¿IMAKUNACHÖTAN YANAPAMASHQA?

Kananqa manam qellëyoq këpaq o imëkayoq këpaq yarpachakünatsu. Geniüta controlëta y fäcil mana cölerakuytam yachakurqö. Shamoq tiempuman pensarpis manam yarpachakünatsu.

Entëru Patsachö creikoq mayïkunawan Jehoväta sirwinqäpitaqa alläpam kushikü. Imëka problëmapa pasarpis pëkunaqa manam Jehoväta sirwita dejayantsu. Kananqa manam kikïllamannatsu yarparä, sinöqa Jehoväta sirwinäpaq y wakinkunapaq ima allitapis ruranäpaqmi kallpachakü.

• YURIKUNQAN WATA: 1963

• NACIONNIN: GRAN BRETÄÑA

• MAS REQINAPAQ: MANAM VÏDANCHÖ RURANQÄWAN KUSHISHQATSU KARQAN

PUNTA KANQÄ:

Inglatërra nacionchömi yurirqä. Tsënö kaptimpis, qanchis watayoqnö këkaptïmi Australia nacionta ëwakuyarqä y Gold Coast niyanqan markachömi kawayarqä. Tsëqa mëtsika turistakuna ëwayanqan Queensland niyanqan kinrëchömi këkarqan. Mana rïcu kayaptïpis manam imäkuna faltarqantsu.

Imäkuna mana faltaptimpis manam kushishqatsu karqä. Manam vïdächö ruranqäwampis kushishqatsu karqä. Borrächu kaptinmi papänïtaqa alläpaqa kuyaqtsu kä. Alläpa upunqan y mamänïta mana alli tratanqanqa manam ichikllapis gustamaqtsu. Watakuna pasanqanchöran, ejercituchö këkar kanan Malasia niyanqan nacionchö imakunata sufrinqanta musyarirqä, tsëran imanir tsënö portakunqanta entiendirqä.

Colegiuchö këkarmi upyar qallëkurqä. 16 watayoq kanqäyaqmi colegiuchö estudiarqä, tsëpitaqa ejercituchö Marïna niyanqanmanmi yëkurqä. Tsë witsanqa drogakurmi qallëkurqä, cigärrutam alläpa fumarqä y borrächum tikrarqä. Puntataqa semäna ushëllam upoq kä, peru tsëpitaqa cada junaqmi upoq kä.

20 watayoqnö këkarmi Dios kanqanman o mana kanqanman pensar qallëkurqä. “Dios rasumpa kaptinqa, ¿imanirtan sufrintsik y wanuntsik?” nirmi pensaq kä. Imëka mana allikuna kanqampita Diosta culparmi versukunatapis qellqarqä.

23 watayoq këkarmi ejercituchö Marïna niyanqanta dejarqä. Atska trabäjuchömi trabajarqä y juk watapam juk nacionta ëwakurqä. Tsënö kaptimpis, vïdächö ruranqäwanqa manam kushishqatsu karqä. Manam imata logranapaqpis kallpachakurqätsu y manam ima rurëtapis munarqätsu. “¿Imanirtan kallpachakunä wayiyoq kanäpaq, alli trabäjuyoq kanäpaq o mas alli carguyoq kanäpaq?” nirmi pensaq kä. Upyëta y müsicata wiyëllatam munaq kä.

Juk kutiqa imëpitapis masmi imapaq kawanqäta musyëta munarqä. Tsë tiempuqa prësukunata alläpa trabajatsiyanqan Auschwitz niyanqan carcelta rikaqmi Polonia nacionta ëwashqa karqä. Leyishqam karqä tsë carcelchöqa imëka mana allikunata rurashqa kayanqanta, peru tsë jatun pampata kikï rikëkurqa shonqüchömi alläpa llakikurqä. Manam entiendita puëdirqätsu imanir nunakuna alläpa mana alli kayanqanta. Tsë carcelpa purikaptïmi weqïpis shutur qallëkurqan, y “¿imanirtan tsëkuna pasakurqan?” nirmi pensarqä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ?

1993 watam juk nacionta ëwanqäpita kutir musyëta munanqäpaq Bibliachö ima ninqanta ashirqä. Tsëpita ichik tiempullatam Jehoväpa testïgunkuna punküman qayakayämurqan, y amänullachö këkaq estadiuchö rurayanqan asamblëamanmi invitayämarqan. Y ëwanäpaqmi decidirqä.

Tsë estadiuman partïduta rikaq ëwanqäpita juk ishkë killallaran pasashqa karqan, peru kë kutiqa llapampis jukläyam karqan. Testïgukunaqa shumaq vistishqa y yachanëpaqmi kayarqan y wamrankunapis allim portakuyaq. Mikuyanqan höraqa mana imëpis rikanqämi pasarqan. Mëtsikaq Testïgukunam kikin campuchö mikuyarqan, peru jamakuyänanman kutiriyaptinqa manam juk papel-llapis patsachö quedarqantsu. Tsënö kaptimpis, masqa espantakurqä llapankuna yamë y kushishqa këkäyanqanta rikarmi. Yachatsikamoqkuna imapita parlayämunqantaqa manam yarpätsu, peru Testïgukuna imanö portakuyanqantaqa kananyaqmi yarparëkä.

Juk kutim, Bibliata y atska religionkunata reqeq prïmü nimarqan imata rurayanqampita rasumpa kaq cristiänukunata reqinapaq kaqta Jesus ninqanta. Y tsë paqasmi tsënö nimanqanta yarpärirqä (Mateu 7:15-20). Tsëmi “allichi Testïgukuna imanir jukläya kayanqampita masllata musyarïman” nir pensarqä. Tsë kutillaran imatapis rurëta munarqä y imapis alliyänampaq kaqman pensarqä.

Asamblëaman invitamaq Testïgu warmikunaqa qateqnin semänam yapë watukayämarqan. Bibliapita yachakuyänäpaqmi änirqä. Reunionkunamampis ëwarmi qallëkurqä.

Bibliapita yachakunqämannömi Diospaqqa jukläyana pensarqä. Imëka mana allikunapita y imëkata sufrinqantsikpita mana culpayoq kanqanta y nunakuna mana allikunata rurayaptin alläpa llakikunqantam yachakurqä (Genesis 6:6; Salmus 78:40, 41). “Kananqa Diosta mana llakitsinäpaqmi llapan puëdinqämannö kallpachakushaq” nirmi pensarqä, y shonqunta kushitsitam munarqä (Proverbius 27:11). Cigärru fumëta, upyëta y jukwan jukwan oqllanakuytam dejarqä. 1994 wata marzu killam Jehoväpa testïgun kanäpaq bautizakurqä.

¿IMAKUNACHÖTAN YANAPAMASHQA?

Kananqa kushishqa y yamëmi sientikü. Manam llakikurnin upyartsu purï. Imapaq yarpachakunqätapis Jehoväpa makinchömi dejëkü (Salmus 55:22).

Shumaqllan Testïgu warmï Karenwan casakunqäpitaqa chunka watanam pasashqa, wamran Nellapis alläpa yachanëpaqmi. Kimämi killachö atska hörakuna yachatsikuyä y nunakunatam yanapayä Diospita yachakuyänampaq. Kananqa musyänam imapaq kawanqäta.