C⁠ˈ⁠uyashca huauquicuna panicuna:

Casi 2.600 huatacuna huashamanca Ezequielca muscuipi shinami shuj jatun carrota laya ricurca. Chai carrotaca Jehová Diosmi pushacurca. Shinallataj chai carroca shuj rayo laya utca rijtami ricurca. Shujtaj ladoman ringapaj, vueltata cungapajpish mana shayarircachu (Ezeq. 1:​4, 9, 12, 14, 16-27).

¿Ezequiel muscuipi shina ri­cushca­ca imatataj yachachin? Jahua pachapi Diosta servijcunaca mana shaicushpami Diospajta rurashpa caticuncuna. Cutin, ¿cai pachapi Diosta servijcunaca imatataj ruracuncuna? Caina huataca, Diosta servijcunaca mana shaicushpami achcata rurarcacuna. Caita ricushpami Diosllataj ayudacushcata yachanchij.

Por ejemplo, Estados Unidos llajtapi ima tucushcata ricushun. Brooklyn llajtapi tiyaj Betelpi trabajaj achca huauquicuna panicunaca Warwick llajtapi tiyaj mushuj Betelman pasangapajmi ocupados cashcacuna. Shujtajcunaca Estados Unidos llajtapi tiyaj shujtaj oficinacunamanmi pasacushcacuna. Cutin maijancunaca Betelmanta llujshishpami shujtaj ruraicunapi Diosta servicuncuna. Shujtaj llajtacunapica sucursalcunatami rurashcacuna, allichishcacuna o huaquin sucursalcunataca tandachishpami shujllata rurashcacuna. Shinallataj maijan huauquicuna panicunaca shujtaj ladocunamanmi rina cashca. Chai ruraicunapimi betelitacunaca ocupados cashcacuna. Cancunaca manachari shujtaj ladoman rina cashcanguichij. Shinapish Diosta servingapaj shujtaj ruraicunapichari achca ocupados cashcanguichij.

Mundo enteropimi mana shaicushpa Diospajta rurangapaj achcata esforzaricunguichij. Chaimantami Cuerpo Gobernantepi servij huauquicunaca cushilla canchij. Por ejemplo, Diosmanta huillangapajmi shujtaj ladoman rishcanguichij, shujtaj rimaitapish yachashcanguichij. O tucuicunaman huillangapaj imata ruranatami ricushcanguichij. Shuj carrerapi callpacuj shinami huiñai causaita charingapaj esforzaricunguichij. Yuyaj cashpapish, ungushca cashpapish Diosta tucui shunguhuan servishpami Diablo llulla cashcata ricuchicunguichij (1 Cor. 9:24).

Jehová Diosca cancunapaj alli ruraicunataca manataj cungarinchu (Heb. 6:10). Abraham y Sara rurashca layami ruracunguichij. ¿Abrahamca 70 huatacunata yalli charishpaca imatataj rurarca? Paipish paipaj familiapish Diosta cazushpami Ur llajtamanta Canaán llajtaman rirca. Abrahamca huañungacamami carpa huasicunapi causarca. Abrahampish Sarapish Diospajta tucui shunguhuanmi rurarcacuna (Gén. 11:31; Hech. 7:​2, 3).

 “¿Cai tucuri punllacunapica ñucapish Abraham y Sara shinachu ­ruracuni?” nishpami tapurina canguichij. Cashna ruracushpaca Jesús mandashcatami pajtachicunguichij. Jesusca: ‘Tucui cai pachata richij, ñuca yachacujcunata ruraichij. Paicunataca Yayapaj, Churipaj, jucha illaj espiritupaj shutipi bautizaichij’ nircami (Mat. 28:19).

“Richij” nishpaca, mana shaicushpa, Diosmanta huillashpa ocupados cana cashcatami Jesusca nisha nicurca. Tucui muyundij Allpapi caina huata alli huillaicunata mana shaicushpa cancuna huillashcamantami cushicunchij. Shinallataj Jehová Dios bendiciacushcata, paillataj ayudacushcatami ricunchij (Mar. 13:10).

Achca gentecunami Diosmanta yachasha nincuna. Caina huataca 8.340.847 publicadorcunami carcanchij. Shinallataj casi 10.115.264 gentecunamanmi cada quilla Bibliamanta yachachircanchij. Jahua pachapi Diosta servijcunaca mana shaicushpami Diospajta rurashpa caticuncuna. Cancunapish chashnallatajmi ruracunguichij. Chaimanta Jehovapaj jatun punlla manaraj chayamujpi pai mingashcata pajtachishpa catichij.

2017 huatapajca cai versotami ag­llashcanchij: ‘Jehová Diospi shunguta churashpa imata­pish allita rurai’ (Sal. 37:​3, NM). Cai shimicunata cazushpa, allita rurashpaca Diospi tucui shunguhuan crishcatami ricuchinguichij. Shinallataj cancunalla cashcataca ama yuyaichijchu. Jesusca: “Cai pacha tucuringacamami, tucui punllacuna ñucaca cancunahuan casha” nircami (Mat. 28:20). ¿Manachu Jesusca pai nishcata pajtachicun?

Diosta servingapajmi tucui ima­lla rurai tucushcata rurana canchij. Achcata rurajpipish, ashallata rurajpipish c⁠ˈ⁠uyaimanta rurajpica Jehová Diosca cushillami sintiringa. Shinallataj bendiciashpami catinga (2 Cor. 9:​6, 7). Chaimanta, Diosta tucui shunguhuan mañashpa, Bibliata yachashpa, cushilla paimanta huillashpa catichij. Chashnami Yaya Diospajman ashtahuan c⁠ˈ⁠uchuyanguichij.

Diabloca pai munashcata rurana punllacuna “ashalla cashcata” yachashpami Jehová Diosmanta caruyachisha nin (Apoc. 12:12). Diosmanta caruyachisha nishpami Diabloca imatapish rurashpa catinga. Pero Jehová Diospajman ashtahuan c⁠ˈ⁠uchuyajpica mana caruyachi tucungachu (Sal. 16:​8). C⁠ˈ⁠uyashca huauquicuna panicuna, cancunata achcata c⁠ˈ⁠uyashcataca amataj cungaringuichij. Shinallataj cai tucuri punllacunapi Diospaj munaita pajtachingapaj ayudacushcamantaca pagui ninchijmi.

Tucui shunguhuan,

Testigo de Jehovacunapaj Cuerpo Gobernante