CALLARIPI TIYAJ YUYAI
Ñucanchij tiempohuan imata ruranata alli yuyashun
“Ashahuan tiempota charishpaca allimi canman”. ¿Canca chashna nishcanguichu? Bueno pobrecuna cashpa o charijcuna cashpapish tucuicunami chai tiempollatataj charinchij. Ñucanchij tiempota pirdishpaca ña mana cutin chai tiempota chari tucunchijchu. Chaimantami ñucanchij tiempohuan imata ruranataca alli yuyana canchij. Huaquin gentecunaca alli yuyashpa paicunapaj tiempohuan imata rurashcata ricushun.
Consejo 1: Alli organizai
Imata puntapi rurana cashcata ricui. Bibliapica ashtahuan valishca cosascunataraj rurachunmi animan (Filipenses 1:10). Chaipajca imalla rurana cashcata ricushpa shuj listata rurai. Chai listapica imata puntapi rurana cashcataraj churai. Shinallataj qꞌuipamanca imata rurai tucushcata churai.
Alli yachaj cai. Eclesiastés 10:10-pica: “Hacha filo tucurijpi mana cutin molashpaca, ashtahuan sinchitami shitana tucun. Ashtahuanpish alli yachaica alli pushanapajmari” ninmi. Alli trabajangapajca puntapica hacha filotarajmi alajata molanchij. Chashnallatajmi ñucanchij tiempohuan puntapica imata rurana cashcataraj alli yuyana canchij. Chashnami ñucanchij tiempotaca mana yangamanta pirdishun. Ñucanchij listapi imata puntapi rurashun nishcatarajmi rurai tucunchij. Qꞌuipamanca mana tanto urgente cosascunatami rurashpa cati tucunchij. Shuj runa alli trabajangapajca puntapica hacha filotarajmi llujshichin. Chashnallatajmi alli yachaj runaca tiempota alli aprovechangapajca puntapica imata rurana cashcataraj yachana can.
Tucuita ruranapi ama yuyaichu. Huaquinpica achca ruraicunatami rurasha ninchij. Pero huaquin ruraicunaca mana tanto importantechu can, tiempotami pirdichin. Shujtajcunapish paicunahuan imata rurachunmi invitancuna. Huaquinpica mana ninatami yachana canchij. ¿Imamanta? Yallitaj shaicurishpami ungushun, cushillapish ña mana causashun.
Consejo 2: Tiempota chingachij cosascunata saqui
Qꞌuipaman rurashallami nishpa ama yuyaichu. Eclesiastés 11:4-pica: “Huairata chapajca, mana tarpunchu. Pꞌuyupi ñahuita churajpish, chagrataca mana tandanchu” ninmi. Shuj runa tarpungapaj tamia shamunata shuyashpallaca imata mana japingachu. Chashnallatajmi ñucanchij causaipi imata decidingapajca tucuitarajmi yachana cani nishpaca imatapish mana rurashun. Proverbios 14:15-pica: “Yachajcunaca imata rurangapajpish, alli yuyarinrajmi” ninmi. Chaimanta ima decisioncunata agllangapajpish alli yuyanarajmi canchij. Shinapish yuyarinami canchij, imata decidingapajca mana tucuita yachai tucunchijchu (Eclesiastés 11:6).
Tucui alli llujshichunca ama shuyaichu. Santiago 3:17-pica: “Jahua pachamanta shamuj alli yachaita charij runaca intindijmi can” ninmi. Imatapish allita ruranata yachaj canaca allimi can. Pero tucui ñucanchij munashca shina llujshichun shuyashpaca llaquipimi urmashun. Por ejemplo, shuj shimita yachaj runaca pandari tucushcataca yuyanami can. Chai pandarishcacunamantami paica yachai tucun. Pero tucuipi alli llujshichun shuyaj runaca imapi pandarinataca manchajmi. Chaimantami cai mushuj shimita yachashpa catinatapish mana valinga. Shinapish ñucanchijcuna imata rurai tucushcata o imata mana rurai tucushcatapish allimi yuyana canchij. Proverbios 11:2-pica: “Alli yachaica mana jatun tucushcacunahuanmi tiyan” ninmi. Cai alli yachaj o alli intindij runaca paipaj pandarishcacunamantapish cushicushpami ñaupajman catin.
“Can imata randishpaca mana cullquihuan paganguichu, cambaj tiempohuanmi pagangui” (El arte de vivir. Sé feliz, nadie te está mirando).
Consejo 3: Alli yuyashpa imatapish rurai
Trabajanallapi, divirtirinallapipish ama yuyaichu. Eclesiastés 4:6-pica: “Shuj maqui jundallata trabajashpa, ashata samarinaca ashtahuan allimari” ninmi. Shuj runa trabajanallapi tiempota pasashpaca fuerzatapish, tiempotapish mana charingachu. Trabajashcamantapish cushicuitaca mana charingachu. Cutin qꞌuilla runaca tiempotami malgastan. Bibliapica trabajanapish ashata samarinapish allimi can ninmi. Yaya Diosca chaicunamanta cushicuchunmi munan (Eclesiastés 5:19).
Alli dormi. Salmo librota quillcaj runaca: “Sumajtami dormij siririni, sumajtami dormini” nircami (Salmo 4:8). Casi tucui gentecunaca 8 horascunatami dorminata minishtincuna. Chashna dormishpaca paicunapaj cuerpopipish, yuyaipipish, umapipish allimi can. Alli dormishpaca imata rurashpaca allimi rurashun. Imata yachangapajpish memoriaca allimi canga. Cutin mana alli dormishpaca accidentecunatami chari tucunchij, imapipish pandari tucunchij o ratomi pꞌiñari tucunchij.
Imalla rurai tucushcallata rurai. Eclesiastés 6:9-pica: “Manapish japipajta charina yuyai canapaj randica, ña charishcahuan cushicunami alli can” ninmi. ¿Cai shimicunaca imatataj nisha nin? Alli yachaj runaca paipaj munaicunamantami jarcarinata yachan. Chashnami paica creditohuan randi tucunguillami nishca propagandacunatapish mana crin. Shinallataj alli yachaj runaca mana “japipajta charina yuyai canapaj randica” pai chari tucushcahuanmi cushicun.
Consejo 4: Ima alli cashcata agllai
Cambaj ima alli cashcata, ima mana alli cashcata ricui. Ñucanchij causaica flechacuna shinami can. Cutin alli ruraicunaca flechacunata shitaj arco shinami can. Ima shinami arcoca flechacunata maiman shitanata ricuchin, chashnallatajmi alli ruraicunaca ñucanchij causaita ima shina pushanata ricuchin. Shinallataj alli ruraicunaca ñucanchij tiempota alli aprovechachunmi ayudan. ¿Ima alli cashcataca maipitaj yachai tucunchij? Bibliapimi yachai tucunchij. Chaimantami gentecunaca Bibliata liyincuna (Proverbios 2:6, 7).
Cꞌuyaj cai. Colosenses 3:14-pica: “Cꞌuyaimi tucuicunata shujllata rurajtajca” ninmi. Cꞌuyaita mana charishpaca mana cushilla causai tucushunchu. Familia ucupica cꞌuyaimi minishtirishca can. Huaquincunaca cullquita charinallapi o shuj profesionta charinallapimi ashtahuan tiempota cuncuna. Chaimantami mana cushilla causancuna. Cꞌuyaimi tucuimanta yalli ashtahuan valishca can. Chaimantami Bibliapica achca cutin yachachin (1 Corintios 13:1-3; 1 Juan 4:8).
Diosmanta yachangapaj tiempota surcui. Geoff shuti runaca shuj alli huarmita, ishqui huahuacunata, alli amigocunata, alli trabajotami charirca. Shinapish paipaj trabajopica gentecuna achcata sufrijta, huañujtami ricurca. Chaimantami paica, “¿chashnachu causana canchij?” nishpa tapurirca. Shuj punllaca testigo de Jehovacunapaj shuj publicacionta japishpami liyirca. Chaipimi pai tapurishca yuyaita yacharca.
Chai runaca pai imata yachashcatami paipaj huarmiman, paipaj huahuacunaman huillarca. Paicunapish ashtahuanmi yachanata munarca. Tucui familiami Bibliamanta yachai callarirca. Chashnami paicunaca ashtahuan cushilla sintirircacuna. Shinallataj paicunapaj tiempohuan imallata rurana cashcata yuyaipi charishpami alli organizarircacuna. Ashtahuanpish shamuj punllacunapi llaquicuna illaj huiñai huiñaita causanata yachashpami cushicurcacuna (Apocalipsis 21:3, 4).
Geoff runahuan ima tucushcata yachashpaca Jesús nishca shimicunatami yuyarinchij. Paica: “Espiritupi huajcha cajcunaca cushichishcami” can nircami (Mateo 5:3). ¿Canca Yaya Diosmanta yachangapaj tiempota surcunata munanguichu? Bibliamanta yachangapaj tiempota surcushpallami alli yachaita charingui. Chashnami cada punlla cushilla causangui.
