1. ¿2023-pi tiyashca reunión anualpica imatataj yacharcanchij?

 HUATA 2023-pi tiyashca reunión anual tandanacuica alajami carca. a Chaipica Bibliapi nishcacunata ashtahuan alli intindina cashcatami nircacuna. Shinallataj predicacionmantami huaquin huillaicunata curcacuna. Por ejemplo, chaipica Babilonia jatun pueblo tucurishca qꞌuipapish maijan gentecuna tal vez Jehová Diosta sirvina oportunidadta charinatami nirca. Shinallataj noviembre de 2023 huatamanta predicacushpa tucui imallata rurashcata informepi churana ña mana minishtirishca cashcatami nirca. ¿Pero Diosmanta huillana ña mana minishtirishca cashcamantachu chai cambiocunaca tiyarca? Mana.

2. ¿Cunan punllacunapi Diosmanta huillanaca imamantataj achca importante can? (Marcos 13:10).

² Diospaj punlla quichquiyamucushcamantami Diosmanta huillanaca importante can. Jesusmi cai allpapi cashpaca chaita yachachirca (Marcos 13:​10-ta liyipai). Shinallataj Mateo libropi nishca shinaca alli huillaicunata muyundij allpapi huillashca qꞌuipami cai pachapaj ruraicunaca“tucuringa” (Mateo 24:14). Cai versopica Diablopaj culpamanta tiyashca ruraicuna tucurina cashcatami nicun. Shinallataj Jehová Diosca paipaj punlla ima hora, ima punlla shamunataca ñami agllashcata charin (Mateo 24:36; 25:13; Hechos 1:7). Chaica cada punllami ashtahuan quichquiyamucun (Romanos 13:11). Chaita yachashcamantami Diosmanta huillanataca manataj saquina canchij.

3. ¿Imamantataj Diospaj gobiernomanta alli huillaicunataca huillanchij?

³ Tucuicunami “¿Diospaj gobiernomanta alli huillaicunataca  imamantataj huillana canchij?” nishpa tapurina canchij. Ashalla shimicunapi nishpaca cꞌuyaimantami huillana canchij. Diosmanta huillashpaca alli huillaicunata, gentecunata, ashtahuantajca Jehová Diosta cꞌuyashcatami ricuchinchij. Cunanmi chaicunamantaca ashtahuan yachashun.

ALLI HUILLAICUNATA CꞋUYASHCAMANTAMI PREDICANCHIJ

4. ¿Shuj alli noticiata uyashpaca imatataj ruranata munanchij?

⁴ Shuj alli noticiata yachaj chayashpaca ¿ima shinataj sintiringui? Tal vez shuj familia shuj huahuata charigrishcata o achca tiempota mashcashca qꞌuipa shuj alli trabajota japishcata canman huillajpica ¿manachu cushilla sintiringui? Seguramente familiacunaman, amigocunamanmi chai alli noticiata huillasha ninguiman. Diospaj gobiernomanta alli huillaicunata primera vez uyashpaca seguramente chashnallatajmi sintirircangui. Chai huillaicunami shujtaj huillaicunata yalli valishca can.

5. ¿Bibliata estudiai callarishpaca ima shinataj sintirircangui? (Fotomantapish parlapai).

⁵ ¿Bibliata estudiai callarishpaca ima shinataj sintirircangui? Bibliapica Jehová canta cꞌuyashcata, paita sirvichun munashcata, huañuitapish, nanaicunatapish tucuchigrishcatami yacharcangui. Shinallataj paraisopi huañushca gentecunata causachinatami yacharcangui (Marcos 10:​29, 30; Juan 5:​28, 29; Romanos 8:​38, 39; Apocalipsis 21:​3, 4). Tucui chai yachachishcacunaca shungu ucucamami chayarca (Lucas 24:32). Chashnami Bibliapi nishcacunata cꞌuyai callarircangui. Chaimantami can yachashcata tucuicunaman huillasha nircangui (Jeremías 20:​9-tapish ricui).

6. ¿Huauqui Ernestomanta, paipaj huarmimantapish imatataj yachanchij?

⁶ Huauqui Ernestomanta yachashun. b Pai chunga huatata charijpimi paipaj yayaca huañurca. Chaimantami: “¿Ñuca papitoca jahua  cielomanchu rirca, para siemprechu huañurca?” nishpa tapurij carca. Shujtaj huahuacunata paicunapaj yayacunahuan cajta ricushpaca pꞌiñarijmi carca. Casi cada punllami cementerioman rishpa paipaj yayapaj tumbapi cungurishpa “Yayitu Dios ñuca papito maipi cashcatami yachasha nini” nishpa mañaj carca. Huauqui Ernestoca 27 huatacunata charishpami Bibliata estudiai callarirca. Huañushcacuna imata mana rurai tucushcata, dormicuj shina cashcata, causarigrishcatapish yachashpaca cushillami sintirirca (Eclesiastés 9:​5, 10; Hechos 24:15). Paipaj huarmi Rosapish Bibliatami estudiai callarirca. Paipish Bibliata yachacushcamantami Ernestoca cushilla sintirirca. Ishquindijmi 1978 huatapi bautizarircacuna. Paicunaca familiacunaman, amigocunaman, tucuicunamanmi ima yachacushcata cushilla huillarcacuna. Chaita rurashcamantami más de 70 gentecunata Jehová Diosta rijsichun, bautizarichunpish ayudashcacuna.

7. ¿Bibliapaj yachaicunata cꞌuyashpaca imatataj ruranata munashun? (Lucas 6:45).

⁷ Bibliapi ima yachashcacunata cꞌuyashpaca shujtajcunamanmi huillanata munashun (Lucas 6:​45-ta liyipai). Ñucanchijcunapish primer siglopi causaj Jesuspaj discipulocuna shinami sintirishun. Paicunaca: “Ñucanchijca imata ricushcata, imata uyashcata huillanataca manataj saqui tucunchijchu” nircacunami (Hechos 4:20). Caipi ricushca shinaca Bibliapaj yachaicunata cꞌuyashcamantami tucui gentecunaman huillana canchij.

GENTECUNATA CꞋUYASHCAMANTAMI PREDICANCHIJ

8. ¿Gentecunamanca imamantataj huillanata munanchij? (“ Diosta sirvichun cꞌuyaihuan ayudashunchij” nishca recuadrota ricui; fotomantapish parlapai).

⁸ Ñucanchijca Jehová Dios shina, Jesús shinami gentecunataca achcata cꞌuyanchij (Proverbios 8:31; Juan 3:16). Chaimantami gentecuna ima esperanzata mana charishcata, Jehová Diostapish mana rijsishcata ricushpaca llaquirinchij (Efesios 2:12). Chai gentecunaca achca llaquicunata charishcamantaca yacupi ahogaricuj shinami causacuncuna. Pero ama chashna causangapajca Diospaj Gobiernomanta alli huillaicunata uyanatami minishtincuna. Shinallataj gentecunata cꞌuyashcamantami paicunaman Diosmanta yachachingapaj sinchita esforzarinchij. Paicunaca Diosmanta yachashpami shuj esperanzata chari tucuncuna. Shinallataj cunan punllacunapipish alli causaitami chari tucuncuna. Ashtahuancarin shamuj punllacunapica paraisopi huiñaita causana oportunidadtami charingacuna (1 Timoteo 6:19).

9. ¿Gentecunataca imatataj advertinchij? (Ezequiel 33:​7, 8).

⁹ Gentecunata cꞌuyashcamantami millai ruraicuna ñalla tucurigrishcata huillashpa purinchij (Ezequiel 33:​7, 8-ta liyipai). Huaquin gentecuna, mana testigo caj familiacunapish  chaita mana yachasha nishcamantami llaquilla sintirinchij. Mateo 24:​21-pica “Chai punllacunaca jatun llaquimi canga. Chashna llaquica cai pacha tiyai callarimanta cunancama mana tiyashcachu. Cutinpish manataj tiyangachu” ninmi. Chaimantami chai llaqui punllacunapi ima tucugrishcata yachachun munanchij. Chai punllacunapica tucui panda religioncunami tucuringa. Shinallataj Armagedonpica tucui millai ruraicunaca huiñaipajmi chingachishca canga (Apocalipsis 16:​14, 16; 17:​16, 17; 19:​11, 19, 20). Yaya Diostaca “alli shungu gentecuna ñucanchijta uyashpa cambaj puebloman yaicuchun ayudapai” nishpami mañanchij. Pero, cai rato mana uyasha nij gentecunahuan, ñucanchij familiacunahuanpish ¿imataj tucunga?

10. ¿Cunan punllacunapi Diosmanta huillanaca imamantataj achca importante can?

¹⁰ Caishuj yachaipi yachashca shinaca Babilonia jatun pueblo tucurijta ricushpaca tal vez maijancunaca Jehová Diostami sirvisha ningacuna. Jehová Diosca tal vez paicunatapishmi quishpichinga. Caita intindishcamantami cunan punllacunapi Diosmanta huillana imamanta importante cashcata cuentata cunchij. Tal vez chai punllacunapica paicunaca ñucanchijcuna paicunaman imata huillashcatami yuyaringacuna (Ezequiel 33:​33-tapish ricui). Ñucanchij nishcacunata yuyarishpaca tal vez paicunaca Jehová Diosta ñucanchijhuan sirvinatami decidingacuna. Filipos llajtapi tiyaj carcelta cuidaj runaca shuj jatun terremoto tiyajpimi paica Jehová Diosta sirvinata decidirca. Babilonia jatun pueblo tucurijpica gentecunapajca shuj jatun terremoto tiyashca shinami canga. Chaimantami tal vez maijancunaca Jehová Diosta sirvinata decidingacuna (Hechos 16:​25-34).

JEHOVÁ DIOSTA, PAIPAJ SHUTITAPISH CꞋUYASHCAMANTAMI PREDICANCHIJ

11. ¿Jehová Diostaca ima shinataj jatunyachinchij? (Apocalipsis 4:11; fotomantapish parlapai).

¹¹ Tucuimanta yallica Jehová Diosta, paipaj shutitapish cꞌuyashcamantami Diospaj Gobiernomanta alli huillaicunata huillashpa purinchij. Shinallataj predicashpami Yaya Diosta jatunyachinchij. Ñucanchijpish jahua pachapi caj angelcuna shinami Yaya Diostaca: “Canmi jatunyachishca canatapish, alli nishca canatapish chasquina cangui” nishpa jatunyachinchij (Apocalipsis 4:​11-ta liyipai). ¿Jehová Diostaca ima shinataj jatunyachinchij? Chaipajca Jehová Dios tucui imalla tiyashcacunata rurashcata, ñucanchijcunaman causaita cushcata imamanta seguro cashcatami gentecunamanca alli yachachina canchij. Shinallataj ñucanchij pudishcacama tucui shunguhuan, tucui fuerzahuan huillashpa catingapajmi esforzarina canchij (Mateo 6:33; Lucas 13:24; Colosenses 3:23). Caipi ricushca  shinaca Yayitu Jehová Diosta cꞌuyashcamantami predicanchij. Pero paipaj shuti maijan cashcata, ima nisha nishcatapishmi yachachina canchij. ¿Chaitaca imamantataj rurana canchij?

12. ¿Diospaj shutita jatunyachingapajca imamantataj predicana canchij?

¹² Shinallataj Jehová Diosta cꞌuyashcamantami paipaj shutita jatunyachishun ninchij (Mateo 6:9). Diabloca Jehová Diosmantaca achca llullacunatami nishca. Pero ñucanchijcunaca Diablo imalla nishcacuna mana cierto cashcatami ricuchishun ninchij (Génesis 3:​1-5; Job 2:4; Juan 8:44). Diosmanta huillashpami alli shunguta charij gentecunata Diablopaj llullacunapi ama crichun ayudanchij. Ashtahuanpish tucui gentecuna Jehová Dios yallitaj cꞌuyaj cashcata, alli mandaj cashcata, paipaj gobierno ñalla tucui llaquicunata tucuchishpa sumaj causaita cugrishcatami huillashpa purinchij (Salmo 37:​10, 11, 29; 1 Juan 4:8). Chaita rurashpami Jehová Diospaj shutita jatunyachinchij. Ashtahuanpish testigo de Jehovacuna nishca shutita charishcamantapishmi huillana canchij. Catij parrafopimi chaimantaca ashtahuan yachashun.

13. ¿Testigo de Jehovacuna cashcamantaca imamantataj cushilla sintirinchij? (Isaías 43:​10-12).

¹³ Jehová Diosca paipaj testigocuna cachunmi ñucanchijcunataca agllashca (Isaías 43:​10-12-ta liyipai). Huaquin huatacuna huashamanca Cuerpo Gobernante huauquicunaca: “Testigo de Jehovacuna nishca shutita apanaca ima bendiciontapish yalli valishcami can” nishpami shuj cartata cacharcacuna. c Cai ejemplopi yuyashun. Ñucanchijta yangamanta juchachishpa juicioman apajpica ñucanchijcuna ima mana allita mana rurashcata testificachunca shuj testigotami minishtinchijman. Pero ñucanchij testigo cachunca  ¿pitataj agllanchijman? Ñucanchijcuna alli rijsishca amigotami agllanchijman. Shinallataj ñucanchijmanta imalla nishcacuna cierto cashcata tucuicuna crichunca allita rurashpa causaj testigotami agllanchijman ¿nachu? ¿Caimantaca imatataj yachanchij? Jehová Diosca ñucanchijta alli rijsishcamantami tucui shunguhuan ñucanchijpi confian. Chaimantami pailla alli Dios cashcata huillachunca ñucanchijta agllashca. Testigo de Jehovacuna cashcamantaca ñucanchijcunaca cushillami sintirinchij. Ashtahuanpish Jehová Diosmanta Diablo nishca llullacuna mana cierto cashcatami gentecunaman yachachinchij. Chashnami Diospaj shutita rijsichinchij. Ashtahuantajca testigo de Jehovacuna cashcatami ricuchinchij (Salmo 83:18; Romanos 10:​13-15).

JEHOVÁ DIOS NINGACAMA HUILLASHPA CATISHUNCHIJ

14. ¿Shamuj punllacunapica imataj tucunga?

¹⁴ Jehová Diospaj nishcacuna shamuj punllacunapi ima shina pajtarijtaca tucuicunami ricunata munanchij. Shinallataj jatun llaqui punllacuna manaraj callarijpi Jehová Diospaj ayudahuan achca gentecuna paipajman cꞌuchuyachunmi munanchij. Jatun llaqui punllacunaca achcata mancharina punllacunami canga. Pero chai punllacunapi huaquin gentecuna Diablopaj ruraicunata ladoman saquishpa, ñucanchijhuan Jehová Diosta adoranata tal vez decidinata yachashpaca cushillami sintirinchij (Hechos 13:48).

15, 16. ¿Imatataj rurashpa catina canchij? ¿Chaitaca ima horacamataj rurashun?

¹⁵ Diospaj punlla shamungacamaca ¿imatataj rurana canchij? Cai tucuri punllacunapica Jehová Diosca ñucanchijcunamanca shuj sumaj trabajotami mingashca. Paica tucui muyundij Allpapi Diospaj Gobiernomanta alli huillaicunata huillachunmi munan. Ashtahuanpish Diablopaj millai ruraicuna ñalla tucurina cashcatapishmi gentecunamanca huillana canchij. Diospaj juzgana punlla shamujpica gentecunaca ñucanchij imalla nishcacuna Jehová Diosmanta shamushcatami cuentata cungacuna (Ezequiel 38:23).

¹⁶ Shinashpaca, ¿imatataj tucui shunguhuan rurashun ninchij? Ñucanchijca alli huillaicunata, gentecunata, ashtahuantajca Jehová Diosta, paipaj shutitapish achcatami cꞌuyanchij. Chaimanta, Jehová Dios “ama huillaichij” ningacama tucui shunguhuan huillashpa catishunchij.