Bibliapi juicio punllamanta yachachijpica achcacunaca cai ladopi tiyaj dibujo shina cashcatami yuyancuna. Paicunaca, “achca almacunami Diospaj ñaupajpica juzgashca cangapaj shuyacun, allita rurajcunaca jahua pachamanmi ringa, cutin mana allita rurajcunaca infiernomanmi ringa” nincunami. Pero Bibliapi juicio punllamanta parlajpica tucui cai Allpamanta llaquicunata tucuchina cashcatami nin (Salmo 96:13). Yayitu Diosmi Jesustaca Juez cachun agllashca. Chaimantami paica cashcata rurashpa gentecunataca juzganga (Isaías 11:1-5; Hechos 17:31-ta liyipai).

Punta cꞌari Adanmi Jehová Diostaca mana cazurca. Paimantami juchayuj canchij, sufrinchij, huañunchijpish (Romanos 5:12). Adán mana allita rurashcata allichingapajmi Jesusca achca gentecunata causachinga. Apocalipsis libropica Jesús mil huatacunata mandacujpimi cai tucunga ninmi (Apocalipsis 20:​4, 11, 12-ta liyipai).

Jesusca causarishcacunataca paicuna ñaupa imalla rurashcamantaca mana juzgangachu. Ashtahuanpish paicunataca causarishca qꞌuipa ima rurashcamantami juzganga. Paicunaca Apocalipsis 20-pi parlashca mushuj rollocunapi imalla nishcacunatami cazuna canga (Romanos 6:7). Apóstol Pabloca “cashcata rurajcunamanta, mana cashcata rurajcunamantami” parlarca. Paicuna causarishpaca Yayitu Diosmanta yachana oportunidadtami charingacuna (Hechos 24:15-ta liyipai).

Jehová Diosta mana rijsishpa huañushcacunaca cutin causarishpami Jehová munashca shina causana oportunidadta charingacuna. Diosta cazunata agllajpica huiñai causaitami charingacuna. Pero Diosta mana cazujpica “juzgashca cangapajmi causaringacuna” (Juan 5:​28, 29, La Biblia. Traducción del Nuevo Mundo; Isaías 26:​10; 65:20-ta liyipai).

Juicio punllaca mil huatacunapimi tucuringa. Chaipimi Diosta cazujcunaca jucha illaj tucungacuna. Shinami callaripi Jehová munashca shina causangacuna. Chaica sumajmi canga (1 Corintios 15:24-​28). Diabloca mil huatacunatami huichcashca canga. Chai qꞌuipami Diosca asha punllacunata Diablotaca cacharichinga. Chaimi Diabloca gentecunataca Jehová Diosmanta caruyachisha ninga. Pero Jehová Diosta cazujcunaca cai Allpapimi tucui vida causangacuna (Isaías 25:8; Apocalipsis 20:​7-9-ta liyipai).

Bibliaca shujtaj juicio punllamantapishmi parlan. Chai juicio punllapica cunan tiyashca millai gentecunatami tucuchinga. Ima shinami Noepaj punllacunapi mana yuyashcapi millai gentecunata tucuchirca. Chashnallatajmi chai juicio punllapica mana yuyashcapi millai gentecunata tucuchinga. Millai gentecunata tucuchijpica cashcata rurajcunallami cai Allpapica causangapaj saquiringacuna (2 Pedro 3:​6, 7, 13-ta liyipai).