Punda ruranara ajllai. Biblia ñucanchira camachinmi maican punda ministirishcara rurangaj ajllana ashcara (Filipenses 1:10). Ima ruranara quillcai, ñaupa punda rurana ashcara, uctalla rurana ashcaras, shinallara ministirishca uctalla ruranaras. Rurangaj ministirishca ajpis mana uctalla rurana anzhu imasna micunara randingaj ringahua, huaquin ruraigunara uctalla rurana ajpis mana ministirinzhu imasna televisionda ricuna. a

Huasha ima tucungaraushcaras iyari. Eclesiastés 10:10 nin: “Iluyachishca hacha tucurijpi caita mana pis iluyachijpis ashca ursarina ministiringa. Shinajpis ali yachana ima rurana ali llucshichu yanapan”. Imasna manara tarbangaj rishcallaira hachara ilu llucchina an shinallara timpura ali utilizangahua charajllaira ima rurana ashcara ajllana anchi. Mana yapa ministirishca, yangamanda lugarda pirdichijta ruranara saqui o huasha rurai. Can ruranara uctalla tucuchishaga listai tiajtas ñaupara rurai. Ñaupajtara ali purunturij angami imasna shu sabiru runa manara tarbangaj rishcallaira hachara ilura llucshij runa cuinta: pai ruranara tucuira pactachingami.

Ansa rurai. Mana yapa ministishcauna timpura chingachijta ruranara saqui. Ashca ruranara charina ashca turbachin chiraigu mana cushi anguichu.

Ama saquichu huasha rurangaj. Eclesiastés 11:4 nin: “Huairara ricuj runa mana tarpungachu shinallara puyura ricuj runa mana pallangachu”. Shu tarpuj runa ali timpura chapasha, mana tarpungachu mana pallangachu, timpura chingachingami. Ñucanchi ashca turbarishcauna ministirishca ruranaunara mana rurachinzhu. Rurangahuaga tucuira ricsina anchi nisha iyaima. Shinajpis huaquin ruranauna ali iyana ministirin, Proverbios 14:15 nin “iyaiyuj runa alira riparasha purin”. Shinajpis huaquin rurangaj ajllashcauna ima pasanara mana yachanchichu (Eclesiastés 11:6).

Tucui huras mana pandarishachu nisha iyana. Santiago 3:17 nin: “Ahuamanda [o Diosmanda] yachana” iyayuj an. Alira rurangaj munaj alira iyan. Ima huras mana pandarishachu nisha iyana llaqui sintirinama pandarinamas pushan. Imasna shu shimira yachauj intindina an pandaringaraushcara, pandarishcamanda yachangaraushcaras. Mana ima huras pandarishachu nisha iyaj runa imara rurangahuas manzhai charin, casna iyana mana yanapanzhu ñaupajma catingaj. Ñucanchi rurangaj munashcara ushashca tupulla ruranara iyana anchi. Proverbios 11:2 nin: “Sabiru iyana mansu shunguyujcunahua an”. Mansu shunguyuj runauna mana cuti cuti iyasha paiguna pandarishcamanda asinun.

Ali iyaihua tarbai, pujllai. “Ansa samana valishca an chi randi yapajta tarbana huairara catishca cuintami an” (Eclesiastés 4:6). Yapajta tarbaj runa mana timpu, mana ursa charinzhu charishcaunahua ali pasangahua. Randi quilla runa ministishca timpura yanga chingachin samanallai. Biblia ñucanchira animachinmi shinzhira tarbangaj shinallara charishcaunahua ali pasangahuas, caita Yaya Dios cun (Eclesiastés 5:19).

Ali puñui. Bibliara quillcaj nica: “Ñuca sirisha ganaslla puñusha” (Salmo 4:8). Rucuuna ocho horas ministinun puñungaj ali sintiringaj paiguna aicha, umais. Umara imasna yanapashcara rimasha ali riparangahua, ali yachangahuas yanapanmi chiraigu puñusha timpura ali utilizanchi. Mana puñusha llaquira apachin, manali sintichin piñachimbas.

Ushana tupu ruranara ajllai. “Ñahui ricunamanda cushiyana mas ali an chima caima yanga munaira catina randimanda” (Eclesiastés 6:9). Cai ¿imara nisha nin? Sabiru runa mana munaimandalla ruran o mana pactachina ushanara mana ajllan. Munashcamandalla randinai dibij tucunais mana urman. Chi randi charingaj ushashca tupuunahua cushiyan, “ñahui ricunamanda”.

Ali yachachishcasna causaushcara riparai. Ali yachachishcauna ñucanchira yanapan ima ali ajta riparangahua. Causai shu flecha cuinta ajpi, ali yachachishcauna shu arco cuinta shitangahua yanapangami. Punda ima ruranara yanapanga timpura ama yanga chingachingaj. ¿Maibi tupana ushanchi ali yachachishcaunara? Ashcauna Bibliai mascanun, tucuimanda ali sabiru yachachishcara charij libro an nisha (Proverbios 2:6, 7).

Llaquinara shungumanda mas ricuchingaj ursari. Colosenses 3:14 nin ‘Tucui alira pactachingaj llaquina shungura charichi’ nisha. Mana llaquisha mana cushi sintinchi, manali sintinchi, astaun mas familia ucui. Llaquinara charina randi, cullquira tarbanara mas valichisha mana cushi anungachu. Chiraigu Biblia ashca cuti nin llaquina yapa ministirinmi nisha (1 Corintios 13:1-3; 1 Juan 4:8).

Diosta ricsingaj can ministishcara yachangahua camba timpura utilizai. Shu runa Geoff nishca ali gustu huarmi, ishqui huahuauna, ali amigoguna, shujcunara gustu yanapana tarbanas charica. Shinajpis paihua tarbanai turmindarinara, huañunaras ricuj aca. Caita ricusha “¿causaibi casna turmindarisha causangallachu?” nisha tapurica. Shu punzha Jehovahuaj testigoguna quillcaunara ricusha paihua tapuimanda ali gustu cutipashcara ricuca.

Geoff pai leashcaunara paihua huarmira, paihua huahuaunara intindichica chiraigu paihua ailluuna caimanda mas yachangaj munanuca. Intiru paihua familia Bibliamanda estudiangaj callarica, paigunara yanapaca shinallara timpura ali utilizangahua yachanuca. Astaumbas mana turmindarisha causana mundura apingaj chapanaras cuca (Apocalipsis 21:3, 4).

Geoff pasashca Jesucristo rimashca shimiunara ñucanchira iyachin: “Yaya Diosmanda yachana munai iyaira charijcuna cushiunami” (Mateo 5:3). ¿Diosta ricsingaj mas timpura llucchingaj munanguichu? Diosta ricsinalla sabiru tucungaj ministishcara charishun, cai ñucanchira yanapangami cushi causangahua.