TAPUSHA CUINTACHINA | ANTONIO DELLA GATTA
Shu sacerdote Iglesiara saquin
ANTONIO Della Gatta iscun huatauna Italia llactai estudiaca, 1969 huatai sacerdote tucungaj pactaca. Nápoles (Roma llactai) shu seminario nishcara cuca. Shinajpi ashca estudiashca huasha, iyarishca huasha riparaca, católica Iglesia Bibliamanda quirishcaunara mana apashcara. Pai cuintangaraun imasna ursarica Diosta ricsingaj.
Can huahuai pasashcara cuintai.
1943 huatai Italia llactai pagaricani. Ñuca, ñuca huauquiunas ichilla llactai iñacanchi. Ñuca yaya sachai tarbaj, taulaunahua tarbaj aca. Pai, ñuca mamas católico religiombi iñachinuca.
¿Imarasha sacerdote tucungaj ajllacangui?
Huahuamanda misama ringaj munacani sacerdote rimashcara uyangaj. Pai rurashcara, rimashcara uyana yapa gustahuaca. Chimanda ñuca munaibi shamuhuaca sacerdote tucungaj. 13 huatara charishcai ñuca mama internado nishcama apahuaca, chibi huahuaunara puruntunuca sacerdote tucungaj.
¿Sacerdote tucungaj puruntuushcai Bibliara estudiacanguichu?
Mana ashcara. 15 huatara charishcai ñuca profesor cuhuaca evangelio nishca librogunara, chi libroguna Jesús causaimanda cuintaca, ashca cuti leacani. 18 huatara charishcai Roma llactama causangaj ricani, chibi católico universidadgunama ricani cai universidadgunara papa nishca mandan. Chibi estudiacani latín, griego, historia, filosofía, psicología, teología nishcaunara. Bibliamanda versiculogunara rimasha shinallara domingo misai Biblia leanara uyashas sirtu pacha Bibliara mana estudiashcanchi.
¿Seminario nishcara cushcai shujcunara yachachicanguichu?
Ñuca tarbanai maican cosasgunara alichingajlla acani, shinajpi decretos del Concilio Vaticano II nishcamanda yachachicani.
¿Imarasha Iglesiara saquingaj munacangui?
Quinsa iyaigunamanda: ricucani Iglesia politicai satirishcara, sacerdoteguna chi religionda catijcuna manali rurashcaunara ricusha mana imas ruranuca, shinallara maican Iglesia catolicamanda rimashcauna mana sirtu anuca. Caita iyacani ¿imasna shu Llaquij Dios huañushca runara huiñaigama libachina ushan? ¿Sirtu pacha Yaya Dios ninzhu shu rosario nishcahua tucui huras chillarara mañashca catingaj? a
¿Imara rurangaj ajllacangui?
Shinzhira huacasha Yaya Diosta yanapahuai mañacani; cunara italiano shimii Biblia de Jerusalén llucshishcara randisha leangaj callaricani. Shu domingo punzhai misara rurashca huasha, ñuca batara huambuushcai ishqui cariuna cai seminario nishcama pactamunuca. Rimahuanuca Jehovahuaj testigoguna ashcara, shinajpi paigunahua cuintaringaj callaricanchi. Shu hora yali Bibliamanda rimangaj callaricanchi sirtu religionmanda Biblia ima nishcara.
Jehovahuaj testigogunamanda ¿imara iyacangui?
Ashcara gustahuaca paiguna quirinamanda, imasna Biblia catolicai textogunara tupanamanda. Chi huasha shu Jehovahuaj testigo Mario shutiyuj Bibliamanda yachachingaj callarihuaca. Yapa chapaj shungura charica, tucui sábado punzhauna tamiajpis, mana tamiajpis nueve tutamandai pungüibi tacauca.
¿Imara iyanuca shuj sacerdoteguna Jehovahuaj testigoguna canda yachachingaj shamunujpi?
Paigunara cumpañachu cumbiracani, shinajpi mana pis Bibliamanda yachangaj callarinuca. Randi ñucara ashcara gustahuaca, gustura yachaucani. Intindicani imarasha Yaya Dios runauna turmindarinuchu saquishcara, cai tema ñucara yapajta turbachihuaca.
¿Canda yachachiuj jefeguna ninucachu Bibliara yachanara saquichu?
1975 huatai Roma llactama ashca cuti ricani ñuca yachaushcamanda cuintangaj. Ñuca jefeguna ñuca pandarishca ashcara rimangaj Bibliara mana utilizanuca. 9 de enero de 1976 huatai Roma llactama Iglesiamanda llucshiushca cartara quillcasha cachacani, ishqui punzha huasha seminario saquisha ricani, shinallara punda Jehovahuaj testigoguna tandarinama ricani. Shu atun tandarina aca, ashca Jehovahuaj testigoguna chibi anuca. ¡Tucui shuj tunu aca! Caran shuj quiquin Bibliara charinuca shinallara caran textogunara yachachiuj rimashcara mascanuca.
Camba ailluhua ¿imara iyaca can rurashcamanda?
Ñacas tucuiguna piñarinuca. Shinajpi ñuca huauqui Jehovahuaj testigogunahua Bibliamanda yachaushcara yachangaj pactacani Lombardía llactai. Chima pasiangaj rishcai Jehovahuaj testigoguna shu tarbanara, ñuca causangaj shu huasira tupanuca. Chi huatallaira Jehovahuaj testigo tucucani.
Cunara Diospa mayanlla sintirini
¿Can aripintiringuichu caita rurashcamanda?
¿Aripintirina? ¡Mana aripintirishca ani! Cunara Diospa mayanlla sintirini, yachashcani Biblia sirtu rimashcara mana filosofía, religión católica yachachishca cuinta. Cuna sirtu shimira Diosmanda runaunara yachachina ushani.
a Biblia cai tapuira shuj tapuigunaras cutipan. Niti BIBLIAMANDA YACHACHISHCAUNA > BIBLIAMANDA TAPUIGUNA.
