Sajonia partii pagaricani, chi timpui aca República Democrática Alemana (RDA). Ñuca huasii parijumanda llaquinucanchi ñuca yayauna ali yachachishcaunara yachachinuca. Cai llactai comunismo tiashcara chiraigu ashca runauna Sajonia partii religionda mana valichinuca. Ñuca Diospi mana quiricani. Ñuca dieciocho huatagama cai ishqui iyaigunai quiricani: Dios mana tiashcara shinallara cai comunismo iyaibi.

¿Imarasha comunismo iyaira gustahuaca? Cai iyai munacani, tucui runauna pariju anuchu. Astaumbas iyaricani tucui charij runauna pugri runaunahua pariju anuchu, tucui cullquiuna parijulla cushca angaj. Chiraigu comunismo malta organizaciombi yanapangaj callaricani. 14 huata charishcai ashcara tarbacani shu proyecto quillcaunara cutillara utilizangahua. Aue llactai tiaj apuuna ashcara agrasishca ashcamanda shu cuyanara cuhuanuca. Yapa malta ashcai ashca ricsishca politicogunara ñuca llactamanda ricsingaj callaricani. Quiricani ali ñambii riushcara, shamuj punzhai tucui ali ana ashcara iyacani.

Chi timpui ashca llaqui sintiricani. 1989 Berlín quinzha urmaca shinallara cai Europa del Este comunismo nishca. Mas llaquiunara tupacani. Ricsicani ashca manali rashcaunara ruraj anuca. Shu ejemplo churasha, cai comunismo iyaira mana catijcunara manali tratanuca. Shinajpi ¿imasnara chita rurana ushanuca? Comunismo yachachica tucuiguna pariju ashcara ¿manzhu? ¿Chi iyai yanga yachachishca ashcachu? Cai ashcara turbachica.

Ñuca iyaiguna turcarica. Cuna música pintanara gustangaj callarihuaca. Shu academia musicamanda estudiangaj callaricani huasha universidadma ringaj musicara tucasha pintasha causangaj munacani. Tucui ñuca huahua ashcai yachashcauna cungaricani. Cuna ali causangahualla munacani; chi ratullai ashca huarmiunahua llucshingaj callaricani. Shinajpi musicara tucashas pintashas ñuca munashca cuinta causashas turbarisha caticani, chita ricurica ñuca pintashcaunai. Shamuj punzhai ¿imara tucunga? ¿Ima rangahua causani?

Ñuca mascaushca cutipanaunara tupasha manzharicani. Academia tiaushcai shu chishii shamuj punzhaunamanda rimaj estudiantegunahua tiaricani chibi Mandy * tiaca shu Jehovahuaj testigo, ali camachishcara cuca. Rimahuaca: “Andreas can causaimanda shamuj punzhaunamanda cutipanaunara tupana munasha mascai Biblia ima rimashcara”.

Paita uyanara mana yachacani, shinajpi mas yachangahua munacani. Mandy ricuchihuaca Daniel capítulo 2, caita leashaga ashcara manzharicani. Cai profecía rimaca ashca ursayuj mandashcaunamanda, cai gobiernoguna ashca ricsishca tucunuca ñucanchi punzhaunagama. Huasha Mandy shuj profeciaguna shamuj punzhaunai runauna causanamanda ricuchica. Cunalla ñuca tapurishcaunara cutipashcara tupacani. Shinajpi ¿pita cai profeciagunara quillcaca? ¿Pita yachacami ima sirtu shamuj punzhaunai pasangaraushcara? ¿Cai ricuchica sirtu Dios tiashcara?

Mandy ricsichihuaca Horst, Angelika shu casarashca Jehovahuaj testigoguna, paiguna yanapanuca Bibliara mas ali intindingahua. Uctalla intindicani Jehovahuaj testigoguna, cai religionmanda organizacionlla Diospa shutira utilizan shinallara shujcunara ricsichinmi (Salmo 83:18; Mateo 6:9). Yachaucani Jehová Dios munanmi tucui runauna cai Allpai shu paraíso tucujpi huiñaigama causanuchu. Salmo 37:9 nin: “Jehovapi chapaujcunaga cai allpara apinungami”. Ashcara gustahuaca yachangaj tucui runauna casna cuinta causana ushashcara Jehová Dios mandashcaunara casujpi.

Mana ahuallachu aca turcaringahua, Biblia rimashca cuinta causangahuas. Ñuca musicara tucasha pintasha alimi riushca, shujcunamanda mas yali ashcara sinticani chiraigu mansu shungu charingaj yachana acani. Astaumbas ñuca manali causaira saquinaras shinzhi aca. Jehová Diosta ashcara pagarachuni chapaisiqui shungu, intindij, llaquij Dios ashcamanda Biblia mandashcaunara pactachingaj ursarijcunahua.

Cai comunismo, Dios mana tiashcara yachachishcai dieciocho huatagama chita quiricani shinajpi chi hurasmanda Biblia ñuca iyaira turcachisha riushcara. Ñuca yachaushcara ashcara yanapaca ñuca causaibi astaumbas ña mana turbarini shamuj punzhaunamanda. 1993 huatai bautisaricani Jehovahuaj testigo cuinta shinallara huata 2000 Tabitha huarmihua casaracani shu cushi Diosta sirvij huarmi. Ishquindipura tucui ñucanchi ushashca timpura utilizanchi Bibliamanda runaunara yachachingahua. Ñuca cuinta ashca runauna cai comunismo, Dios mana tiashcara yachachishcai quirij anuca. Ashca cushi sintirini runaunara Jehová Diosta ricsinuchu yanapashcamanda.

Jehovahuaj testigogunahua tandaringaj callarisha ñuca yayauna manzharinuca. Shinajpi timpu pasashca huasha ricunuca imasna ñuca causaibi yanapashcara. Cuna cushi sintirini ñuca yayauna Bibliara estudiashcamanda, Jehovahuaj testigoguna tandarinama shamushcamanda.

Tabitha ñucahuas ursarinchi casarashcaunaj Biblia camachishcaunara casungaj chi ashca cushi sintichin. Shu ejemplo churasha, cai mandashca shujhua ama tacarinamanda casusha ñucanchi casarashca ucui shinzhiyachisha catiun (Hebreos 13:4).

Ña mana turbarishca ani causaimanda shamuj punzhaunamandas. Cuna Jehovahuaj testigoguna intiru mundui aillu partimi ani ganaslla pariju causanchi, cai aillui tucuiguna parijumi anchi. Cai tunu causaira tucui huras mascacani, quiricani.