IMATAM BIBLIA NIN
Maqanakuymanta
Runakunapa kawsakuyninpiqa maqanakuywan wañuchinakuyllañam astawan qawakun. ¿Wiñaypaqchu chaynalla kanqa?
¿Imaynatam Dios qawan maqanakuyta?
¿IMATAM RUNAKUNA NINKU?
Pipas mana allinta ruwawaptinchikqa manam imananchu mana allinwan kutichiptinchikqa. Kaynatam achka runakuna hinaspa Diospi iñiq wakin runakunapas piensanku. Chaymantapas millonnintin runakunam kusikunku maqanakuytawan wañuchinakuyta televisionpi qawaspanku.
¿IMATAM BIBLIA NIN?
Irak nacionpa norte lawninpim tarikun Mosul llaqta, chay llaqtapa hichpanpim ñawpa Ninive llaqtapa raqayllanña tiyachkan. Chay llaqta manaraq purmachisqa kachkaptinmi Diosmanta willakuq runa nirqa: “[Diosmi] purmarachinqa Ninive llaqtatapas”, nispa (Sofonias 2:13). Ninive llaqtaqa “runa wañuchiq” llaqtawanmi sutichasqa karqa, chaymi Diosqa castigarqa huk llaqtakunapas mana qatipakunankupaq (Nahum 1:1; 3:1, 6). Ninive llaqta purmachisqa kasqanmi qawachiwanchik maqanakuytawan wañuchinakuytaqa Dios chiqnisqanta (Salmo 5:6).
Diablom qallarichirqa maqanakuytawan wañuchinakuytaqa. Chaymi Jesucristopas diablota suticharqa runa wañuchiq nispa (Juan 8:44). Bibliaqa nintaqmi: ‘Kay pachapi kaqkunaqa diablopa makinpiñam’, nispa (1 Juan 5:19, CQ12). Chayraykum kay tiempopiqa achkallaña runakuna allinpaq hapinku maqanakuytawan wañuchinakuyta. Diospa amistadnin kayta munaspaqa, maqanakuytawan wañuchinakuytam chiqninanchik. * ¿Atichwanchu chay ruwayta?
‘[Jehova Diosqa] chiqninmi [...] daño ruwaqkunataqa’ (Salmo 11:5).
¿Atinmanchu runaqa chayna mañan saqiyta?
¿IMATAM RUNAKUNA NINKU?
Runakunaqa nacesqanchikmantapacham mana allin ruwaq kanchik, chayna kasqanchiktaqa manam cambiayta atipachwanchu.
¿IMATAM BIBLIA NIN?
“Kunanqa manañam kanaykichikchu: Rabiakuqqa, piñakuqqa, mana allin ruwaqqa, runa insultaqqa nitaq qacha simiqa [...]. Saqiychikyá ñawpa vidaykichikta hinaspa tukuy mana allin ruwasqaykichikta, hinaspayá musuq runaña kaychik”, nispa (Colosenses 3:8-10, NM). ¿Mana atinatachu mañawanchik? Manam. Llapanchikmi cambiaytaqa atichwan. * ¿Imaynata?
Puntataqa Jehova Diostam allinta riqsinanchik (Colosenses 3:10). Llampu sunqu runakunaqa Diospa sumaq kayninkunata hinaspa kamachikuyninkuna allinninpaq kasqanta yacharuspankum Diosta chaylla kuyayta qallaykunqaku hinaspapas kallpanchakunqakum kawsakuyninpi allinkunata ruwaspa Diosta kusichinankupaqpas (1 Juan 5:3).
Chaymantapas amistadninchiktam allinta akllananchik. Bibliam niwanchik: ‘Ama amigo kaychu chaylla piñakuq runawanqa. Ama puriychu chaylla rabiakuq runawanqa. Mana allin vidantam yacharuwaq’, nispa (Proverbios 22:24, 25).
Chaymantapas maqanakuytawan wañuchinakuytam chiqninanchik, mana allin maña kasqanrayku. Chayna mana allin ruwaykunawan atipachikuq runaqa mana controlakuq kasqantam qawachikun. Anaq piñakuq runam ichaqa controlakuq kasqanta qawachin. Chaymi bibliapi nin: “Kallpasapa soldadomanta aswan allinqa anaq piñakuq runam”, nispa (Proverbios 16:32).
“Llapallanwanyá hawkalla kawsaychik” (Hebreos 12:14, CQ12).
¿Haykapipas tukunqachu maqanakuyqa?
¿IMATAM RUNAKUNA NINKU?
Maqanakuywan wañuchinakuyqa runakuna qallarisqanmantapacham karqa, manamá haykapipas tukunqachu.
¿IMATAM BIBLIA NIN?
‘Mana allin ruwaqkunaqa chayllam chinkarunqaku [...]. Llampu sunquyuqkunam ichaqa herenciankupaq allpata chaskinqaku, paykunaqa kusikuywanmi hawkayaypi kawsanqaku’, nispa (Salmo 37:10, 11, CQ12). Llampu sunqu runakunatawan hawka kawsakuq runakunata waqaychananpaqmi maqakuqkunatawan runamasinta wañuchik runakunataqa Ninive llaqtayuq runakunata hina chinkachinqa. Wiñaypaq chinkachisqa kaptinkum kay allpapi hawkayayqa wiñaypaq kanqa (Salmo 72:7).
‘Llampu sunquyuqkunaqa [...] herenciapaqmi kay pachata chaskinqa.’ (Mateo 5:5)
Chaymi Jehova Diospa amistadninta kunanmanta maskananchik hinaspapas llampu sunqu kaytam yachananchik. Bibliam 2 Pedro 3:9 nin. ‘Jehova Diosqa [...] pacienciawanmi suyasuchkankichik mayqannikichikpas mana chinkarunaykichikta munaspan, payqa munachkan huchamanta wanakuspaykichik payman llapallaykichik kutirikunaykichiktam’, nispa.
“Paykunaqa espadankutapas rejakunamanñam tikrarunqaku. Paykunaqa lanzankutapas rutunakunamanñam tikrarunqaku” (Isaias 2:4).
^ par. 7 Diosqa ñawpaq tiempopim saqirqa Israel llaqtan huk llaqtakunawan peleananta, pelearqakuqa llaqtanman yaykuspanku allpanta qichuyta munaptillankum (2 Cronicas 20:15, 17). Kunanqa Israel nacionqa manañam Diospa llaqtanñachu, kay tiempopi Diospa llaqtanqa enteron pachamantam kanku chaymi paykunaqa manaña piwanpas peleanankuñachu.
^ par. 11 Willakuq qillqapim tarinki “Bibliam imayna kawsasqanta cambiarqa” niq yachachikuyta. Chaypim willakum ñawpaq tiempopi mana allin ruwasqankuta runakuna cambianankupaq biblia imayna yanapasqanmanta.
Kaykunatapas leeykuy
¡RIKCHARIY!
Familiapi maqanakuyqa tukunqam
Bibliapa yachachikuyninkunaqa maqakuq runatam manaña maqakuq kananpaq yanapan.
WILLAKUQ
Armayta apakuykuspam maymanpas riq kani
Annunziato Lugarà sutiyoq runaqa llumpay manchakuypaq pandillerom karqa, llumpay maqakuq pandillero suwan karqa, ichaqa vidanmi cambiarurqa Jehová Diospa Testigonkunapaq Huñunakunanku Salonman risqanwan.
WILLAKUQ
¿Imataq yanapawachwan manaña chiqninakunapaq? Dioswanyá yanapachikusun
Diosqa atiyninwanmi yanapawasun chiqnikuq kayta saqinapaq.
