Pitapas astawan riqsiyta munaspanchikqa kallpanchakunanchikmi imakuna ruwasqanta yachananchikpaq. Chaynallataqmi Jehova Diosta astawan riqsiyta munaspaqa yachananchikmi imakuna ruwasqanmanta. Chaykunamanta yachayqa yanapawasunmi paymanta yachananchikpaq.

Bibliam nin: ‘Diospa imayna kasqanqa sutillam qawakun runakuna unanchasqa kasqanmantapacha, chayqariki qawakun tukuy ima unanchasqa kaqkunapim’, nispa (Romanos 1:20). Arí, “Diosmi kay pachata atiyninwan ruwarqa, kay pachapi kaqkunatam yachayninwan takyachirqa, cielokunatapas ancha yachayninwanmi mastarirqa” (Jeremias 10:12). Tukuy ima unanchasqankunam kuyawasqanchikta qawachiwanchik.

Jehova Diosqa payman rikchakuqtam runakunataqa unanchawarqanchik (Genesis 1:27). Chaynata unanchawasqanchikraykum runakunaqa kuyapayakuq hinaspa llakipayakuq kayta atinchik. Atinchiktaqmi paypa yachachiwasqanchikta chaynataq imakuna kamachiwasqanchikta yachaytapas. Niwasqanchikkunata kasukuspaqa atisunmi kusisqa kawsakuyta, atisuntaqmi Dioswan kuyachikuytapas.

Jehova Diosqa kuyakuywanmi allpa pachanchikta ruwapuwarqanchik. Apostol Pablom Diosmanta kaynata nirqa: “Allinkunata ruwaspam riqsichikurqa pim kasqanta: Qamkunapaq parachimuspan hinaspa tiempollanpi chakrakunata ruruchispan, chaynapim mikunaykichikpas chaninninpi kachkan hinaspa sunquykichikpas kusisqallaña kachkan”, nispa (Hechos 14:17). Jehova Diosqa allpa pachapim tukuy imata unanchapuwarqanchik kusisqa kawsakunanchikpaq. Tukuy chaykunam qawachiwanchik hamuq tiempopiqa imayna kawsakunanchikmanta.

Jehova Diosqa allpa pachatam unancharqa chaypi wiñaypaq kawsakunanchikpaq. Bibliapim  niwanchik kay pachataqa runakunaman Dios qusqanmanta. Arí, manam yanqapaqchu allpa pachataqa unancharqa aswanqa runakuna chaypi kawsakunanchikpaqmi (Salmo 115:16; Isaias 45:18). ¿Imayna runakunataq allpa pachapiqa kawsananku karqa? Bibliam nin: “Allin ruwaq runakunam herenciankupaq allpata chaskinqaku, paykunaqa wiñaypaqmi chaypi kawsakunqaku”, nispa (Salmo 37:29).

Kay allpa pachapi llamkaspanku sumaqyachinankupaqmi Jehova Diosqa Adantawan Evata unancharqa (Genesis 2:8, 15). Diosmi paykunata kamachirqa: “Anchata miraspa kay pachaman huntaychik”, nispa (Genesis 1:28). Adanwan Evaqa wiñaypaqmi kusisqa kawsakunmanku karqa. Ichaqa Jehova Diosta qipancharusqankuraykum wañururqaku. Chaywanpas Jehova Diosqa hinallam munachkan runakuna kay allpapi wiñaypaq kawsakunanchikta.

¿Imapaqmi Jehova Diosqa palabranta qillqachirqa? Qillqachirqaqa paymanta yachananchikpaqmi (Proverbios 2:1-5). Ichaqa manam qallariyninmanta tukupayninkama tukuy ima ruwasqankunamantachu bibliaqa willawanchik (Eclesiastes 3:11). Chaywanpas yanapawanchikmi Diosmanta yachananchikpaq. Niwanchikmi Diosqa imayna sunquyuq kasqanmanta, chaynataq imayna sunquyuq runakunata chaskiykusqanmantapas (Salmo 15:1-5). Bibliaqa yachachiwanchiktaqmi Diosqa imayna yupaychananchikta munasqanmanta, huchapakuyta imayna qawasqanmanta chaynataq qullqilla kuyaqkunata imayna qawasqanmantapas. Bibliaqa willawanchiktaqmi Jesusmantapas, paymanta yachaspaqa Jehova Diosmantam astawan yachasunchik (Juan 14:9).

Bibliaqa yanapawanchiktaqmi kusisqa kawsakunanchikpaqpas. Yachachiwanchikmi ayllunchikwan imaynata hawkalla kawsakunapaq chaynataq sasachakuykunata imaynata atipanapaqpas. Willawanchiktaqmi imanasqa sasachakuykuna kasqanmanta, hamuq tiempopi imayna kawsakunanchikmanta chaynataq Diospa munaynin imayna ruwakunanmantapas.

Bibliaqa Jehova Diospa yuyay qusqanwanmi qillqasqa kachkan. 40 runakuna yaqa 1.600 watakunapi bibliata qillqaspankupas Diosmantam imam kaqta qillqarqaku (2 Timoteo 3:16). Bibliata qillqasqankumanta una-unay watakunaña pasaruptinpas yachachikuyninkunaqa hina kaqllam. Wakin runakunam biblia chinkachiyta munaspanku michakurqaku runakunapa biblianku kapunanta. Chaywanpas kunan tiempopiqa enteron pachapim bibliaqa tukuy rimaykunapi kachkan. Biblia kapuwasqanchikmi qawachiwanchik Diospa palabranqa ‘wiña-wiñaypaq takyananmanta’ (Isaias 40:8).

Qallariypiqa Diosqa munarqam lliw runakuna kay allpa pachapi wiña-wiñaypaq kawsakunankuta. Ichaqa punta tayta-mamanchik Adanwan Evam Diosta qipancharusqankurayku wiñay kawsakuytaqa manaña atirqakuchu nitaq wawa-churinkupas. Bibliam nin: “Chullalla runapa huchanwanmi lliw runakuna huchayuq rikurirurqa, huchawantaqmi wañuypas rikurirurqa. Chaynapim wañuyqa lliw runakunaman mirarurqa lliw huchallikurusqankurayku”, nispa (Romanos 5:12). Ichaqa ¿imatam Diosqa ruwarqa runakuna wiñaypaq kawsakunankupaq?

Adanwan Evaqa huchallikurusqankuraykum manaña Diospa kuyakuyninpiñachu karqaku hinaspa machu-payayaruspanku wañurqaku. Ichaqa Diosqa kuyakuqllaña hinaspa yachayniyuq kasqanraykum runakuna wiñaypaq kawsakunankupaq tukuyta tantiarqa (Genesis 3:15). Diosqa tantiarqam kay pachaman Jesus hamunanpaq chaynapi huchamantawan wañuymanta librawananchikpaq.

Arí, Jehova Diosqa churin Jesustam kay pachaman kachamurqa, chaynapi imaynata salvakunankupaq runakunaman yachachinanpaq  hinaspa ‘vidanta quspan achka runakunata librananpaq’ a (Mateo 20:28; Juan 14:6). Adanqa manam Diostaqa kasukurqachu, Jesusmi ichaqa wañukunankama Diosta kasukurqa chaymi huchamantawan wañuymanta librawarqanchik. Mana huchanmantam Jesusqa wañukurqa, chaymi Jehova Diosqa kawsarichispan hanaq pachaman kutinanpaq saqirqa. Jesuspa wañukusqanmi Diosta kasukuq runakunata yanapawanchik wiñaypaq kawsananchikpaq. Bibliam nin: “Imaynam chullalla runapa mana kasukusqanwan achkallaña runakuna huchayuq rikurirurqaku, chaynallataqmi chulla runallapa kasukusqanwan achkallaña runakuna mana huchayuqña rikurinqaku”, nispa (Romanos 5:19). Arí, Jesuspa wañukusqanwanmi wiñaypaq kawsakuyta atisunchik. Chaytam Jehova Diosqa qallariymantapacha munarqa.

Wiñay kawsayta haypananchikpaq Jehova Dios tukuyta ruwasqanmanta yachasqanchikmi yanapawanchik paymanta astawan yachananchikpaq. Yachachiwanchikmi Diospa nisqankunaqa mana yanqapaq kasqanmanta (Isaias 55:11). Qawachiwanchiktaqmi anchata kuyawasqanchiktapas. Bibliam nin: “Diosninchikmi sapallan churinta kay pachaman kachamurqa churinrayku kawsakuyniyuq kananchikpaq, chaynatam Diosninchikqa kuyawasqanchikta qawachiwarqanchik. Kuyakuyqa kaymi: Manam ñuqanchikchu Diostaqa kuyarqanchik, aswanqa paymi ñuqanchikta kuyawaspanchik sapallan churinta kachamurqa huchanchikrayku wañunanpaq, chaynapi Dioswan allinyanachiwananchikpaq”, nispa (1 Juan 4:9, 10).

Jehova Diosqa kuyasqan churintam ñuqanchikrayku wañunanpaq kay pachaman kachamurqa, chaymi qawachiwanchik tukuy imakunatapas quykuwananchikmanta (Romanos 8:32). ¿Imakunatam Diosqa hamuq tiempopi quwasunchik?