Bibliam imayna kawsasqanta cambiarqa

¿Imatataq ruwarqa rastafari religionniyuq runa vidanta cambiananpaq hinaspa yuraq kasta runakunata manaña chiqninanpaq? ¿Imatataq ruwarqa huk musu droga rantikuyta hinaspa maqakuq kayta saqinanpaq? Paykunapa willakusqantayá yachaykusunchik.

“Chiqnikuq kaytam saqirqani” (HAFENI NGHAMA)

WATAN: 34

NACIONNINMI: ZAMBIA

HUK WILLAKUYKUNA: MANAÑAM RASTAFARI RELIGIONNIYUQÑACHU

ÑAWPAQ VIDAY: Namibia nacionpi guerra kasqanraykum mamayqa ripukurqa Africa nacionman. Chaypim hukllawakururqa gobiernopa contranpi hatariq runakunaman. Mamayqa guerramanta ayqikuq runakunawanmi Zambia nacionpiña yacharqa, chaypim ñuqa nacerqani.

Organizacion del pueblo de Africa del suroeste nisqanpim chunka pichqayuq wata karqani. Chaypiqa achka musukunatam politicamanta yachachiqku, yachachiqtaqmi yuraq kasta runakunata chiqninankupaqpas.

Chunka hukniyuq wataypi kachkaspaymi cristiano kayta munarqani. Chaymi iglesiapi pastorman rirqani, chaymanqa hamuqku catolico, luterano hinaspa anglicano religionniyuqkunam. Chaypi pastorqa manam chaskiwarqachu, chaywan hukmanyaruspaymi manaña Diospi creerqanichu. Chunka pichqayuq wataypi kachkaspaymi rastafari sutiyuq religionman hukllawakururqani. Chay religionmanqa yaykurqani reggae sutiyuq taki gustawasqanraykum chaynataq Africa nacionpi yana kasta runakunata yanapanayraykum. Rastafari runakuna hinam ñuqapas chukchayta wiñarachispay sinpakuq kani hinaspa marihuanata pitaq kani hinaspapas verdurallataña mikuq kani. Hinallamá ñawpaq vidaypi hina fiestakunapi purirqani, mana allinkunata rimarqani chaynataq maqanakuymanta peliculakunata qawaq kani.

VIDAY CAMBIANAYPAQMI BIBLIA YANAPAWARQA: 1995 watapim 20 watayuq kachkaspay piensarqani vidaywan ima ruwanaypaq. Chaykamam rastafari religionpa qillqankunata leerqani, chay qillqakunapiqa bibliamantapas rimaqmi, ichaqa manam yanapawarqachu, chaymi tantiarurqani kikiymantaña estudianaypaq.

Rastafari kaq amigoymi quykuwarqa Jehova Diospa testigonkunapa qillqanta. Chayllam chay qillqapi textokunata bibliawan tupachispa leerqani. Tiempopa risqanman hinam Jehova Diospa testigonkunawanña bibliata estudiaspa astawan yacharqani. Paykunawan manaraq bibliata estudiachkaspaymi qallaykurqani viday cambiayta.

Sasamá karqa pitayta hinaspa sinkakuyta saqiyniyqa (2 Corintios 7:1). Allintañam pachakurqani, chukchaytapas ruturachikurqanim, maqanakuymanta peliculakunata chaynataq qalalla kaqkunatapas manañam qawarqanichu hinaspapas qacha rimaykunataqa manañam rimarqanichu (Efesios 5:3, 4). Tiempopa risqanman hinam yuraq kasta runakunatapas manaña chiqnirqanichu (Hechos 10:34, 35). Chaykunata saqinaypaqqa mana allin amistadkunamantam karunchakururqani hinaspapas mana allin takikunatam manaña uyarirqanichu, chaynapi chay mana allinkunaman mana wichiykunaypaq.

Mana allinkunata saqiruspayñam Jehova Diospa testigonkunapa huñunakunanku wasita maskarqani. Chayñam bibliata estudiayta qallaykurqani hinaspa bautizakururqani. Chay ruwasqayqa manamá familiaykunataqa gustarqachu, mamaypas niwarqam: “Mayqan religionmanpas yaykuwaqmi ichaqa ama testigokunamanqa”, nispan. Chaypaq tantiakusqaymantaqa mamaypa familianpas anchatam piñakuq.

Familiay burlakuwaptinpas hinaspa piñakuchkaptinpas hinallam kallpanchakurqani yachasqaykunata kasukunaypaq, chaypaqqa yanapawarqa Jesusmanta yachasqaykunam. Chaymantapas manam iskayrayarqanichu Jehova Diospa testigonkuna chiqap religion kasqanmantaqa. Paykunapa yachachisqankuqa bibliapa nisqanwanmi tupan hinaspapas bibliapa nisqantam kasukunku, chaynataq runamasinkunamanpas willakunku (Mateo 28:19, 20; Hechos 15:14). Manataqmi politicapiqa chaqrukunkuchu (Salmos 146:3, 4; Juan 15:17, 18).

BENDICIONKUNA CHASKISQAYMANTA: Bibliapa nisqankunata kasukuyqa anchatam yanapawarqa. Kunanqa manañam marihuanataqa pitaniñachu, chayta rantispayqa sapa killam achka qullqita gastarqani, chaykunata saqisqayraykum kunanqa sanoña kani.

Warma kasqaymantapacham hawka hinaspa kusisqa kawsakuyta munarqani. Kunanqa Jehova Diosman asuykusqayraykum kusisqa hinaspa hawka kawsakuni (Santiago 4:8).

“Piñakuq runa kasqaytam saqirurqani” (MARTINO PEDRETTI)

WATAN: 43

NACIONNINMI: AUSTRALIA

HUK WILLAKUYKUNA: MANAÑAM DROGATAQA RANTIKUNCHU NITAQ RUNATAPAS WAÑUCHINCHU

ÑAWPAQ VIDAY: Warma kasqaymantam familiaywan achka llaqtachakunapi yacharqaniku, wakinpiqa hatun llaqtakunapim yacharqaniku. Chay tiempoqa sumaqmi karqa primoykunawan hinaspa tioykunawan kasqayrayku, paykunawanmi challwakunata hapirqaniku, pichinkuchakunatapas hapirqaniku hinaspa tukuy imata ruwarqaniku.

Taksaymantam piñakuq runa karqani, papaymi takanakuypi peleaq runa karqa, paymi ñuqatapas yachachiwarqa. Musuña kaspayqa amistadniykunawanmi trago tomaypi hinaspa peleaypi puriq kaniku. Peleaqqa kaniku navajakunawanmi hinaspa kaspikunawanmi gruponpi kaq achka runakunawan.

Qullqiyuq kanaypaqmi rantikuq kani drogata chaynataq suwasqa kaqkunata. Chaymantapas droga rantikuqkunapa debeqninkunatam cobraq kani, cobrarqaniqa armawan manchachispaymi. Ñuqaqa niqmi kani: “Mana wañuchiwanankupaqqa wañuchinaymi” nispay. Arí, asesino kaytamá munarqani.

VIDAY CAMBIANAYPAQMI BIBLIA YANAPAWARQA: Warma kaspaymi Jehova Diospa testigonkunamanta rimasqankuta uyarirqani. Ichaqa iskay chunka wataypi kachkaspayñam mamayta tapukurqani paykunamanta. Chay tapukusqaymanta iskay punchaw pasaruptillanmi huk testigo punkuyta takaykamurqa, paypa sutinmi karqa Dixon. Paywanqa unaymi parlarqaniku, chaypim invitawarqa huñunakuyninkuman rinaypaq, chaymá rirqani. Chaymantapacham iskay chunka wataña mana faltakunichu huñunakuyman riytaqa. Gustawarqam sapa tapukusqaykunata bibliawan yanapawasqanku.

Yachachiwarqakum Jehova Diosqa lliw runakunata kuyasqanmanta (2 Pedro 3:9). Yacharurqanitaqmi aylluykuna saqiruwaptinpas Diosninchikqa mana saqiwananmanta. Anchatataqmi kallpanchawarqa huchaykunamanta wanakuptiy Jehova Dios pampachawananmanta yachasqaypas, bibliapimá leerqani Efesios 4:22-24. Chaypi nisqanmi sunquyman chayarqa, chaypim nin: “Ñawpa vidaykichiktayá saqiychik [...] musuq pachawan pachakuchkaq hina musuq runaña kaychik, chayna kawsakuyqa kachkan Diospa munayninman hinam”, nispa.

Ñawpaq vidayta saqiyqa ancha sasam karqa. Atirqanim achka punchawkuna drogata mana mallispa kaytaqa, ichaqa semana tukuyta amistadniykunawan tuparuspaymi kaqmanta mana allinkunaman wichiykuq kani. Cuentatam qukurqani hinalla amistadniykunawan kaspayqa ñawpaq vidayta mana saqiy atinaymanta, chaymi mana allin amistadniykunamanta karunchakururqani hinaspa huklaw llaqtaman ripukurqani chaypi yachanaypaq. Viajepim wakin amistadniykuna riysiwarqaku, chaypim marihuanata munachiwarqaku ichaqa manañam munarqanichu chaskiyta. Paykunatam nirqani chay viciokunata saqinaypaq tantiakusqayta. Paykunaqa huk sitiokamallam riysiwarqaku, chaymantam kutikurqaku. Chaymanta qipamanmi yacharurqani chay amistadniykuna escopetawan banco suwasqankuta.

BENDICIONKUNA CHASKISQAYMANTA: Mana allin amistadniykunata saqisqaymi yanapawarqa vidayta cambianaypaq. 1989 watapim bautizakururqani. Chaymantam paniywan tayta-mamaypas bautizakururqaku.

Kunanqa kusisqañam kawsakuni, chunka qanchisniyuq watañam casarasqa kachkani, warmaykunapas kimsam. Chaymantapas kunanqa pipas imataña niwaptinpas manañam piñakuniñachu. Lliw runakunatam kunanqa kuyani ima kastayuq, ima rimayniyuq hinaspa maymantaña kaptinkupas (Apocalipsis 7:9). Yuyanim Jesuspa nisqankuna imayna yanapawasqanta, paymi kaynata nirqa: “Rimasqaykunata hinalla kasukuspaykichikqa chiqaptapunim qatiqniykuna kankichik, hinaspam chiqapmanta yachankichik hinaptinmi chay chiqap yachasqaykichik librasunkichik”, nispa (Juan 8:31, 32).

[Recuadro]

Vidayta cambianaypaqqa mana allin takikunatam manaña uyarirqanichu.

[Recuadro]

Amistadniykunawanmi trago tomaypi hinaspa peleaypi puriq kaniku. Peleaqqa kaniku navajakunawanmi hinaspa kaspikunawanmi gruponpi kaq achka runakunawan.