Bibliam imayna kawsasqanta cambiarqa

¿IMATAQ yanaparqa apuestaq chaynataq suwa runata vidanta cambiananpaq? Chaytam willawanchik Richard Stewart.

“Caballowan kallpaptinkum mayqan ganananpaq apuestaq kani” (RICHARD STEWART)

NACESQAN WATA: 1965

NACIONNINMI: JAMAICA

HUK WILLAKUYKUNA: APUESTAQ CHAYNATAQ SUWA RUNA

ÑAWPAQ VIDAY: Nacerqanim Kingston sutiyuq llaqtapi, chaypiqa achka runakunam yachanku, llamkapakuy mana ancha kaptinmi suwa runakuna achka kaqku. Paykunaraykum chaypi runakunaqa mancharisqallaña kaqku. Sapa punchawmi balakunapa tuqyasqan uyarikuq.

Mamayqa ñuqatawan sullkaykunata uywawanankupaqmi anchata llamkaq, munarqataqmi escuelaman rinaykutapas. Ñuqataqa manam gustawaqchu escuelaman riyqa, chaymi escuelaman rinaymantaqa caballowan kallpasqanku sitioman riq kani apuestanaypaq. Wakinpiqa ñuqapas chaypi caballokunamanmi sillakuq kani.

Wiñasqaymam hinam apuestayllamanña qukururqani, chaymantapas achka warmikunawanmi kakuq kani hinaspaypas drogakuqmi kani. Chaypaq qullqita necesitaspaymi armakunata rantirurqani chaywan runata manchachispay suwakunaypaq. Suwasqay runakunataqa manam mayqintapas wañurachirqanichu.

Chayna kachkaptiymi policiakuna hapiruwaspan carcelman aparuwarqa. Carcelmanta lluqsiramuspayqa astawanraqmi mana allin runa karqani, chaylla piñakuq, mana kasukuq, kikillaypi piensaq.

BIBLIAM VIDAYTA CAMBIARURQA: Chayna kachkaptiymi mamay Jehova Diospa testigonkunawan bibliata estudiayta qallaykuspan testigoña karqa. Mamaypa kuyakuq, llampu sunqu kasqanta qawaspaymi ñuqapas Jehova Diospa testigonkunawan bibliata estudiayta qallaykurqani.

Cuentatam qukururqani Jehova Diospa testigonkunaqa imamantapas bibliapa nisqanman hina yachachisqankuta. Paykunallataqmi wasin-wasin rispanku Diosmantapas willakuqku Jesuspa tiemponpi Diosta serviqkuna hina (Mateo 28:19; Hechos 20:20). Chaymantapas qawarqanitaqmi wawqi-panintin hina kuyanakusqankuta, chaywanqa manañam iskayrayarqanichu paykunalla Diosta yupaychaq kasqankumantaqa (Juan 13:35).

Bibliata estudiasqayman hinam cuentata qukururqani huchapakuqtaqa Jehova Dios millakusqanmanta. Ñuqaqa payta kusichiyta munasqayraykum mana allin vidayta saqinay karqa (2 Corintios 7:1; Hebreos 13:4). Chaymantapas yacharurqanim allinta ruwaspanchikqa Jehova Diosta kusichisqanchikmanta. Mana allinta ruwaspanchikñataq llakichisqanchikmanta (Proverbios 27:11). Chaymi tantiakururqani manaña drogakunaypaq hinaspa armakunatapas saqinaypaq. Tantiakururqanitaqmi allin runaña kanaypaqpas. Chaywanpas sasachakurqanim warmikunawan kakuyta saqinaypaq hinaspa apuestaq kasqayta saqinaypaq.

Qallariypiqa manam munarqanichu Jehova Diospa testigonkunawan estudiasqayta amistadniykunaman willaytaqa, ichaqa yuyarirurqanim Jesuspa kayna nisqanta: “Runakunapa qayllanpi negawaqniytaqa ñuqapas negasaqmi hanaq pacha taytaypa qayllanpi” (Mateo 10:33). Chaymi kallpanchawarqa bibliata estudiasqayta amistadniykunaman willanaypaq. Paykunaqa manam creewarqakuchu mana allin runa kasqayta cambianaymantaqa, ichaqa nirqanim cambianaypaq tantiakusqaymanta.

IMAKUNAPIM YANAPAWARQA: Mamayqa anchatam kusikurqa bibliapa nisqanta kasukuspay allinña kawsakusqaywan. Manataqmi mana allin ruwasqaykunawanqa llakichirqaniñachu. Kunanqa mamaywan kuskam kusisqa Diosmanta willakuniku. Ñawpa vidayta yuyarispaymi Jehova Diosta anchata agradecekuni cambianaypaq yanapaykuwasqanmanta. Kunanqa kusisqam hinaspa hawkam kawsakuni.

Ñawpa vidayta yuyarispaymi piensani: “Kunanqa ichapas carcelpi kachkayman utaq wañusqaña”, nispay. Ichaqa kunanqa kusisqam warmichaywan hinaspa churiywan kuska Jehova Diosta servichkaniku. Anchatam agradecekuni Jehova Diospa testigonkuna Diosmanta yachaykachiwasqankumanta. Chaymi ñuqapas pimanpas hinaspa maypipas Jehova Diosmanta willakuni. Jehova Diostam anchata agradecekuni payllata yupaychanaypaq llaqtanman pusamuwasqanmanta.

[Willakuy]

“Yacharurqanim allinta ruwaspanchikqa Jehova Diosta kusichisqanchikmanta. Mana allinta ruwaspanchikñataq llakichisqanchikmanta”

[Willakuy]

Warmichaypiwan hinaspa churiypiwan

[Willakuy]

Mamaypa kuyakuq, llampu sunqu kasqanta qawaspaymi ñuqapas bibliata estudiayta qallaykurqani