Bibliaq yanapayninwan cambianku

¿IMAN kallpacharqan juj runata juch’uychanmantapacha yachachisqanku religionman kutinpunanpaq? ¿Imaynatan juj wayna tarirqan juj taytata? Chaytan paykunapuni willawasunchis.

“Jehová Diosmanmi kutinpuyta munarqani” (ELIE KHALIL willakun)

NACESQAN WATA: 1976

NACIÓN: CHIPRE

CHINKASQA CHURI JINA TARIKURQAN

ÑAUPAQPI KAUSASQAY: Chipre nacionpin nacerqani, Australiapitaq wiñarqani. Tayta-mamayqa Jehová Diospa testigonkunan karqanku, paykunaqa anchatan kallpachakurqanku yachachiwanankupaq, Diostapas, Simintapas munakunaypaq. Ichaqa, adolescenciaypi kashaqtiymi tayta-mamayta mana kasukuyta munarqaniñachu. Wasiymantan tutakunapi escapakuq kani, wiñaymasiy amigoykunapiwan kuskataq carrokunata suwakuq kani, chayraykun sapa kutillan problemakunapi tarikurqani.

Qallariypiqa pakallapin tukuyta ruwaq kani tayta-mamayta mana phiñachinayrayku, pisi-pisimantan ichaqa manaña paykunata manchakurqaniñachu. Amigoykunaqa noqamanta aswan kuraqmi karqanku manan paykunaqa Jehová Diosta munakurqankuchu. Chaymi mana allinkunata ruwanaypaq mat’ipayawaqku. Chayraykun juj kutin tayta-mamayta nirqani: “Manañan imatapas yachayta munaniñachu iñisqaykichismanta”, nispa. Paykuna pacienciawanña yanapawanankupaq kallpachakurqanku chaypas, manapunin munarqanichu yanapawanankuta. Maytapunin sonqonkuta k’irirqani.

Wasiymantan ripurqani chay qhepamantaq droga negocioman jaykurqani. Tarpurqani imaraqmi marihuana drogata chaymantataq askhanpi venderqani. Millay kausaymanmi jaykurqani juj-juj warmikunawanmi puñuq kani, chaymantapas discotecakunallapiñan kaq kani. Jinaspapas nishu k’araq sonqomanmi tukupurqani. Pipas mana gustawasqayta imatapas niqtinku otaq imatapas ruwaqtinkuqa, nishutapunin phiñakuq kani. Chaymi k’amirqapuq otaq maqarqapuq kani chay runakunata. Juj cristianoq mana ruwanantapunin ruwaq kani.

BIBLIAQ YANAPAYNINWAN CAMBIAPUNI: Juj drogakuq runawanmi amigontin karqayku paypaqa juch’uyllaraq kashaqtinsi taytan wañupusqa. Paywanmi parlaq kayku kuska tutakama. Askha kutipin niwaq maytapuni taytanta extrañasqanta. Noqaqa juch’uychaymantapachataq yacharqani kausarimpuy kananta chayqa, willaytan qallarirqani Jesús ñaupa tiempopi wañuqkunata kausarichisqanmanta, jamuq tiempopi jujmanta kausarichinpunanmantawan (Juan 5:28, 29). Niqmi kani: “¿Jujmanta taytaykita rikuyta munawaqchu? Taytaykiqa kausarinpunqan, llapanchismi kay j’allpapi sumaq paraisopi tiyasunchis”, nispa. Chay suyakuy kasqanmanta willaqtiymi amigoyqa maytapuni kusikurqan.

Juj kutikunapitaq amigoyqa tukukuy p’unchaymanta, Trinidad nisqamanta ima rimayta munaq. Jinan noqaqa Biblianpipuni rikuchiq kani askha textokunata imatas nin Jehová Diosmanta, Jesusmanta, tukukuy p’unchaymantapas chaykunata (Juan 14:28; 2 Timoteo 3:1-5). Jehová Diosmanta amigoywan astawan rimaqtiymi astawan Jehová Diospi piensaq kani.

Pisi-pisimantan juch’uychaymantapacha Bibliamanta tayta-mamaypa yachachiwasqanku jujmanta sonqoypi wiñayta qallarirqan. Chaymi mayninpiqa ima fiestapipas amigoykunawan kuska drogakushaspay qonqaylla Jehová Diospi piensaq kani. Wakin amigoykunaña Diostan munakuni niqku chaypas, ichaqa imayna kausasqankuwanmi rikuchiqku Diosta mana munakusqankuta. Manataq iskay uya kayta munarqanichu chayqa, Jehová Diosman kutinpunaypaqmi decidikurqani.

Ichaqa manan imatas ruwananchis chayta yachayllachu aswanpas ruwananchispunin imachus yachasqanchistaqa. Wakin ruwaykunataqa fácil-llatan saqepurqani. Ejemplopaq, drogakunata, mana allin amigokunatapas, Bibliata juj umalliqwan estudiaypas manan sasachu karqan noqapaqqa.

Ichaqa juj ruwaykunata saqepuymi aswan sasa karqan, chayqa karqan k’araq sonqo kayniymi. Pisi tiempollapaqmi llamp’u sonqo kaq kani chaymantataq jujmanta k’araq sonqo kayniy rijurimuq, chaymi mana valeqpaq jina qhawarikuq kani. Bibliamanta yachachiwaqniy hermanomanmi willakuq kani imayna sientekusqayta. Chay hermanoqa munakuq kayninwan, pacienciakuq kayninwan iman maytapuni kallpachawaq. Juj kutinmi niwarqan La Atalaya revistamanta juj yachachikuyta leenaypaq chaypin willarqan imaraykus mana pisikallpayanachu chaymanta. * Paywanmi t’aqwirirqayku chay yachachikuyta chaypin willarqan imakunatas ruwanay karqan amaña nishuta phiñakunaypaq chayta. Chay yachachikuyta kasukuspa Jehová Diosmanta mañakuspa iman pisi-pisimanta k’araq sonqo kayniyta saqepurqani. Jinaspa 2000 watapi, abril killapi bautizakapurqani Jehová Diospa testigon kanaypaq. Chaywanqa tayta-mamayqa anchatan kusikurqanku.

BENDICIONKUNA CHASKISQAY: Kunanqa thajmi, ch’uya concienciayoqmi tarikuni, manañan cuerpoyta qhellichaniñachu drogakunawan, qhelli ruwaykunawanpas. Kunanqa imataña ruwashaspaypas llank’ashaspaypas, juñunakuypiña kashaspaypas otaq familiaywan amigoykunawan kusirikushaspaypas aswan kusisqan sientekuni.

Jehová Diostan agradecekuni munakuq tayta-mamayoq kasqaymanta, paykunaqa manan jayk’aqpas saqerpariwarqankuchu, yanapawashallarqankun Jehová Diosman kutinpunaypaq. Chaymantapas Jesuspa kay nisqanpin piensani, chayqa qelqasqa kashan Juan 6:44 textopin, chaypin nin: “Manan pipas noqamanqa jamunmanchu manachus kachamuwaqniy Yaya pusamunman chayqa”, nispa. Jehová Diosmanqa kutinpurqani pay pusanpuwasqanraykun chaypi piensaspan maytapunin kusikuni.

“Maytan taytayoq kayta munarqani” (MARCO ANTONIO ALVAREZ SOTO willakun)

NACESQAN WATA: 1977

NACIÓN: CHILE

DEATH-METAL BANDAPI TOCARQAN

ÑAUPAQPI KAUSASQAY: Mamaymi uywawarqan Punta Arenas llaqtapi, chayqa kashan Chile nacionpa uray ladonpin. Pisqa wataypi kashaqtiymi tayta-mamayqa t’aqanakapurqanku chaymi wijch’usqa jina sientekurqani chayraykun maytapuni taytayoq kayta munarqani.

Mamaymi Jehová Diospa testigonkunawan Bibliata estudiasharqan chaymi juñunakunanku wasiman pusawaq. Noqan ichaqa mana riyta munaqchu kani, chaymi sapa kutillan waqaq kani pampaman wijch’ukuq kani mana rinayrayku. 13 wataypi kashaqtiymi manaña juñunakuykunaman ripurqaniñachu.

Chay tiempopaqqa gustawarqanñan takikunata tocay, reparakurqanin tocayta atisqaytapas. Chaymi 15 wataypi kashaqtiy heavy-metal chaymantapas death-metal takikunata tocaq kani fiestakunapi, machana wasikunapi ima. Allin musicokunawanmi juñukuq kani chaymi música clásica nisqa gustawarqan. Conservatorio local nisqapin estudiayta qallarirqani. 20 wataypi kashaqtiytaq Santiago llaqtaman ripurqani música tocayta astawan estudianaypaq. Chaymantapas tocashallarqanin heavy-metal, death-metal bandakunapipas.

Chaykunataña ruwashaspaypas manan kusisqachu sientekuq kani. Chaymi mana llakisqa sientekunaypaq bandapi tocaqmasiykunawan machaq, drogakuq ima kani paykunaqa familiay jinan karqanku. Noqaqa manan munaqchu kani pipas imatapas niwananta, chhayna kasqaymi rikukuq yana p’achawan p’achakusqaypi, sunk’ayoq kasqaypi, chujchasapa kasqaypi ima.

K’araq sonqo kasqayraykun sapa kutillan piwanpas maqanakuq kani chaymi policiawan ima apachikuq kani. Juj kutinmi drogata vendeqkuna noqata amigoykunatawan turiawarqanku. Machasqataq kasharqani chayqa maqaytan qallarirqani chay runakunata, paykunataq ichaqa astawan maqaykapuwarqanku k’akiyta imaraq p’akiwarqanku.

Ichaqa munakusqay runakunaq ruwawasqankun astawanqa nanawarqan. Juj p’unchaymi noviayta rikurqani munakusqay amigoytawan kuskata, paykunaqa unay watakunañan engañawashasqaku, chaytataq wakin amigoykuna yachashaspa pakawasqaku. Chaykuna ruwawasqankumantan maytapuni sonqoy nanawarqan.

Punta Arenas llaqtaymanmi kutipurqani chaypitaq musicata yachachispa violonchelota tocaspa ima llank’arqani. Chaymantapas grabashallarqanin musicata heavy-metal, death-metal bandakunapi. Chay tiempopiqa Sussan sutiyoq munay sipastan reqsirqani, paywanmi tiyarqayku. Tiempo pasaqtinmi Sussanqa yacharqan mamitan Trinidad nisqa yachachikuypi creesqanta, yacharqanmi noqa chaypi mana creesqaytapas. Chaymi tapuwarqan: “¿Mayqentaq cheqaqri?”, nispa. Noqaqa kutichirqanin: “Chay Trinidad nisqa yachachikuyqa pantasqan”, nispa. Manaña Bibliawan kutichiyta atirqanichu chaypas, yacharqanin pikuna chay tapuyman kutichiyta atisqankuta. Chaymi nirqani: “Jehová Diospa testigonkunan Bibliawan chay tapuyniykiman kutichisunkiku”, nispa. Jinan Jehová Diosmanta mañakurqani yanapayninta chaytaqa unay watakunañan mana ruwarqanichu.

Pisi p’unchaykuna qhepamanmi juj runata reqsisqata jinan rikurqani chaymi tapurqani Jehová Diospa testigonchus icha manachus kasqanta. Payqa imayna p’achakusqaywanqa mancharikurqanchá chaywanpas sumaq sonqowanmi willawarqan ima p’unchaykunatas juñunakunku chayta. Noqaqa seguron kasharqani chay hermanowan tupasqayqa Jehová Dios mañakusqayman kutichimuwasqanta. Chaymantataq Jehová Diospa testigonkunaq juñunakunanku wasiman rirqani jinaspa qhepallapi tiyarqani mana reparawanankupaq. Ichaqa askha hermanokunan reqsiruwarqanku wawallaraq kashaspay juñunakuykunaman risqaymanta. Chaymi sumaqta chaskiwarqanku munakuywantaq abrazaykuwarqanku jinan thaj sientekurqani. Wasiymanpas kutinpuyman jinan sientekurqani. Wawallaraq kashaqtiy Bibliamanta yachachiwaq hermanowan tupaspaymi valekurqani jujmanta Bibliamanta yachachiwananpaq.

BIBLIAQ YANAPAYNINWAN CAMBIAPUNI: Juj p’unchaymi Bibliapi Proverbios 27:11 textota leerqani, chaypin nin: “Churillay yachayniyoq kay jinaspa sonqoyta kusirichiway”, nispa. Chay leesqaypi piensaspan maytapuni admirakurqani wañuq runalla kanchis chaypas atisunmanmi kamaqninchispa sonqonta kusichiyta. Chayraqmi entienderqani tukuy kausasqay p’unchaykunapi maskhasqay taytaqa Jehová Dios kasqanta.

Noqaqa Taytay Jehová Diospa sonqontan kusichiyta munarqani jinaspapas paypa munaynintan ruwayta munarqani, ichaqa askha watakunañan drogakunaq, alcoholpa ima kamachin karqani. Chayraqmi Mateo 6:24 textopi Jesuspa nisqanta entienderqani, chaypin nin: “Manan pipas iskay patrontaqa serviyta atinmanchu”, nispa. Chay viciokunata saqenaypaq kallpachakushaqtiymi leerqani 1 Corintios 15:33 textota, chaypi nisqanmi sonqoyman chayawarqan, chaypin nin: “Mana allin runakunawan juñukuspaqa allin ruwaykunatan qonqapunkichis”, nispa. Chaywanmi entienderqani drogakunata alcoholtapas saqepunaypaqqa manañan drogakuq, machaq runakunawanpas juñunakunaychu karqan nitaqmi drogakuna, machana wasikunamanpas rinaychu karqan. Bibliapi nisqanqa sut’in karqan, saqepunaymi karqan imakunachus mana allin ruwaykunaman urmachiwasharqan chaykunata (Mateo 5:30).

Anchatapuni música tocay gustawasqanraykun noqapaqqa sasa karqan heavy-metal bandata saqepuy. Ichaqa iñiq t’aqaypi amigoykunaq yanapayninwanmi saqepuyta atirqani. Machaytapas, drogakuytapas saqepurqanin, chujchaytapas, sunkhaytapas rutukurqanin manañan yana p’achawanpas churakurqaniñachu. Chujchayta rutuchikusaq niqtiymi Sussanqa niwarqan: “Juñunakuyniykimanmi qanwan risaq. Imatan chaypi ruwanku chayta rikuytapuni munani”, nispa. Chaypi rikusqanmi anchata gustarqan chaymi paypas Bibliata estudiayta qallarirqan. Tiempo pasaqtinmi casarakapurqayku, 2008 watapitaq iskayniyku bautizakapurqayku Jehová Diospa testigonkuna kanaykupaq. Kunanqa kusisqan Jehová Diosta servishayku mamaywan kuska ima.

BENDICIONKUNA CHASKISQAY: Ñaupaqqa manan noqapi cheqaq kusikuy karqanchu, amigoykunapas traicionerokunan karqanku, kunanmi ichaqa cheqaq kusikuyta tarini, amigoykunapas allin runakunan kanku. Música tocayqa gustawashallanmi ichaqa kunanqa allin takikunatan ajllakuni. Chaymantapas familiaykunaman juj runakunamanpas willani imaynatan Biblia vidayta cambiasqanta, astawanqa wayna-sipaskunaman. Paykunatan yanapayta munani allinta entiendenankupaq kay pachaqa imaymanatan munachiwasun munaypas kanman jinata, ichaqa chaykunaqa ‘mana valeq q’opa jinallan’ (Filipenses 3:8).

Diosman asuykuspan cheqaq amigokunata llaqtanpi tarirqani, chaypiqa munanakuy, thaj kausayllan kan. Astawanqa tarirqani maytapuni munasqay taytata, payqa Jehová Diosmi.

[Uranpi willakuy]

[Willakuy]

“Jehová Diosmanqa kutinpuyta atirqani pay pusanpuwasqanraykun”