Bibliaq yanapayninwan cambianku

¿IMAYNATAN juj sipas sumaq kausayta tarirqan wawa kasqanmantapachaña sasachakuypi tarikurqan chaypas? ¿Iman yanaparqan millay saltaq sonqo político runata, llamp’u sonqowan Bibliamanta yachachiq runaman tukupunanpaq? Paykuna kikinku willawasun.

“Munasqan sientekuyta munarqani” (INNA LEZHNINA)

¿IMA WATAPIN NACERQAN? 1981 WATAPI

¿MAYMANTAN? RUSIA NACIONMANTA

¿IMAMANTAN WILLAKUSHAN? WAWA KASQANMANTAPACHAN SASACHAKUYPI TARIKUSQA

ÑAUPA VIDAY: Tayta-mamayqa roqt’on karqanku, noqapas roqt’on nacerqani. Soqta wataykamaqa kusisqan kausarqani, ichaqa papaywan mamaywanmi t’aqanakapurqanku. Juch’uyllaña karqani chaypas sinchitan chayqa llakichiwarqan. T’aqanakapuqtinkun papaywan kuraq hermanoywanqa Troick llaqtapi qhepakurqanku, noqatataq mamay apapuwarqan Cheliabinsk llaqtaman. Tiempowanmi mamayqa juj qhariwan casarakapurqan. Padrastroyqa machaqmi karqan chaymi iskayniykuta maqawaqku.

1993 watapin kuraqniy unupi jeq’epaspa wañupurqan. Chay pasasqanqa llapaykutapas sichitan llakichiwarqanku. Mamayqa machaymanmi qokapurqan jinan millayta tratawaq. Noqaqa allin kausaytan munarqani. Munasqa sientekuytan munarqani. Askha iglesiakunapin yanapayta maskharqani ichaqa manan tarirqanichu.

BIBLIAQ YANAPAYNINWAN CAMBIAPUNI: 13 wataypi kashaqtiymi juj compañeray Bibliapi willakuykunamanta yachachiwarqan, payqa Jehová Diospa testigonmi karqan. Noemanta Jobmanta ima yachaymi gustawaq, paykunaqa sasa tiempokunapin Diosta servirqanku. Pisi tiempollamantan Testigokunawan Biblia estudiayta qallarirqani, juñunakuyninkumanpas riqmi kani.

Diospa siminpin ancha munay cheqaq yachachikuykunata tarirqani. Diosqa sutiyoq kasqanta yachaymi sonqoyman chayarqan (Salmos 83:18). Tukukuy p’unchaykunamanta Bibliaq willasqan k’apajta junt’akushasqanmi admirachiwarqan (2 Timoteo 3:1-5). Kausarinpuymanta yachaypas anchatan kusichiwarqan. ¡Turaywanpas tupasaqmi! (Juan 5:28, 29).

Ichaqa, manan llapachu noqawan kusikurqanku. Mamaywan padrastroywanqa cheqnikurqankun Jehová Diospa testigonkunata, manan munarqankuchu Bibliata estudianaytapas. Noqamanmi ichaqa anchata gustawarqan Bibliamanta yachasqay, manapunin saqeytaqa munarqanichu.

Manan facilchu karqan familiaypa mat’ipayawasqanta aguantayqa. Chayllamanmi juj llakipi tarikullarqaykutaq: sullk’aymi unupi jeq’epaspa wañukapullarqantaq, paywanqa kuskan riq kayku Jehová Diospa testigonkunaq juñunakuyninman. Testigokunaqa noqawanmi kasharqanku. Paykuna ukhupin munasqa sientekurqani, chaytan noqaqa unayña maskhasharqani. Seguron kasharqani cheqaq religión kasqankumanta, chaymi 1996 watapi bautizakurqani Jehová Diospa testigon kanaypaq.

BENDICIONKUNA CHASKISQAY: Soqta watañan casarasqa kashani sumaq sonqo qosay Dmitrywan. Iskayniykun llank’ayku San Petersburgo llaqtapi Jehová Diospa testigonkunaq sucursalninpi. Tiempowanqa tayta-mamaypas manañan phiñakurqankuchu imapichus creesqaywan.

¡Anchatan agradecekuni Jehová Diosta reqsisqaymanta! Payta serviymi anchata kusichiwan.

“Imaymanatan tapukuq kani” (RAUDEL RODRÍGUEZ RODRÍGUEZ)

¿IMA WATAPIN NACERQAN? 1959 WATAPI

¿MAYMANTAN? CUBA NACIONMANTA

¿IMAMANTAN WILLAKUSHAN? SALTAQ SONQO POLÍTICO RUNAS KASQA

ÑAUPA VIDAY: La Habana (Cuba) llaqtapin nacerqani, wiñasqay barrioqa wajchan karqan, maqanakuypas kallaqpunin callekunapi. Wayna kashaspayqa yudo nisqata juj maqanakuykunata iman yacharqani.

Allin estudiaq kasqayraykun tayta-mamayqa munarqanku universidadman rinayta. Chaypi kashaspan piensayta qallarirqani nacionniypi gobiernokunaqa cambiananku kasqanta, jinan autoridadkuna contra jatarirqani. Compañeroypiwanmi juj policiamanta armanta suwanaykupaq umanta yastata k’irirqayku. Chayraykun carcelman apawarqanku, baleasqa wañunaykupaqmi wisq’awarqanku. ¡20 watallaypiraq kashaspan wañunay patapiña kasharqani!

Carcelpi kashaspaymi yuyaykurqani, imaynatachus baleawanankupaq wajamuwaqtinku presentakuyman chaypi, manan manchakuyta munarqanichu. Ichaqa imaymanatan tapukushallarqanitaq: “¿Imaraykun nishu mana chanin ruway kan?” “¿Wañuywanchu kausay tukukapun?”, nispay.

BIBLIAQ YANAPAYNINWAN CAMBIAPUNI: Tiempowanmi wañuchisqa kanaykupaq wisq’awasqankumanta 30 wata wisq’asqa kanaykupaq cambiapuwarqanku. Chaypin Jehová Diospa testigonkunata reqsirqani, paykunan carcelpi kasharqanku imapichus creesqankurayku. Admirakurqanin mana manchakuq kasqankumanta llakhilla kasqankumanta. Yanqamantaña wisq’arqanku chaypas, manan phiñasqachu kasharqanku.

Testigokunan yachachiwarqanku imatachus munan Dios runakunapaq chayta. Bibliawanmi yachachiwarqanku kay jallp’aqa juj paraiso kapunanta, imaymana mana allin ruwaykunapas mana chanin ruwaykunapas chinkapunanta, chay paraisopiqa chanin runakunalla wiñaypaq kausanankutapas (Salmos 37:29).

Gustawarqanmi yachachiwasqankuqa, ichaqa manan paykuna jinachu kausasharqani. Politicapi chhaqrukuyta mana saqenaypaqmi piensarqani, juj uyaypi ch’aqlawaqtinku juj kaq uyayta qoytaqa sasapaqmi qhawarirqani, chaymi noqa kikiy Bibliata leenaypaq decidikurqani. Tukuruspaymi repararqani Jehová Diospa testigonkunalla ñaupa tiempo cristianokuna jina kausasqankuta.

Bibliata estudiaspaymi repararqani imaymanapi cambianay kasqanta. Qhelli simikunatan rimaq kani, chaymi rimayniyta cambianay karqan. Chaymantapas fumaytan saqepunay karqan, politicapipas manañan participanayñachu karqan. Manan facilchu karqan, ichaqa Jehová Diospa yanapayninwanmi chaykunata pisi-pisimanta saqepurqani.

Millay genioyta dominaymi aswan sasaqa karqan. Kunankamapas mañakuniraqmi Diospa yanapayninta controlakunaypaq. Bibliapi textokunan allinta yanapawarqan, jujninmi nin: “Kallpasapamanta aswan allinqa mana usqhay phiñakuqmi, huk llaqta hap’iqmanta aswan allinqa pay kikinta cuidakuqmi”, nispa (Proverbios 16:32, Diospa Simin Qelqa).

1991 watapin carcelpi kashaspa bautizakurqani Jehová Diospa testigon kanaypaq. Juj wata qhepallamanmi wakin presokuna kacharisqa kaspa España nacionman apachisqa karqayku chaypi familiayoq kasqaykurayku. Chayman chayaspayqa Jehová Diospa testigonkunaq juñunakuyninmanmi riyta qallarirqani, hermanokunaqa unayñapas reqsiwankuman jinan sumaqta chaskiwarqanku, jujniraymanta kausanaypaqmi yanapawarqanku.

BENDICIONKUNA CHASKISQAY: Kunanqa kusisqan esposaywan ususiykunapiwan Diosta servini. Yaqa tukuy tiempon jujkunaman Bibliamanta yachachini. Mayninpiqa ñaupa tiempota yuyarispan, wayna kashaspa wañuy patapi kashasqayta yuyarini, maytan agradecekuni chaymantapacha allin kaqkunata tarisqaymanta. Manan kausashallanichu, kapuwanmi suyakuyniypas. Maytan munashani prometesqa Paraíso chayamunanta, chay tiempopin chanin kausay kanqa, “manan wañuypas kanqañachu” (Apocalipsis 21:3, 4).

[Recuadro]

“Diosqa sutiyoq kasqanta yachaymi sonqoyman chayawarqan”

[Foto]

Noqamanpas qosaymanpas Bibliamanta roqt’ukunaman yachachiymi anchata gustawanku