Montreal llaqtapin wiñarqani, chaypiqa wajchan karqayku. Pusaq wawakunamantan noqa sullk’a karqani. Soqta killallayoqraq kashaqtiymi papay wañukapurqan, chaymi mamallaywanña qhepakurqayku.

Juch’uychaymantapachan rikurqani drogakuyta, apuestayta, maqanakuykunatapas. Tiyasqay llaqtapiqa suwakunan tiyaq. 10 wataypi kashaspaqa ñan ramera warmikunaq mañaqkunaq kamachintaña ruwaq kani. Jujkunata engañaymi nishuta gustawaq. Chayqa droga jinan karqan.

14 wataypi kashaspaqa allintañan yacharqani jujkuna engañayta. Mayninpin rantiq kani askha relojkunata, pulserakunata, anillokunata ima qoriwan p’achachisqata, chaytan allin qoriyoqpas kanman jinata callekunapi vendeq kani. ¡Facil-llatan qolqeta ganaq kani! Juj kutinmi 10.000 dolaresta ganarqani juj p’unchayllapi.

15 wataypi kashaqtiymi wijch’umuwarqanku wayna-sipaskunata correginapaq wasimanta, chaymi mana maypi puñuyta atirqanichu. Callekunapi, parquekunapi, amigoykunaq wasinkunapi iman puñuq kani.

Jujkunata engañaspa purisqaymantan mayninpi policía jap’iwaq tapupayawananpaq. Ichaqa manataq vendesqayqa suwasqachu karqan chayqa, manan jayk’aqpas carcelmanqa apawarqankuchu. Ichaqa jujkunata engañasqaymanta, mana licenciayoq ima vendesqaymantaqa paganaypunin karqan. Manan imatapas ni pitapas manchakurqanichu; qolqe manuqkunapaq iman llank’arqani manunkuta cobraspa. Chay ruwayqa nishu peligroso kasqanraykun mayninpiqa armayoq riq kani. Mafioso nisqa runakupaq iman llank’arqani.

Primera vez Bibliamanta uyariqtiyqa 17 wataypin kasharqani. Noviaywanmi tiyarqani, jinan payqa Biblia estudiayta qallarirqan Jehová Diospa testigonkunawan. Ichaqa manan gustawarqanchu Bibliapi yachachikuykuna chaymi pasakapurqani juj sipaswan, paywanqa ñan reqsinakurqaykuña.

Ichaqa, chay sipaspas Jehová Diospa testigonkunawanmi estudiayta qallarillarqantaq. Cambiapusqanta rikuspaymi admirakurqani: aswan munakuq, pacienciakuq iman kapurqan. Juj p’unchaymi juñunakuyninkuman invitawarqanku, jinan rirqani. Chayman riq runakunaqa jujniraymi kasqaku; sumaqtan chaskiwarqanku abrazaykuspa ima. Manan jayk’aqpas chhayna allinqa sientekurqanichu. Wawa kaqtiypas pisitan munakuwarqanku, familiaypas manan noqamantaqa llakikuqkuchu. Testigokunan ichaqa munakuywan chaskiwarqanku. Bibliata estudiasunmanchu niwaqtinkun ya nirqanipacha.

Bibliamanta mana yachaspayqa wañupuymanpaschá karqan. Iskay suwakunapiwanmi suwakunayku karqan, 50.000 dolarestan necesitarqani pujllasqaymanta manuyta paganaypaq. ¡Aswanmi manaña paykunawan riyta munarqanichu! Iskayninkun ichaqa suwakuq rirqankupuni, chaypin jujninta wañuchipurqanku, juj kaqtataq carcelman wisq’arqanku.

Bibliata estudiaspaymi repararqani imaymanapi cambianay kasqanta. Bibliapi 1 Corintios 6:10, texton nin: “Suwakunapas, sinchita munapayaqkunapas, machaqkunapas, millayta k’amiqkunapas, engañowan suwaqkunapas manan Diospa gobiernonmanqa jaykunqakuchu”, nispa. Chay textota leespaymi waqaykurqani. Llapanpipunin cambianay karqan (Romanos 12:2). Noqaqa millay runan karqani. Kausayniyqa manan allinchu karqan, sinchi mana allinkunatan ruwarqani.

Ichaqa, yachallarqanitaqmi Jehová Diosqa sumaq sonqo perdonakuq kasqantapas (Isaías 1:18). Chaymi tukuy sonqoywan mañakurqani, vicioykunata saqepunaypaqmi yanapayninta rogakurqani. Yanapayninwanmi pisi-pisimanta cambiapurqani. Noviaywan casarakapusqaykuqa ancha allinmi karqan iñiyniykupi ñauparinaykupaq.

Chay tiempopaqqa 24 wataypin kasharqani, ñan wawaykunapas kinsaña karqan. Chaymi necesitarqani llank’anata familiayta mantenenaypaq. Ichaqa manan estudioyta tukurqanichu, manataqmi ima llank’aypipas experienciay karqanchu. Jinan Jehová Diospa yanapayninta mañakuspa llank’ana maskhaq lloqsirqani. Llank’anaman presentakuspayqa cambiaytan munani honrado runa jinan llank’ayta munani niqmi kani. Mayninpiqa Bibliatan estudiashani allin runa kanaypaq niqmi kani. Ichaqa manan chaskiwarqankuchu. Chaymantañan vidayta willakusqay qhepaman juj llank’anapi runaqa niwarqan: “Manan allintachu yachani imarayku kaypi llank’anaykita, ichaqa kaypi llank’anki”, nispa. Chayqa mañakusqayman Diospa kutichimuwasqanpunin karqan. Qhepamanqa esposaypiwanmi Jehová Diospa testigon kapurqayku.

Bibliapi consejokunata kasukusqayrayku, Cristoq ejemplonta qatikusqayraykun kausashaniraq. Sumaqtan familiaywan kausakuni, concienciaywanpas thajpin kashani, manan iskayanichu Jehová Dios perdonawasqanmantaqa.

Chunka tawayoq watañan 70 horata jina sapa killa jujkunata yanapashani. Juj runakunatan yanapani Bibliamanta yachanankupaq. Qaynakunallan esposaypas chay ruwayta qallarirqan. Jinaspapas kay kinsa chunka watakunapin llank’anaypi 22 compañeroykunata yanaparqani Jehová Diospa testigon kapunankupaq. Rishaniraqmi imaymanata vendena tiendakunamanqa, ichaqa manañan ñaupaqpi jina jujkunata engañanaypaqchu. Aswanpas jujkunata yanapanaypaqmi, mana ima suwakunapas kasqanpi kausananchismantan paykunaman willani (Salmos 37:10, 11).