Warialda (Nueva Gales del Sur) llaqtapin wiñarqani. Chay llaqtapiqa askhan ovejakuna wakakuna ima kaq, chaypiqa mijuykunapas wiñanmi. Chaymantapas chay llaqtaqa limpion, manan kanchu mana allin ruwaykunapas.

Noqaykuqa chunkan kayku, noqan kuraq kani, chaymi 13 wataymantapacha llank’ayta qallarirqani familiayta yanapanaypaq. Juj haciendapin llank’arqani, manan estudioytapas tukurqanichu. 15 wataypi kashaspaqa jujkunapaq llank’aspan salqa caballokunata mansaq kani.

Llank’anayqa gustawaqmi. Tutakunan ninawan q’oñichikuspa killata ch’askakunata ima qhawaq kani, munaymi campokunapas kaq. Kaykunaqa kamasqapunichá kanman karqan niqmi kani. Ichaqa, mana allin amigokunan chaypiqa kallarqantaq. Wakin llank’aqkunan qhelli simikunata rimaqku, nishuta fumaqku, chaymi noqapas paykuna jina ruwayta qallarirqani.

18 wataypi kashaspan Sydney llaqtaman ripurqani. Ejercitomanmi riyta munarqani, ichaqa estudioyta mana tukusqayraykun mana chaskiwarqankuchu. Juj llank’anata tarispan juj wata chay llaqtapi qhepakurqani. Chaypin Jehová Diospa testigonkunata reqsirqani. Juñunakuyninkuman invitawaqtinkun rirqani, jinan repararqani yachachisqankuqa Bibliaq nisqanman jinapuni kasqanta.

Chayllamanmi campoman kutipurqani. Goondiwindi (Queensland) llaqtapin tiyapurqani. Chaypin llank’anata tarirqani, casarakapurqani ima, chaymantapas machaytan qallarirqani.

Esposaywanqa iskay wawayoqmi kapurqayku. Wawayku nacesqan qhepamanmi imayna kausashasqaypi yuyaykurqani. Jinan yuyarirqani Sydney llaqtapi juñunakuyman risqaypi imatachus yachachikamusqanta

Ñaupa tiempomantaña La Atalaya qelqatan tarirqani. Chaypin Australia nacionpi Jehová Diospa testigonkunaq sucursalninpa direccionnin kashasqa chaymanmi qelqarqani yanapawanankupaq. Jinan juj sumaq sonqo munakuq Testigo visitamuwarqan, paywanmi Biblia estudiayta qallarirqani.

Estudiasqayman jinan cuentata qokurqani kausayniyta cambianay kasqanta. Bibliapi 2 Corintios 7:1 texton sonqoyman chayawarqan, chaypin kallpachawanchis cuerponchista “tukuy ima qhellimanta” limpiakunanchispaq.

Manaña machanaypaq manaña fumanaypaq iman kallpachakurqani. Chay viciokunaman yachasqa kasqayraykun mana facilchu karqan. Ichaqa Diospa munayninman jinan kausayta munarqani. Romanos 12:2 textoq nisqanmi astawanqa yanapawarqan, chaypin nin: “Amataq kay pacha runakuna jinachu kausaychis, aswanpas yuyayniykichista mosoqyachispa imayna kasqaykichista cambiaychis”, nispa. Repararqanin costumbreykunata cambianaypaqqa piensasqayta cambianay kasqanta, Dios jinataq chaykunataqa mana allinta jina qhawarinay kasqanta. Diospa yanapayninwanmi chaykunata atiparqani.

Astawanqa qhelli simikunata saqeymi nishu sasa karqan. Yacharqanin Biblia Efesios 4:29 textopi yuyaychasqanta, chaypin nin: “Amapunin simiykichismantaqa ima millay rimaypas lloqsinqachu”, nispa. Chaypi nisqantaqa unaypin junt’arqani. Chaymantapas Isaías 40:26 textoq nisqanpi yuyaymanaymi yanapawarqan. Ch’askakunamanta rimaspan chay texto nin: “Hanaq pachata qhawariychis. ¿Pin chaykunata kamarqan? Ch’askakunata ch’ulla-ch’ullamanta lloqsichimuqmi, sutinmantakama qoyllurkunata waqyamuqmi. Payqa sinchi atiyniyoqmi sinchi kallpayoqmi, manan ch’ullapas faltanchu”, nispa (Diospa Simin Qelqa). Chhaynaqa, Diosqa atiyniyoqtaq janaq pachapi imaymana kaqkunatapas kamananpaq chayqa, ¿manachu yanapayta atiwanman cambianaypaq sonqonpaq jina kausanaypaqpas? Sapa kutilla mañakuspa kallpachakuspa iman millay rimaykunataqa saqepurqani.

Jujkunapaq llank’aspayqa pisitan runakunawan rimaq kani, pisillan chaykunapiqa runakuna kaq. Ichaqa Jehová Diospa testigonkunaq juñunakuyninkupi yachachiwasqankuraykun allinta rimayta yacharqani. Chaypin yacharqani Diospa gobiernonmanta allin willakuykunata jujkunaman willaytapas (Mateo 6:9,10; 24:14).

Kunanqa iñiq t’aqapin umalliq kashani. Iñiqmasiykunata tukuy atisqaypi yanapayqa may sumaqmi noqapaqqa. Aswan jatun bendicionqa junt’aq sonqo munasqa esposaywan wawaykunawan ima Jehová Diosta serviymi.

Jehová Diostan gracias nini kay mana allin estudioyoq runaman paymanta yachachiwasqanmanta (Isaías 54:13,). Bibliapi Proverbios 10:22 textoq nisqantan sonqoypi jap’ikuni, chaypin nin: “Señor Diospa saminchayninqa qhapaqyachinmi”, nispa (Diospa Simin Qelqa). Noqapas familiaypas astawan Jehová Diosmanta yachaspan wiñaypaq payta serviyta munayku.