Julio: Imaynalla Ernesto. Kusikunin sapa semanan qanwan Bibliamanta rimaspa. a ¿Imaynallan kashanki?

Ernesto: Allinmi kashani, gracias.

Julio: ¡Kusa! Qayna semanan rimarqanchis imaraykuchus Jehová Diospa testigonkuna niyku Diospa gobiernonqa 1914 watapin kamachiyta qallarirqan chaymanta. b Chaypin rikurqanchis Daniel libropi 4 capítulo chaymanta willasqanta. ¿Yuyashankichu?

Ernesto: Arí, Nabucodonosorpa mosqokusqanta.

Julio: Arí payqa jatunkaray sach’atan mosqokurqan. Payqa juj kunkatan uyarirqan, chaymi nimurqan sach’ata wit’unankupaq. Pampapi k’ullullanñan saphintin qheparqan. Chaymantaqa qanchis tiempon pasarqan, jinan sach’aqa jujmanta wiñarqan. c Chaymantapas profeciaqa iskay kutita junt’akusqantan rikurqanchis. ¿Imaynapin ñaupaq kutipi junt’akurqan? ¿yuyashankichu?

Ernesto: Chayqa Nabucodonosortan pasarqan, ¿riki? Locomanmi tukupurqan, qanchis watataqmi chhayna kasharqan.

Julio: Arí, chhaynapunin. Locomanmi tukupurqan jinaspa manaña reyñachu kapurqan. Qhepamanpas jujmantan profeciaqa junt’akullarqantaq. Qanchis tiempo Diospa kamachikuynin tatichisqa kapuqtin. Chay tiempon qallarirqan 607 watapi manaraq Jesús jamushaqtin, chaymantapachan mana karqanchu kay pachapi Jehová Diosta representaq reykuna. Chay tiempo tukupuqtinmi Diosqa juj mosoq reyta churanan karqan, ichaqa manan kay pachapichu aswanpas janaq pachapin. Chhaynaqa qanchis tiempo tukupuqtinqa Diospa janaq pacha gobiernonmi kamachikuyta qallarinan karqan. Yacharunchismi jayk’aqchus qanchis tiempo yupakuyta qallarisqanta. Kunanqa yachananchismi imayna tiempotachus durarqan chayta, chhaynapi ima watapichus Diospa gobiernon kamachikuyta qallarirqan chayta yachanapaq. ¿Entiendeshankichu?

Ernesto: Arí, yuyarishaniñan qayna rimasqanchista.

Julio: Kusa. Chhaynaqa rimasun “qanchis tiempokuna” jayk’a tiempotachus durarqan chayta. Jamunaypaqmi noqapas chayta yuyarinaypaq t’aqwirimusharqani. Chhaynaqa entiendewanaykipaq jina explicasayki.

Ernesto: Allinmi.

Julio: Ñaupaq kutipi Nabucodonosorpi junt’akuqtinqa “qanchis tiempoqa” qanchis watakunan karqan. Ichaqa qhepata Diospa gobiernonpi junt’akuqtinqa aswan unaymi karqan.

Ernesto: ¿Imaynapitaq chaytari yachanki?

Julio: Qanchis tiempokunaqa qallarirqan 607 watapi manaraq Jesús jamushaqtinmi, chaypachan Jerusalenqa ch’usaqyachisqa karqan. Chaymantapacha qanchis watata yupaspaqa 600 (manaraq Jesús jamushaqtin) watamanmi chayanchis, ichaqa chay watapiqa manan Diospa gobiernonwan tupaqqa imapas pasarqanchu. Chaymantapas ñaupaqpi rimasqanchis jina, Jesús kay pachaman jamuspaqa rimarqanmi qanchis tiempokunaqa manaraq tukukusqanmanta.

Ernesto: Arí, arí, yuyashanin.

Julio: Chhaynaqa qanchis tiempokunaqa manan qanchis watakunallachu, aswanpas unay tiemporaqmi.

Ernesto: ¿Jayk’a tiempotaq kanmanri?

Julio: Apocalipsis libropi juj profecian Daniel libropi profeciawan tupashan, chaymi yanapawasun jayk’a tiempotachus durarqan qanchis tiempokuna chayta yachanapaq. Chay profecian nishan kinsa tiempo kuskanqa 1.260 p’unchaykuna kasqanta. d Chhaynaqa, juj chhaynapiwan qanchis tiempokunaqa 2.520 p’unchaykunan. ¿Chaykama entiendeshankichu?

Ernesto: Arí, ¿ichaqa imaraykutaq qankunari ninkichis Diospa gobiernonqa 1914 watapin kamachiyta qallarirqan nispari? Chaytan manaraq allintachu entiendeshani.

Julio: Chayta kunan t’aqwirisunchis. Wakin profeciakunapiqa juj p’unchaymi tupan juj watawan. e Sichus chayman jina yupasun qanchis tiempokunata chayqa, 2.520 p’unchaykunaqa 2.520 watakunan. Chhaynaqa 607 (manaraq Jesús jamushaqtin) watamantapacha yupasun 2.520 watakunata chayqa, 1914 watamanmi chayanchis. Chayraykun ninchis qanchis tiempokunaqa chay watapi tukupusqanta, Jesuspas Diospa gobiernonpi rey nombrasqa kasqanta. Chaymantapas 1914 watamantapachan tukukuy p’unchaykunamanta Bibliaq willasqan profeciakuna junt’akuyta qallarirqan.

Ernesto: ¿Ima profeciakunataq junt’akuytari qallariqan?

Julio: Mateo 24:7 textoq nisqanman jina, Jesusmi willarqan janaq pachapi kamachikuyta qallariqtin imakuna pasananta. Nirqanmi: “Juj nacionmi juj nación contra jatarinqa, juj llaqtataq juj llaqta contra jatarinqa, kayneqpi chayneqpin kanqa yarqaypas terremotokunapas”, nispa. Chaypunin pasashan chay watamantapacha, ¿riki?

Ernesto: Arí, chaypunin pasashan.

Julio: Jesusqa nillarqantaqmi guerrakuna kananta. Apocalipsis libropin willashan juj lado nacionkunawan guerra kananta, chaykunaqa pachantin runatan afectarqan. f ¿Yuyashankichu Primera Guerra Mundial jayk’aq qallarisqanta?

Ernesto: 1914 watapin qallarirqan. Chayqa Jesús kamachikuyta qallarisqan watawanmi tupashan. Chayqa qankunaq yachachisqaykichisman jinan kashan. Chhaynata tupachiytaqa manan piensaymanpaschu karqan.

Julio: Maypachachus reparanchis qanchis tiempokunamanta profeciakuna tukukuy p’unchaykunamanta profeciakunawan imayna tupasqanta chayqa, llapanpas allintan tupashan. Jehová Diospa testigonkunaqa seguron kashayku Jesús 1914 watamantapacha janaq pachapi kamachishasqanmanta, chaymantapacha tukukuy tiempokunapi tiyasqanchismantapas.

Ernesto: Tukuy kaykunatan chayraq allinta entiendeshani.

Julio: Arí, manan fácil entiendeychu. Noqapas chhikanta sasachakurqanin chayllaraq chaykunata willawaqtinkuqa. Ojalachá kay rimasqanchis yanapasunkiman karqan imarayku Testigonkuna 1914 watapi Jesús kamachiyta qallarisqanta creesqaykuta yachanaykipaq. Chaymantapas rikusqayki jina, noqaykuqa Bibliaq nisqanman jinapunin imatapas yachachiyku.

Ernesto: Arí, chaywanmi anchata admirakuni. Imataña tapuqtiypas Bibliawanpunin kutichiwanki. Manan jayk’aqpas niwankichu: “Noqaq piensasqayman jinaqa” otaq “creesqayman jinaqa” nispaqa, aswanpas Bibliawanpunin yachachiwanki. ¿Ichaqa imaraykutaq Bibliari sasa entiendena? ¿Imanaqtintaq Diosri mana nirqanchu: “Jesusqa 1914 watamantapachan janaq pachapi rey kanqa” nispachu?

Julio: Allinmi chaykuna tapukusqayki Ernesto. Bibliaqa wakin willakuykunataqa manan sut’itapunichu willan. ¿Imanaqtinmi chhayna? ¿Imaraykun kallpachakunanchis entiendenanchispaq? ¿Chaykunamanta jawa semanata rimasunmanchu?

Ernesto: Riki, allinmi kanman. Suyasayki.