Qhawariy dibujopi kashaq erqechata. Payqa manchasqan sapallan kashan. ¿Hayk’aqllapas chhayna sientekurqankichu?... Mayninpiqa llapanchismi chhayna sientekunchis. Bibliaqa rimanmi Dios munakuq runakunamanta, paykunapas manchasqa sapallanku iman sientekurqanku. Yachasun Eliasmanta.

Eliasqa Israelpin tiyarqan manaraq Jesús naceshaqtin. Ahabmi Israelpi rey kasharqan, payqa manan Jehová Diostachu yupaycharqan. Aswanpas Jezabel esposanwanmi pantasqa Baal diosta yupaycharqan. Chayraykun yaqa llapa israelitakunapas Baal diosta yupaycharqanku. Jezabel reinaqa sinchi millaymi karqan, payqa wañuchiytan munarqan Jehová Dios kasukuqkunata hinallataq Eliastapas. ¿Imatan Elías ruwarqan? ¿Imatan qan ruwawaq karqan?...

 Eliasqa karuman ayqekuspan huk qaqa t’oqopi pakakurqan. ¿Imaraykun pakakurqan?... Arí, payqa manchasqan kasharqan. Ichaqa manan manchakunanchu karqan, ¿imarayku? Payqa yacharqanmi Jehová Dios yanapay atisqanta. Huk kutinmi Diosqa Eliaspa mañakusqanta uyarispa hanaq pachamanta ninata kachaykamurqan. Chayraykun Diosqa kay kutipipas Eliastaqa yanapayta atinman.

Qaqa t’oqopi Elías kashaqtinmi Jehová Diosqa payta nirqan: “¿Imatan kaypi ruwashanki?”, nispa. Eliastaq kutichirqan: “Ñoqa sapallayñan qanta yupaychashayki. Sapay rikukuspaymi manchasqa kashani, wañuchisqan kasaq”, nispa. Eliaspa yuyaykusqanman hinaqa llapa Jehová Diosta yupaychaqkunan wañuchisqaña karqanku. Ichaqa Diosmi Eliasta nirqan: “Kashanraqmi qanchis waranqa ñoqata yupaychawaqkuna. Ama manchakuychu. Askharaqmi ruwanayki kashan”, nispa. ¿Kusikunmanchu karqan Elías chayta uyarispa?... Arí, kusikurqanmi.

¿Imatan yachanchis Eliasmanta?... Manan hayk’aqpas manchasqaqa sientekunaykichu nitaqmi sapallaykipas kashawaq hinaqa qhawarikunaykichu. Kashanmi Jehová Diostapas qantapas munakuq amigoykikuna. Hinaspapas Jehová Diosqa tukuy atiyniyoqmi, payqa yanapasunkipunin. Manan sapallaykichu kashanki, ¿kusikunkichu chayta yachaspa?...