Pitapas allinta reqsinanchispaqqa yachananchismi imaynatan imatapas munasqanman jina cumpliran. Kaqllataqmi Diosta reqsinapaqpas yachananchis imakuna ruwasqanta. Diospa ruwasqankunaqa beneficionchispaqmi jinallataq jamuq tiempopipas beneficiawasun, admirakunkichá chaykunata yachaspaqa.

Jehová Diosmi kamaqninchisqa sumaq Dios kasqanqa “kay pacha kamasqa kasqanmantapachan sut’ita rikukun, arí, imaynachus kasqanqa imachus kamasqankunapin sut’ita reparakun” (Romanos 1:20). “Atiyninwanmi Señor Diosqa kay pachata ruwaran, yachayninwanmi teqsimuyuntinta tajachiran, yuyayninwanmi janaq pachatapas mast’ariran” (Jeremías 10:12). Imaymana kamasqanmi rikuchiwanchis nishutapuni Diosqa munakuwasqanchista.

Jehová Dios payman rijch’akuqta kamawasqanchisqa imaymanapin yanapawanchis (Génesis 1:27). Chaymi yanapawanchis cualidadninkunata noqanchispi wiñachinanchispaq. Diosqa kamawaranchis piensasqankunata kamachikuyninkunata entiendenanchispaqmi. Sichus chayman jina kausasun chayqa kusisqan kausasun, yachanchismi imapaq kausasqanchistapas. Chaymantapas paywanmi amigontin kayta atinchis.

Kay allpanchis imayna kamasqa kasqanmi rikuchin Diosqa anchata munakuwasqanchista. Apóstol Pablon niran: “Payqa allinkunata ruwaspan reqsichikuran pichus kasqanta: parata parachimuspa, chajrakunata tiempollanpi ruruchispa, mijuytapas askhanpi qospa ima; chaykunawanmi sonqoykichistapas kusirichin”, nispa (Hechos 14:17). Diosqa manan iskay kinsa necesitasqallanchistachu qowaranchis, aswanpas tukuy necesitasqanchistan, chhaynapi tukuy imaymanayoq kusisqa kausananchispaq. Chayqa juj muestrallan payqa imaymanakunatawanraqmi jamuq tiempopiqa qowasun.

 Jehová Diosqa allpata kamaran runakuna chaypi wiñaypaq tiyanankupaq. Biblian nin: “Kay pachatataqmi runaman qoran”, nispa. Nillantaq: “Manan yanqa kananpaqchu chayta kamaran, aswanpas runaq tiyananpaqmi kamaran”, nispa (Salmos 115:16; Isaías 45:18). ¿Pikunan tiyananku karan, jayk’a tiempopaq? Biblian nin: “Chanin runakunaqa kay allpatan jap’ikapunqaku, chaypin wiñaypaq tiyanqaku”, nispa (Salmos 37:29).

Jehová Diosqa Adán Evataqa chaypaqmi kamaran. Chaymi juj sumaq paraisoman “churaran llank’ananpaq cuidananpaqwan” (Génesis 2:8, 15). Diosqa sumaq tareatan paykunaman qoran, niranmi: “Askhata miraychis, kay pachamanpas junt’aykuychis, chaypi munayniyoq kaychis”, nispa (Génesis 1:28). Adán Evaqa wiñaypaqmi kusisqa Diospa qosqan allpapi tiyananku karan. Ichaqa manan Diosta kasukurankuchu jinaspa manaña kasukuqkuna ukhupiñachu kapunku, nitaq ‘kay allpatapas jap’ikapunkuchu’. Ichaqa manan chaywanchu Jehová Diospa runakunapaq ruway munasqanqa cambiaran. Chaypaq yachasunchis imatan Dios ruwaran chaymanta.

¿Imapaqmi Jehová Dios Bibliata qowaranchis? Payta reqsinanchispaqmi (Proverbios 2:1-5). Bibliapiqa manan Diosmanta llapa tapuyninchispa kutichiynintachu tarisun; manataqmi ima libropipas tarisunmanchu (Eclesiastés 3:11). Ichaqa Bibliapi tukuy nisqanqa yanapawanchismi Diosta reqsinanchispaq. Bibliata leespan yachasunman runakunatapas sumaqta tratasqanta. Chaypin yachallanchistaq imayna runata chaskisqanta (Salmos 15:1-5). Yachallanchistaqmi imaynata adoranata munan, imayna kausanantan munan, imatan piensan qhapaq kaymanta chaykunatapas. Bibliaqa yanapawallanchistaqmi astawan kamaqninchista reqsinanchispaq, imata churin Jesucristoq ruwasqantapas yachananchispaqwan (Juan 14:9).

Jehová Diosqa Bibliapin yachachiwallanchistaq kusisqa sumaq suyakuyniyoq kausayta. Yachachiwallanchistaqmi imatan ruwasunman kusisqa familianchis ukhupi kausananchispaq, ama nishuta imamantapas llakikuspa ima. Chaymantapas Bibliaqa kutichinmi vidanchispi aswan importante tapuykunapaq respuestata: imaraykun sufrinchis, imaynan jamuq tiempopi kausay kanqa. Diosqa willawanchismi imatan ruwaran munasqanta cumplinanpaq chaymantapas.

Biblia imayna kasqanmi admirakunapaq jina, chaymi rikuchin Diospuni Biblia yuyaychaq kasqanta. 40 runakunaña qelqaranku 1.600 watapiña chaypas, Bibliapiqa juj temallamantan rimashan Dios yuyaychaq kasqanrayku (2 Timoteo 3:16). Antiguo rollokunan rikuchin Bibliapi yachachikuykunaqa mana cambiasqanta, chaymi juj niray antiguo librokunamantaqa. Chaymantapas imaymanatan ruwaranku Biblia ama traducikunanpaq, ama repartikunanpaq, ama Bibliata leenankupaqpas. Ichaqa manan atirankuchu chaymi kunanqa juj librokunamantapas mundontinpi astawanraq vendekun, traducikun ima. Kay tiempokama kashasqanmi rikuchin ‘Diosninchispa simin wiñaypaq’ kananta (Isaías 40:8).

Diosqa juj garantiatan qowaranchis, munasqanta cumplinanpaqmi juj regalota qowaranchis. Ichaqa Adanmi Diosta mana kasukuspa juchallikuran, chhaynapi paypas wawankunapas wiñay kausayta chinkachipuranku. Chaymi Bibliaqa nin: “Juj runallawanmi juchaqa kay pachapi rijuriran, wañuytaq jucharayku rijuriran; chhaynapin wañuyqa llapa runaman chayaran llapallanku juchallikusqankurayku”, nispa (Romanos 5:12). Chay pasasqanwanmi Diospa munasqanqa manañapas cumplikunanpaq jina kasharan. Jehová Diosrí, ¿imatan ruwaran?

Payqa justo Dios kaspan Adán Evata mana kasukusqankumanta castigaran, ichaqa runakunata munakuspa jamuq tiempopi imayna vidanchis kananta qhawarispa iman juj garantiata qowaranchis. Jehová Diosqa yachaynintan utilizaran  jinaspa decidiran ima ruwananta (Génesis 3:15). Chaypin Diosqa wañuymanta juchamanta librawananchis karan churin Jesucristoq wañuyninwan. ¿Imatan chaypaq ruwanan karan?

Adanpa juchallikusqanta allichananpaqmi Jehová Diosqa churin Jesusta kay allpaman kachamuran, runakunata kausayman aypachinanpaq, chaymantapas “vidanwan pagaspa askha runakunata kacharichinanpaqwan” a (Mateo 20:28; Juan 14:6). Jesusqa mana juchayoqmi karan Adán jina, Jesusmi ichaqa tukuy tiempo Diosta kasukuran wañunankama. Chaymi Jehová Dios kausarichiran janaq pachaman kutinanpaq. Chhaynapin ruwaran Adanpa mana ruway atisqanta: Kasukuq runakunaman wiñay kausayta qoran. “Imaynan juj runallaq mana kasukusqanrayku askha runakuna juchasapa kapuranku, chhaynallataqmi juj runallaq kasukusqanrayku askha runakuna chaninpaq jap’isqa kapunqaku” (Romanos 5:19). Jesuspa wañusqanraykun Diosqa promesanta junt’anqa, chhaynapin runakunaqa wiñaypaq kay allpapi tiyanqaku.

Imaynata Adanpa juchallikusqanta allichasqanpin Jehová Diostaqa astawanraq reqsinchis. Chaypin yachallanchistaq rimasqantaqa manan imapas jark’anqachu, aswanpas munasqantaqa “llapantapuni junt’anqa” (Isaías 55:11). Chaypin Jehová Diospa munakuyninta rikunchis. “Diosqa sapan Churinta kay pachaman kachamusqanwanmi munakuwasqanchista rikuchiran, chhaynapi chay Churinrayku kausayta chaskinanchispaq. Manan noqanchischu Diostaqa munakuranchis, aswanmi pay noqanchistaqa munakuwaranchis, chaymi Churinta kachamuran juchanchisrayku allipunachiy sacrificiota ruwananpaq; chaymi munakuq kayqa” (1 Juan 4:9, 10).

Diosqa sapallan churintan “llapanchisrayku wañunanpaq entregaran, ¿chaychu wakin cosaskunatapas Churinwan kuska ancha kusikuywan mana qowasunman?”. Chayraykun seguro kashanchis prometewasqanchiskunata qowananchismanta (Romanos 8:32). ¿Imatan Dios prometewaranchis? Chaymanta yachashallasun.