Bibliaq yanapayninwan cambianku

¿IMAN yanaparqan rastafari * nisqa runata imayna kausasqanta cambiananpaq, yuraq colorniyoq runatapas amaña cheqnikunanpaq? ¿Imaynapin juj millay maqakuq wayna, drogakunata vendeq mana allin kausayninta saqepurqan? Paykuna kikinku vidankumanta willawasun.

“Manañan juj colorniyoq runakunata cheqnikurqaniñachu” (HAFENI NGHAMA)

¿JAYK’A WATANPIN KASHAN? 34 WATANPI

¿MAYMANTAN? ZAMBIA NACIONMANTA

¿IMAMANTAN WILLAKUSHAN? RASTAFARI NISQAN KARQAN

ÑAUPA VIDAY: Guerra kasqanraykun mamayqa Namibia llaqtamanta ayqekusqa, jinan chhaqrukusqa Organización del Pueblo de África del Suroeste nisqaman (SWAPO, inglés simipi). Chay t’aqamanta runakunaqa Namibia llaqtapi kamachikuqkuna contran sayariqku. Mamay Zambia llaqtapi campo de refugiados nisqapi kashaqtinmi noqaqa nacerqani.

SWAPO nisqapin kasharqani 15 wataykama. Namibia llaqtapi chay t’aqa runakunaqa waynakunatan yachachiqku política nisqamanta, yachachillaqkutaqmi yuraq colorniyoq runakunata cheqnikuytapas.

11 wataypi kashaspan cristiano kanaypaq confirmación nisqata ruwayta munarqani, chaymi iglesiapi pastorman rirqani, chaymanmi riqku católico runakuna, luterano nisqa runakuna, anglicano nisqa runakuna jujkunapas. Chay pastormi ichaqa mana munarqanchu confirmación nisqata ruwanayta. Chay jawan manaña Diospi creerqaniñachu. Chay jinapin 15 wataypi kashaspa movimiento político y religioso de los rastafaris nisqaman jaykupurqani. Reggae nisqa takikuna gustawasqanraykun chaymanqa rirqani, chaymantapas África ladopi yana colorniyoq runakunata nishuta llank’achisqankutan chinkachiyta munarqani. Rastafari runakuna jinan chujchayta ñaqch’akurqani, marihuanatan fumayta qallarirqani, manan ima clase aychatapas mijuqchu kani, yana colorniyoq runakunata defiendeqmanmi tukupurqani. Chaywanpas manan kausayniytaqa cambiarqanichu, maqanakuykunamanta peliculakunatapas qhawashallarqanin. Chaymantapas rimashallarqanin qhelli simikunata.

BIBLIAQ YANAPAYNINWAN CAMBIAPUNI: 1995 watapin 20 wataypi kashaspa allinta piensaykurqani imatachus vidaywan ruwanayta. Unayñan rastafarikunaq qelqankunata leesharqani, wakinqa Bibliaman jinan kasharqan ichaqa manan chaypi explicasqankuqa sut’ichu karqan. Chayraykun noqa kikiypuni Bibliataqa estudiayta munarqani.

Juj rastafari amigoymi qowarqan Jehová Diospa testigonkunaq ruwasqanku juj qelqata. Jinan Bibliawan kuska t’aqwiyta qallarirqani. Tiempoq pasasqanman jinan Testigokunata reqsirqani, paykunaq yanapayninwanmi astawan yachasharqani Bibliamanta. Ichaqa, manaraq Testigokunawan Bibliata estudiashaspan imaymanapi cambiarqaniña.

Noqapaqqa sasan karqan fumayta machayta ima saqeyqa (2 Corintios 7:1). Rijch’ayniytapas allichakurqanin: chujchaytan rutukurqani, manañan qhawarqanichu maqanakuykunamanta qhelli ruwaykunamanta peliculakunata, manañan qhelli rimaykunatapas rimarqaniñachu (Efesios 5:3, 4). Tiempowanqa manañan yuraq colorniyoq runakunatapas cheqnikurqanichu (Hechos 10:34, 35). Kausayniyta cambianaypaqqa uyarisqay takikunatan saqepunay karqan, mana allin ñanman apaq amigokunawanpas manañan juntakurqaniñachu.

Mana allin ruwaykunata saqepusqay qhepamanmi Jehová Diospa testigonkunaq juñukunanku wasita maskharqani. Chhaynapin Bibliamanta yachachiwarqanku jinan decidikurqani bautizakunaypaq. Familiayqa manan kusikurqanchu. Aswanpas mamaymi niwarqan: “Mayqen iglesiamanpas riy, ichaqa ama Testigokunamanchu”, nispa. Gobiernopaq llank’aq juj familiaypas imaymanatan niwaq imatachus ruway munasqaymanta.

Familiayña jark’awarqan burlakuwarqankuña chaypas, Jesusmanta yachasqaymi, paypa ejemplonmi yanapawarqan ama pisikallpayanaypaq. Chaymantapas manan iskayarqanichu Testigokuna cheqaq religión kasqankumantaqa, yachachiwasqankuqa Bibliaman jinapunin karqan. Paykunaqa Diospa kamachikusqantan kasukunku, jujkunamanmi Bibliamanta yachachinku (Mateo 28:19, 20; Hechos 15:14). Manataqmi politicapiqa chhaqrukunkuchu (Salmos 146:3, 4; Juan 15:17, 18).

BENDICIONKUNA CHASKISQAY: Bibliaq nisqanman jina kausayqa allinniypaqmi karqan. Kunanqa manañan marihuanata fumaniñachu, chaypin sapa killa askha qolqeta gastaq kani. Chayta saqepusqayraykun cuerpoymantapas umaymantapas aswan qhali kapuni.

Erqecha kasqaymantapachan imapaq kausasqayta yachayta munarqani, kunanqa yachaniñan. Aswan allinqa Diosman asuykapusqaymi (Santiago 4:8).

“Kunanqa yachanin millay genioyta controlakuyta” (MARTINO PEDRETTI)

¿JAYK’A WATANPIN KASHAN? 43 WATANPI

¿MAYMANTAN? AUSTRALIA NACIONMANTA

¿IMAMANTAN WILLAKUSHAN? DROGAKUNATA VENDEQMI KARQAN

ÑAUPA VIDAY: Wawallaraq kashaqtiyqa nishutan familiayqa astakuq; askha juch’uy llaqtakunapi, jatun llaqtapi iman tiyarqayku, juj tiempon tiyarqayku Protestantismo nisqa religionpa yanapasqan runakunawan. Munaytan primoykunawan tiyoykunawa ima kausarqayku. Challwaq, animalkuna jap’iq iman puriq kayku, bumerán nisqata iman ruwaq kayku.

Maqakuqmi karqani, papaymi yachachiwarqan maqanakuyta erqe kasqaymantapacha, payqa boxeadormi karqan. Adolescente kaspayqa machaqmanmi tukupurqani. Noqamanpas amigoykunamanpas maqanakuymi gustawaqku. Iskay chunka más runakunawanmi navajakunayoq béisbol k’aspikunayoq ima maqanakuq kayku.

Qolqeta tarinaypaqqa drogata, jujkunaq suwasqan cosaskunata iman vendeq kani. Chaymantapas drogata vendeqkunapaqmi llank’aq kani, jujkunaman manusqankutan cobraq kani armakunawan ima amenazaspa. Noqan niq kani: “Kausanaypaqqa wañuchinaymi”, nispa. Runa wañuchiqmanmi tukupuyta munarqani.

BIBLIAQ YANAPAYNINWAN CAMBIAPUNI: Erqellaraq kashaspan Jehová Diospa testigonkunamanta uyarirqani. Ichaqa iskay chunka más wataypi kashaspañan yachayta munaspa paykunamanta mamayta tapurqani. Iskay p’unchay qhepallamanmi Dixon sutiyoq juj Testigo punkuyta tocamurqan. Juj ratu rimasqayku qhepamanmi invitawarqan juñunakuyninman. Chaymantapachan juñunakuykunaman rirqani, kunankamaqa iskay chunka watañan rishani. Tapukuyniykunaman Bibliawanpuni kutichiwasqankun gustawaq.

Jehová Diosqa llapa runakunamanta llakikusqantan yachachiwarqanku (2 Pedro 3:9). Yachallarqanitaqmi payqa munakuq papanchis kasqanta, manaña jujkuna cuidawaqtinkupas pay cuidawananta. Cambiaqtiyqa llapa juchaykunata perdonawananta yachaymi anchata kallpachawarqan. Efesios 4:22-24 textoq nisqanmi sonqoyman chayawarqan. Chaypin rimashan “ñaupaqpi imayna runa kasqanchista wijch’upunanchismanta”, “Diospa munayninman jina kamasqa mosoq runa kaywan p’achakunanchismantawan”.

Manan facilchu karqan kausayniyta cambiayqa. Askha p’unchaykunan mana drogata malliqchu kani, semana tukuytan ichaqa amigoykunawan tupaspa jujmanta drogakuq kani. Repararqanin vidayta cambianaypaqqa amaña paykunawan juñukunay kasqanta, chaymi paykunamanta t’aqakapuspa juj llaqtaman ripurqani. Wakinqa compañawarqankun viajepi, jinan marihuanata munachiwarqanku. Noqan ichaqa nirqani: “Saqepusaqpunin kay viciotaqa”, nispa. Juj llaqtamanña jaykunay kashaqtinmi t’aqanakapurqayku. Juj tiempomantan uyarirqani chay amigoykunaqa juj bancota escopetawan suwasqankuta.

BENDICIONKUNA CHASKISQAY: Manaña chay amigoykunawan tupaspaymi vidayta cambiapurqani. Chay qhepamanmi 1989 watapi bautizakapurqani Jehová Diospa testigon kanaypaq. Tiempo pasasqanman jinan panaypas tayta-mamaypas bautizakapurqanku.

Kunanqa chunka qanchisniyoq watañan casarasqa kashani, kinsan wawaykunapas. Kunanqa yachanin millay genioyta controlakuyta, jujkunaña k’amiwaqtinkupas controlakunin. Chaymantapas imaymana clase runakunatan munakuni, maymantaña kanku ima simitaña rimanku chaypas (Apocalipsis 7:9). Manan jayk’aqpas qonqanichu Jesuspa kay nisqanta: “Sichus yachachisqayta waqaychallankichispuni chayqa, cheqaqtapunin discipuloykuna kankichis, reqsinkichistaqmi imachus cheqaq kasqantapas, chay cheqaq kaqtaqmi kacharichisunkichis”, nispa (Juan 8:31, 32). Chayqa noqa kikiypin junt’akurqan.

[Willakuy]

Kausayniyta cambianaypaqqa uyarisqay takikunatan saqepunay karqan

[Willakuy]

Noqamanpas amigoykunamanpas maqanakuymi gustawaqku. Iskay chunka más runakunawanmi navajakunayoq béisbol k’aspikunayoq ima maqanakuq kayku

[Uranpi willakuy]