Runaq makinpi kasqanchisraykun kay pachapi llapa kawsaqkuna peligropi kashanchis. ¿Hinallatachu Dios chayta qhawanqa? Manan, ñawpaqpi yachasqanchis hina, pisi tiempomantan Diosqa llapa gobiernokunata chinkachipunqa, manataqmi pipas runamasinta ñak’arichinqañachu nitaq pisichanqañachu. Chaykuna yachananchistan kamaqninchis Diosqa munan. Ichaqa, ¿imaynatan willawanchis?

¿Imatan necesitanki mana reqsisqayki llaqtaman chayanaykipaq? Chaypaqqa huk mapatan necesitanki, qhawanaykitaqmi chay ñan imayna kasqanta. Ñanpi tukuy imaymana rikusqaykitan mapawan tupachinayki kanqa, allintachus rishanki icha manachus chayta yachanaykipaq. Chaykunan yanapasunki munasqayki llaqtaman chayanaykipaq. Chay mapaman rikch’akuqtan Diosqa Bibliata qowanchis. Chaypin willawanchis tukukuy tiempo cercaña kashaqtin imakuna sucedenanta. Chaymi imaymana sucedesqanta rikuspa reparasun Bibliaq nisqan hina tukukuy p’unchay kayllapiña kashasqanta.

Biblian willashan manaraq tukukuy chayamushaqtin, kay pachapi mana hayk’aq rikukusqan ruwaykuna kananta. ¿Imakunatan rikukunan karqan?

1. IMAYMANA SASACHAKUYKUNA: Mateo 24 capitulon willashan imakuna sucedenanta, chaymi señal hina huk tiempollapi rikukunan karqan. Chaykuna kaqtinmi yachakunman tukukuy tiempo cercapiña kashasqanta (3, 14 versiculokuna). Willarqanmi guerrakuna, yarqay, pachantinpi terremotokuna ima kananta; suwakuna q’oñirimunanta, runakuna mana munakuq kapunanta, pantasqa religionkuna kanantapas (6-26 versiculokuna). Ñawpaqmantapachan chaykunaqa karqan, ichaqa huk tiempollapi tukuy chaykuna kananmantan Bibliaqa willan. Hinaspapas chay profeciaq hunt’akusqan tiempopin huk kinsa profeciakuna hunt’akunallantaq karqan. ¿Mayqenkunan chaykuna?

2. MANA ALLIN RUWAYKUNA: Bibliaq willasqan hina, ‘tukukuy p’unchaykunapin’ runakuna manaña sumaqtachu kawsananku karqan, ninmi: Runakunan kanqa paykuna kikinkuta munakuqkuna, qolqe sonqokuna, alabakuqkuna, hatunchakuqkuna, runamasinkuta k’amiqkuna, tayta-mamankuta mana kasuqkuna, mana reqsikuqkuna, Diosta mana manchakuqkuna, mana munakuyniyoqkuna, mana khuyapayakuqkuna, yanqa qasi tumpakuqkuna, aychankuq munaynillanta ruwaqkuna, millay yana alma runakuna, tukuy allinkaqta cheqnikuqkuna, amigonkunata hap’iykachiqkuna, waq’a hina ruwaqkuna, paypayman tukuqkuna ima. Chay runakunaqa Dios munakunankutaqa aycha kusichiyllapin puriyta munanqaku”, nispa (2 Timoteo 3:1-4). Ñawpa tiempokunapipas karqanmi chhayna runakuna, ichaqa tukukuy p’unchaypin aswan millayman runakuna tukupunanku karqan. Chaymi Biblia kay tiempota nin ‘sasa tiempokuna’ nispa. ¿Ima ninkin kay tiempopi runaq kawsayninmanta?

3. HALLP’ATA QELLICHASQANKU: Biblian willan pisi tiempomanta Dios “kay pacha waqllichiqkunata [qhellichaqkunata]” chinkachinanta (Apocalipsis 11:18). Noepa tiemponpi hinan kay tiempopipas hallp’anchis qhellichakapushan. Noepa tiemponmantan Biblia nin: “Runakunaqa Diospa qayllanpin waqllipurqanku, kay pachantinpitaq lliw mana chanin-kaypas q’oñirirqan. Diosmi kay pachata qhawarimurqan, hinan waqllisqa kasharqan”, nispa. Chaymi Dios  Noeta nirqan: “Kunanqa kay pachatawan kuskata paykunata p’uchukachipusaq”, nispa (Génesis 6:11-13). Kikiykichá rikushanki runakuna chhayna millay kapusqankuta. Hinaspapas mana hayk’aq kasqan armakunatan ruwashanku, kay hallp’ata llapa runakunatawan chinkachinankupaq hinaraq. Runakunapunin qhellichashan wayrata, unuta, hallp’ata, chaypi tukuy kawsaytawan.

Pachak wata ñawpaqtaqa manan runakuna manchakurankuchu llapa runa chinkachisqan kanankumanta. Kunanmi ichaqa manchasqa kashanku sinchi askha armakuna ruwakusqanrayku, kay hallp’anchis sinchi qhellichasqa kasqanrayku ima. Chhaynaña kashaqtinpas runakunaqa manan imatapas ruwankuchu hallp’anchis limpiakunanpaq. Diosmi ichaqa mana hinallatachu chaykunata qhawanqa, paymi manaraq runakuna kay hallp’ata tukuchishaqtinku paykunata wañuchipunqa.

4. PACHANTINPI PREDICAKUSQAN: Chaymantapas Mateo libron willashan pachantinpi huk sumaq willakuy aparikunanta, ninmi: “Qhapaqsuyumanta [gobiernomanta] allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa (Mateo 24:14). Chay willakuyqa Diospa ‘gobiernonmanta allin willakuykunan’. Manan mayqen iglesiapas chay hina willakuytaqa hayk’aqpas aparirqanchu. Chhaynaqa, ¿mayqen religiontaq chay allin willakuykunata ‘pachantinpi willashan’?

Internetpi kaq jw.org, nisqa direccionpas Diospa ‘gobiernomanta allin willakuykunata’ willananpaqmi lloqsimun. Chaypin 700 más rimaykunapi qelqakuna lloqsimushan. Ichaqa manaraq internet kashaqtinmi Testigokunaqa willasharankuña chay allin willakuykunata. 1939 watapi lloqsimuq Qhawaq revistaq tapanpin niranña: “Jehová Diospa Gobiernonmanta Willashan”, nispa. Religionkunamanta willaq libron nin: “[Testigokunaqa] mana hayk’aq predicakusqantan pachantinpi predicashanku”, nispa. ¿Ima allin willakuykunatan willashayku? Diospa gobiernon pisi tiempomanta tukuy mana allin ruwaykunata tukuchipunanmantan.

Pachak wata hinañan kay revista willashan kay pachapi imaymana sucedesqanta, chaymi kay revista leeqkuna reparanku Bibliaq nisqan  hina tukukuy tiempopiña kashasqanchista. ¿Yaqachu qanpas chayta reparashanki? Ichaqa askha runakunan mana chayta creenkuchu, paykunan ninku: “Yapayuspan chaykunataqa willanku, ñawpaqmantapachan chaykunaqa karqan. Kunanqa facil-llata ima noticiatapas yachakun, chaymi pachantinpi imapas sucedesqanta yachashanchis”, nispa. Honesto runakunan ichaqa reparashanku huknirayña tiempo kashasqanta.

Huk t’aqa científico runakunan investigaspa tarirqanku llapa runakuna peligropi kasqanchista, chaymi 2014 watapi Consejo de Seguridad de las Naciones Unidas nisqaman qelqarqanku: “Allintan analizayku llapa runakuna ima peligrokunapi tarikusqanchista, chaypin kayta tariyku: Ciencia nisqa imaymana maquinakunata ruwasqanmi astawanqa runakunata wañuyman apaykunqa”, nispa (The Bulletin of the Atomic Scientists). Chaykunata yachaspan askha runakuna reparashanku tukukuy p’unchaypaq pisillaña kashasqanta. Ichaqa, ¿manchakunanchischu chay p’unchayta? Manan. Chay p’unchaypiqa askha runakunan salvakunqaku.