GENTECUNACA ministirishca cosascunata yachangapami munan. Nachu quiquinbash tapuripashcangui:

• ¿Ciertopachachu Taita Diosca castigan?

• ¿Ima horapash guerracuna, llaquicunaca tucuringacha?

• ¿Huañushca jipaca maimanda rinchi?

• ¿Huañushcacunataca cutin ricushunllu?

• Taita Dios uyachunga ¿imashinata mañana canchi?

• ¿Imashinata ali causaita ushanchi?

Ashtaca gentecunata shina tapujpica shuj shuj yuyaicunatami nin. Curacunata, pastorcunata tapujpipash paicunapurallatami shuj shuj yuyaicunata charin.

Gentecuna shuj shuj yuyaicunata charijpipash Jesusca Taita Diostaca nircami: ‘Canba Shimica napacha llullanllu’ nishpa ( Juan 17:17). Canba Shimi nishpaca Jesusca Diospa Shimi Bibliamandami parlajurca. Bibliaca na llullanllu. Jahuapi tiajuj 6 tapuicunamanda parlashpaca ¿imatata Bibliaca nin? Chaitaca Bibliapillata ricupashun.

GENTECUNACA ¿IMAMANDATA SHINA NIN?: Cai mundopica ashtaca ashtaca llaquicunami tian. Chaimandami ashtaca religiongunapica, Dios castigajpimi llaquicunata charinchi nishpa yachachin.

BIBLIACA NINMI: Diosca na llaquicunata cachamunllu nishpa. Job 34:10​pica ninmi: ‘Nalita ruranaca Diosmandaca carupimi can’ nishpa. Diosca ninanda juyaimandami gentecunamanga shuj juyailla Alpagutami cusha nin. Chaimandami Jesusca cashna mañanguichi nirca: ‘Jahua pachapi ñucanchi Taitalla, Can mandanaca ucha chayamuchunmi munanchi. Imashinami jahua pachapica can munashcashna ruranajun, cai pachapipash can munashcashna ruranajushpami ali canman’ nishpa (Mateo 6:9, 10). Gentecunata ninanda juyaimandami Taita Diosca paipa shujlla Churiguta cai Alpaman cachamushpa ñucanchita salvarca ( Juan 3:16).

Génesis 1:26-28; Santiago 1:13; 1 Pedro 5:6, 7 textocunatapash ricupangui.

GENTECUNACA ¿IMAMANDATA SHINA NIN?: Guerracunapi ashtacacuna huañunajujpimi shina nin. Ashtahuangarin, tucuicunami imacunamandapash sufrinchi.

BIBLIACA NINMI: Taita Diosca muyundi Alpapi gentecuna ali causachunmi munan nishpa. Cai Alpata Taita Dios mandajpica pipash macanajunataca na yachajungachu. Ashtahuangarin gentecunaca ‘paicunapa espadacunataca, yapuna rejacunamanmi tigrachinga’ ( Isaías 2:4). Taita Diosmi tucui llaquicunata tucuchinga. Bibliapica ninmi: “Taita Diosmi, paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami” nishpa (Apocalipsis 21:3, 4).

Salmo 37:10, 11; 46:9; Miqueas 4:1-4 textocunatapash ricupangui.

GENTECUNACA ¿IMAMANDATA SHINA NIN?: Ashtaca religiongunapica yachachinmi, huañujpica ñucanchi almaca chaishuj vidapi causangapami rin nishpa. Huaquin gentecunaca ninmi, huañushcacunaca muscuchishpami causaj gentecunataca molestan nishpa. Cutin shujcunaca ninmi, ali gentecuna huañushpaca cielomanmi rin, cutin nalicuna huañushpaca infiernopi rupangapami rin nishpa.

BIBLIACA NINMI: Huañushcacunaca na maipipash causangapaj rinllu nishpa. Eclesiastés 9:5​pica ninmi: “Huañushcacunaca, imatapash na yachanllu” nishpa. Shinaca huañushcacunaca na imatapash sintinllu. Causaj gentecunataca na muscuchishpa molestanllu, ayudaitapash na ushanllu (Salmo 146:3, 4).

Génesis 3:19; Eclesiastés 9:6, 10 textocunatapash ricupangui.

GENTECUNACA ¿IMAMANDATA SHINA NIN?: Tucuicunallatami ñucanchi familiacunahuan cushijushpa, tandanajushpa causangapaj munanchi. Chaimandami ñucanchi familia huañujpica paicunata cutin ricungapaj munanchi.

BIBLIACA NINMI: Huañushcacunaca causaringami nishpa. Jesusca nircami: ‘Huañushcacunaca ñuca rimajta uyashpami causaringa’ nishpa (Juan 5:28, 29). Huañushcacuna causarishpaca Dios munashcashnami shuj juyailla paraíso Alpagupi causanga (Isaías 65:21-25). Taita Diosta cazushpaca cutinga na huañungachu, ima ungüitapash na charingachu. Bibliaca ninmi: ‘[Alicunami] llactataca japinga. Chai llactapimi causaita causanajunga’ nishpa (Salmo 37:29).

Job 14:14, 15; Lucas 7:11-17; Hechos 24:15 textocunatapash ricupangui.

GENTECUNACA ¿IMAMANDATA SHINA NIN?: Tucui religiongunapimi Diosta mañanami canchi nishpa yachachin. Shinapash ashtacacunaca ninmi, ñuca mañajpica Diosca na uyanllu nishpa.

BIBLIACA NINMI: Na chaitallata chaitallata nishpa mañanachu canguichi. Jesusca nircami: ‘Diosta mañanajushpaca ama chai shimicunatallata cutin cutin ti­grashpa mañanguichichu’ nishpa ( Mateo 6:⁠7). Taita Dios ñucanchita uyachunga paimanda yachajushpami cazushpa causana canchi. 1 Juan 5:14​pica ninmi, Taita Dios “munashcashna” mañajpica ‘ñucanchi imaguta mañajpipash uyan­llami’ nishpa.

Salmo 65:2; Juan 14:6, 14; 1 Juan 3:22 textocunatapash ricupangui.

GENTECUNACA ¿IMAMANDATA SHINA NIN?: Gentecunaca culquita charishpalla o mushuj, ali ropata charishpalla ali causasha yashpami, chaicunatalla munashpa purin. Shinapash na cushilla causai ushanllu.

BIBLIACA NINMI: “Diosmanda yachajungapaj, paicunapaj shungupi ninanda munajcunaca, ninandami cushijun” nishpa (Mateo 5:3). Jesús nishca shinaca Diosmanda, Diospa munaimanda Bibliapi yachajushpallami cushilla causashun. Bibliata yachajushpallami ali causangapaj ima ministirishcata yachashun. Ashtahuangarin, imata rurajushpapash o imata ruragrijushpapash Bi­bliapi mandashcacunata cazushpallami aliguta causashun (Lucas 11:28).

Proverbios 3:5, 6, 13 -18; 1 Timoteo 6:9, 10 textocunatapash ricupangui.

 Caicamanga ñami 6 tapuicunata Bibliahuan yachajushcanchi. Shinapash ¿nachu pensaripashcangui: Gentecunata llaquishpaca, imamandata Diosca gentecuna sufrishpa causachun saquishca o ñuca familiahuan aliguta causangapaca imatata rurana cani nishpa? Cai tapuicunatapash yachajungapaca Bibliapillatami ricuna canchi..

Shinapash, ashtaca gentecunaca na Bibliata yachajungapaj munanllu. Bibliata ­yachajunaca shinllipachami can, na usharingachu ninmi. Bi­bliata yachajungapaj munajpica, testigo de Je­hovacunaca ishcai ali ayudacunatami charinchi.

Ocupado cashpapash Bibliamanda yachajungapaca, ¿Imatata Bibliaca Yachachin? nishca librotami charinchi. Cai libromi Bibliata jahualla intindichun ayudan. Shinallata, Bibliata yachajungapaj munanimi nijpica, testigo de Jehovacunaca cushijushpami gentecunapa huasiman rishpa Bibliamanda cada semana gratis ashaguta yachachinga. Gentecuna maipi yachajungapaj munashcamanbash ringallami. Mundo enteropi ashtaca ashtaca gentecunaca Bibliata yachajushpami Taita Diosta rijsishca.

Quiquinbash Bibliamanda yachajui callarishpaca shujcuna brujunata o imacunahuanbash dañota ruranataca na manllanguichu. Ashtahuangarin Bibliamanda yachajushpallami imashina ali causanata intindishpa ashtahuan cushijushpa causangui. Jesusca nircami, Bibliapi ‘na llullashpa villashcami’ panda yachachishcacunamanda ‘cacharichinga’ nishpa ( Juan 8:32).