Tucuicunata igual tratachun Taita Dios imata ruragrijushcatami yachajurcani

Ursula Menne paipa causaimanda parlan

Ñucaca uchillamandapachami tucuicunata igual tratachun munaita charishcani. Chaita pactachingapaj munashpa imatapash rurajushcamandami, Alemania oriental llactapi carcelpi churahuarca. Carcelpi cashpami tucuicunata igual tratachunga imata Taita Dios ruragrijushcata yachajurcani. Chaita parlapasha.

Ñucaca 1922 Alemania llactapi Halle nishca pushtupimi nacirircani. Chaica Berlinmandaca 200 kilómetros carupimi can. Halle llactaca más de 1200 huatacuna huashamanllatami, ña tiai callarishca. Shuj gentecunahuan y chai llactamanda gentecunahuanmi protestante yuyaicunataca primero cati callarirca. Ñuca ñaña Kätheca 1923​pimi nacirirca, ñuca papitoca shuj militarmi carca y ñuca mamitaca shuj teatropimi candan carca.

Ñuca Taitami tucuicunata igual tratachun munaita charin carca. Chaimandami ñucapash chai yuyaitallata charircani. Ñuca taita soldado canamanda ña llujshishpaca, shuj tiendagutami churarca. Ñuca causashca pushtupica pobrella gentegucuna tiashcamandami, ñuca taitaca paicunata llaquishpa, micunagucunata fiachishpa cachan carca. Shina llaquishpa fiachijuimandami tiendapash asha asha tucurishpa catirca. Shina pasajta ricushpaca, shujllaca gentecunapa llaquicunata tucuchitaca na ushana cashcataca intindinami cashcasha. Pero jovenguna shuj shuj yuyaicunata charimandaca, chai yuyaita saquinaca dificilmi carca.

Ñuca mamita rurashca cosascunatapashmi yachajurcani. Ñuca mamitami ñuca ñaña Kätheta y ñucatapash, musicata tocanata, candanata, danzatapash yachachirca. Huahua cashpaca, ñucaca cushillami can carcani. Huata 1939​camanga ñuca ñañahuan ñucahuanga cushijushcapachami causarcanchi.

Llaquilla causaimi callarirca

Colegiota tucuchishca jipaca, ballet nishca danzata estudiangapami yaicurcani. Ballet nishca danzapica ñucanchi bailashcacunahuanmi imashna sintirishcataca ricuchin. Shinallata cuadrocunatapashmi pintai callarircani. Chai tiempocamanga cushillami causarcani, shuj shuj cosascunata ruranatami yachajurcani. Shinapimi huata 1939​pica, segunda guerra mundial callarirca. Chai huatamanda ishcai huata jipa, huata 1941​pica, ñuca taitami tuberculosis unguihuan huañuparca.

Guerra tiajpica shuj jatun llaquipachami. Ñuca 17 huatacunata charijpimi jatun guerraca callarirca. Guerra callarijpica imatapash na atinaipami carca. Chai tiempopica tranquilo cashca gentecunapashmi, Hitler runapa yuyaicunata catishpa shujcunata llaquichina yuyaicunata chari callarirca. Shinallata ninanda huañuicuna, llaquicuna tiajpimi gentecunaca ña na tranquilo causaita usharca. Bombacunahuan manllanaita tugyachinajujpimi ñucanchi causashca huasigupash llaquinayai quidarca, ñuca familiapuramandaca taucapurami huañuparca.

Huata 1945​pi, guerra tucurijpica ñuca mamitahuan, ñuca ñañahuanga Halle llactapillatami causanajurcanchi. Chai tiempopica ñucaca ña cazadami carcani, shuj huahuagutapashmi charircani. Pero ñuca matrimoniopi problemacunata charishpami, ñuca cusahuanga separarircanchi. Ñuca huahuata mantiningapaca bailashpa, shinallata cuadrocunata pintashpami trabajai callarircani.

Guerra tucurishca jipaca, Alemania llactaca chuscu partepimi dividirirca. Ñucanchi causanajushca pushtupica, Unión Sovieticamanda autoridadcuna churashca leycunahuanmi causana tucurcanchi. Huata 1949​pica, ñucanchi causanajushca Alemania oriental nishca pushtutaca República Democrática Alemana nishpami parlai callarirca.

Comunista nishca gobiernopa churashca leycunata cazushpa causanami tucurcanchi

Chai huatacunapimi ñuca mamitaca shuj unguihuan irquiyarca. Chaimi ñuca mamitata cuidana tucurcani. Shinallata gobiernocunapa oficinacunapimi shuj trabajota tarircani. Shuj tiempo jipaca, shuj estudiante grupocunahuanmi tandanajurcani. Chai grupocunaca autoridadcunaca tucuicunatami igual tratana can nishpami reclamanajurca. Por ejemplo, shuj jovendaca paipa taita, Hitlerpa yuyaicunata catishcamandami, Universidadpi estudiachunga na chasquirca. Cai jovendaca ñucaca alimi rijsircani, paihuanmi musicata tocanata, o candangapaj cumba tucun carcanchi. Chaimandami, ¿imamandata paipa taitapa culpamanda, paira cashna llaquicunata charina can? nishpa pensarircani. Shinallata gobiernopa contra shayari gentecunahuan ashtahuan tandanajushpami, paicuna rurashca protestacunapipashmi participai callarircani. Shinallata gobiernocunamanda contra parlaj hojacunatapashmi tribunal canllapi pegarcanchi.

Comité Regional de Paz nishcapi, secretaria trabajajujpimi, shujcunata llaquichingapaj cartacunata rurachun mandahuajpimi nali yarihuan carca. Shuj punllaca Comité Regional de Paz nishcapi ñaupaman pushajcunaca, chaishuj Alemaniapi causaj shuj mayorlla jariguta shujcuna contrashpa ricuchunmi, gobiernomanda parlaj hojacunata cachachun mandahuarca. Chaitaca nimamanda nalicachimandami, chai paquetecunata pacashpa nunca na cacharcani.

Carcelpi rijsishca huarmigumi ñucamanga ali villaicunata villahuarca

1951 huatapi junio quillapimi, ishcai policiacuna ñuca oficinaman yaicumushpami, carcelman apahuarca. Shuj huata jipaca, gobiernopa contra nalicunata rurashca nishpami juicioman apahuarca. Tribunal ñaupapi gobiernopa contra hojacunata pegashcatami, shuj estudianteca policiacunamanga villashcarca. Ñucata juicionajujpi difindiringapaj imata nishcataca, pipash na ali uyahuarcachu. Chaimi seis huatacunapa carcelman cachahuarca. Carcelpi cashpami, shuj punllaca irquiyarcani, chaimi prezocunata atindij shuj pushtuman apahuarca. Chaipica tal vez 40 huarmicunami cashcanga, paicunata ricushpami ninanda manllarishpa, caimandaca llujchihuaichi nishpa punguta huajtai callarircani.

Chaimi shuj guardiaca ¿imata munangui? nishpa tapuhuarca.

Caimanda llujchihuaichi. Shuj ladopi ñucatalla vijchahuaichi nishpa caparircani. Shina nijpipash guardiaca na ayudahuarcachu. Shuj tiempo jipaca, shuj huarmigu tucuicunamanda diferente cajtami cuenta japircani. Paica ali tranquila cajta ricushpami, paipa ladopi tiaringapaj rircani.

Paihuan tiarijpimi paica: “ñucahuan tiaringapaj munashpaca, cuidadotami charina cangui” nihuarca. “Testigo de Jehová cashcamandami tucuicuna nalicachishpami ricuhuan” nihuarcami.

Testigo de Jehovacunata gobiernopa contrami can nishpa rijsijtaca, na yachashcarcanichu. Shinapash ñuca huahua cajpi ishcai testigo de Jehovacuna ñuca taitata visitangapaj shamun cashcatami yuyarini. Ñuca taitaca, paicunaca Bibliamandaca cabaltami yachachin nishpami nihuan carca. Chai tiempopica Testigo de Jehovacunataca Estudiantes de la Biblia nishpami rijsin carca.

Cai huarmiguta rijsishpaca cushijuimandami, huacaitapash huacarcani. Paica Berta Brüggemeier shutimi carca. Paitaca “Jehová Diosmanda parlahuai” nircanimi. Ashtaca tiempotami paihuanga yalin carcani. Y casi siempremi Bibliamanda parlan carcanchi. Bibliamanda yachajushpaca, Taita Diospa shutica Jehová cashcata, justo, juyaj Dios cashcatapashmi yachajurcani. Shinallata nali gentecuna nalita rurashcata arreglana cashcatapashmi yachajurcani. Bibliapica Salmo 37:​10, 11​pica cashnami nin: ‘Cunanmanda asha punllacuna jipaca, nali runaca illangami [...]. Ashtahuangarin na jariyajcunami llactataca [o cai alpataca japinga]. Casilla ali causaihuanmi ninanda cushijunga’ ninmi.

Carcelmanda llujshishpaca Alemania occidentalmanmi rircani

1956​pimi, cinco huatacunata carcelpi cashpa llujshircani. Picha punllacuna jipaca, Alemania occidentalmanmi pacajushpa rircani. Chai tiempopica ña ishcai ushigucunatami charircani. Chaimanga ñuca ishcai ushigucunandimi rircani. Paicunaca, Hannelore y Sabinemi can. Ñuca cusamanda divorciarishca jipaca, cutinmi testigocunahuan Bibliamanda yachajui callarircani. Bibliamanda yachajushpaca Jehová Diospa ñaupapi ali ricuringapaj munashpaca, ñuca causaipi cambiocunata ruranapacha cashcatami yachajurcani. Chaimi cambiocunata rurangapaj esforzarishpa 1958​pi bautizarircani.

Cutinmi cazararcani, pero cai viajeca shuj testigo de Jehovami carca. Paica Klaus Menne shutimi caparca. Ñucanchi cazarashca causaica, aligupachami carca. Ishcai huahuagucunatami charircanchi. Paicunaca: Benjamin y Tabiami can. Shinapash, veinte huatacuna huashamanmi shuj accidentepi Klausca huañuparca. Shinapash huañushca gentegucuna paraíso alpagupi cutin causarina esperanzata charimandami tranquila sintirini (Lucas 23:43; Hechos 24:15). Ñucapa chuscu huahuacuna Jehová Diosta sirvijta ricushpami cushilla sintirini.

Bibliata yachajuimandami, Jehová Dioslla ali causaiguta apamunata yachajurcani. Jehová Diosca cada uno pundacunapi imashna causashcata, cunanbi imashina causajushcatami ricun. Chaitaca gentecunaca na yachaita ushanllu. Shujcunata llaquichijpi o ñucatallata llaquichijpimi chaita yachanaca tranquilo sintirichun ayudahuashca. Eclesiastés 5:8​pica: “Llactapica, imagutapash na charijcunata jatun llaquita rurashpa, paicuna japina cashcata na cushpa, paicunaman imatapash cashcatapacha na ruranajujta ricushpaca, ama manllaringuichu. Shuj mandajtaca, paitapash yali mandajmi ricujun. Chai mandajcunatapash ashtahuan yali jatun mandajmi ricujun” nishpami yachachin. Cai versopi jatun mandaj nishpaca, Taita Diosmandami parlajun. Bibliapica: “Paipa ñaupamandaca napacha pacajui ushanllu. Ashtahuangarin paica ima tiajtapash tucuitami aligutapacha ricujun. Ñucanchi imata rurashcatapash paiman villagrinatami charinchi” ninmi (Hebreos 4:13).

Cunanga ña casi 90 huatacunatami charini

Tauca viajecunatami, Hitler mandajujpi y Unión Soviética nishca leycunata catina tucujpica, causaica ¿imashinata carca? nishpa tapuhuan. Chaimi “chai causaica dificilmi carca” nini. Cai alpapi gobiernocuna gentecunata na mandai ushashcatami ricunchi. Bibliapica: “Runaca, paipaj llaquipajllata caishuj runata llaquichishpa charina punllami chayan” ninmi (Eclesiastés 8:9). Cai shimicunaca cabalpachami can

Ñuca joven cashca horasca, gentecunallatami justo, ali causaitaca callarichi ushangami yuyan carcani. Shinapash, Taita Diosllami ali, cushilla causaiguta caramunata yachajushcani. Tucui nalicunata tucuchijpi, Jesús cai alpata mandai callarijpimi chaica pactaringa. Jesusca siempremi shucunapira pensarin carca. Bibliapica Jesusmandaca “imatapash cashcatapacha ruranatami juyashcangui. Nalita ruranataca millanayachishcaguimi” ninmi (Hebreos 1:⁠9). Jesús cai alpata ña mandajujpi, chai alpagupi para siempre causanatami shuyajuni. Jehová Diosta chaita yachajuchun saquihuashcamandaca, ninandami agradicini.

[Foto]

Ñuca ishcai ushicunahuan Hannelore y Sabinehuanmi Alemania occidentalman chayashcalla canchi

[Foto]

Ñuca churi Benjaminhuan y paipa huarmigu Sandrahuanmi capanchi