Inglaterra llactapi 1935 huatapimi nacirircani. Ñuca causajuj pushtuca Black Country nishcami carca. Cai shimicunaca “país negro” ningapaj munanmi. Cai llactapi ashtaca fabricacunamanda yana yana cushni llujshishpa tucui pushtucunapi yana fuyu jundashcamandami shina shutichirca. Ñuca 4 huatacunata charijpimi, ñuca taitacunaca testigo de Jehovacunahuan Bibliamanda estudiai callarirca. Y 14 o 15 huatacunata charishpaca Bibliamanda cabalta yachajujushcatami cuenta japircani. Chaimi 1952 huatapi 16 huatacunata charishpa bautizarircani.

Bautizarishca jipallami herramientacunata y carrocunapa piezacunata ruraj shuj fabricapi trabajai callarircani. Ñucataca chai fabricapi secretario cachunmi yachachihuanajurca. Y chai trabajotaca ninandami gushtarcani.

Shuj punllaca shuj superintendentemi Willenhall congregacionbi Estudio del Libro de la Congregación nishca parteta pactachi ushanguimanlla nishpa tapuhuarca. Imata ruranataca na yacharcanichu. Porque chai tiempopica ishcai congregaciongunapimi reuniongunamanga rijurcani. Chaupi semanapica ñuca trabajo ladolla Bromsgrove nishca congregacionmanmi rijurcani. Chai congregacionga ñuca huasimandaca 32 kilometrocunapimi carca. Cutin fin de semanata ñuca taitacunahuan cashpaca Willenhall congregacionmanmi rin carcani.

Jehová Diospa organizacionda apoyangapaj munaimandami aunque ñuca trabajota saquina cashpapash, superintendente huauqui cushca asignacionda pactachingapaj aceptarcani. Jehová Diospa chai invitacionda chasquishcamandami paita ashtahuan sirvina oportunidadta charipashcani. Chai decisionda japishcamandaca nunca na arripintiripashcanichu.

Bromsgrove congregacionba reuniongunaman rijushpaca Jehová Diosta tucui shunguhuan sirvij shuj panigutami rijsircani. Paica Anne shutimi carca. Paihuanga 1957 huatapimi cazararcanchi. Chai horasmandaca ashtaca bendiciongunatami charipashcanchi. Por ejemplo, precursor regular, precursor especialcunami cashcanchi. Shinallata superintendente viajantepashmi cai ushapashcani. Betelpipashmi sirvi ushapashcanchi. Cai tucui huatacunataca ñuca huarmiguhuanga cushillapachami causapashcanchi.

1966​pica Galaad escuelapa clase 42manmi rircanchi. Chai escuelapi canaca shuj jatun bendicionmi carca.  Ñucanchitaca Malaui llactamanmi cacharca. Chai llactataca el corazón cálido de África nishpami rijsin carca. Chaipi causaj gentecuna cushi cushi, ali alicuna cashcamandami shina rijsin carca. Pero chai llactapica asha tiempotallami carcanchi.

1 de Febrero de 1967 huatapimi Malaui llactaman chayarcanchi. Chaipica shuj quillatami chaipi parlaj idiomata yachajungapaj clasescunata charircanchi. Shinallata chai jipaca superintendente de distrito cachunmi asignahuarca. Shuj carropimi viajan carcanchi. Chai carropimi tucui ladocunaman ringapaj munarcanchi. Incluso riocunatapashmi yalingapaj munarcanchi. Pero na shina carcachu. Porque chai carroca ashalla yacu tiaj pushtucunatallami yali ushan carca. Shinallata huaquinbica alpahuan rurashca chozagucunapimi pacaringapaj quidan carcanchi. Tamia tiempo horasca chai chozaguman yacu ama yaicuchunga imacunatapash churashpami tapan carcanchi. Chai horascunapimi ñucanchi asignacionda pactachinaca asha difícil carca. Pero shina cajpipash cushillami yalin carcanchi.

Ñucanchi sirvinajuj llactapica abril quillapimi shuj shuj problemacuna ricuri callarirca. Radiopica Malaui llactapa presidente parlajujtami uyarcanchi. Chai radiopica doctor Hastings Bandaca testigo de Jehovacunaca politicocunapa contra y impuestocunatapash na paganllu nishpami juchachijurca. Pero chai nishcacunaca na ciertochu carca. Paicunaca ñucanchicuna politicapi na chapurishcamanda, paicunata na apoyashcamandami shina culirashpa llullacunata ninajushcarca.

Septiembre quillapa periodicopica Malaui llactamanda presidente, testigo de Jehovacunata shuj shuj ladocunapi problemacunata ruranajun nishpa culpashcami llujshishcarca. Cai politicocunaca cai llactapica testigo de Jehovacunaca ñana tianachu can nishpa prohibingapami tandanajushcarca. Chai leyca 20 de Octubre de 1967​pimi pactari callarirca. Chai jipallami chai llactapi policiacunaca sucursalta  vichachishpa chai llactapi caj misionerocunatapash chai llactamanda expulsangapaj rirca.

Quimsa punllacunata carcelpi cashca jipami Mauricio nishca llactaman cacharca. Chaiman chayajpica autoridadcunaca chaipi quidachunga na saquircachu. Chaimandami Jehovapa organizacionga ñucanchicunataca Zimbabue llactaman cacharca. Chaiman chayajpica shuj policiami entradapi shayajushcarca. Paica: “Quiquingunataca Malaui llactamandami expulsarca. Mauricio llactapipash na quidachun saquircachu. Quiquingunapa bienbi ricushpallami caimanga shamushcanguichi” nircami. Chaimi ñuca huarmiguca huacai callarirca. Nipipash ñucanchita na ricunayachijtami sintircanchi. Chaimandami Inglaterra llactapirapash cashcaiman yashpa pensarcani. Pero jipamanga autoridadcunaca cayandi punllaca cuartelmanmi presentarina canguichi nishpami chai tutataca chaipi quidachun saquirca. Ñucanchicunaca shaijushcami carcanchi. Shinapash ima pasana cajpipash chai problemataca Jehovapa maquipimi saquircanchi. Cayandi punlla chishipaca, Zimbabue llactapi como visitante cuenda quidachunmi saquirca. Shina pasajushcamandaca Jehová Dios ñucanchita ayudajushcatami seguro caparcanchi.

Zimbabue llactapa sucursalpimi trabajajurcani. Chaimandami Malaui y Mozambique llactapi asuntocunata ricuchun, Departamento de Serviciopi sirvichun asignahuarca. Malaui llactamanda huauquipanicunaca catiriashpa llaquichijpipashmi ninanda aguantanajurca. Ñucaca Malaui llactamanda superintendente de circuito huauquicuna cushca informeta traducishpami ayudan carcani. Shuj viajeca shuj informeta traducishpami tutacaman quidarcani. Ñuca huauquipanicuna chai llactapi ninanda llaquichi tucushpa sufrinajujta liishpami, llaquirishpa huacai callarircani. * Shinapash chai llaquicunata aguantashpa Jehová Diospi shinlli feta charijta ricunami, ninanda animahuarca (2 Cor. 6:4, 5).

Malaui llactamanda huauquipanicuna Jehovamanda yachajushpa catingapaj publicaciongunata charichun y Mozambique llactaman pacajushpa rishca huauquipanicunapash publicaciongunata charichunmi ayudangapaj ninanda esforzarircanchi. Malaui llactapica Chichewa idiomatami gentecunaca ashtahuanbachaca parlan. Cai idiomaman traducij equipomi Zimbabue llactaman cambiarirca. Shuj huauquigumi paipa alpacunapi shuj oficinata construishpa traductorcunapapash huasicunata construirca. Chaipimi cai equipo de traduccionga publicaciongunata traducishpa cati usharca.

Malaui llactapi caj superintendente de circuito huauquicuna cada huata Zimbabue llactapi asamblea de distritota chichewa shimipi uyachunmi tucuita organizarcanchi. Chai asambleapi uyashca discursocunapa bosquejocunatami huauquicunamanga cun carca. Shinami Malaui llactaman tigrashpaca, chaishuj huauquipanicunamanbash asambleapi imata yachachishcata paicunamanbash villan carca. Shuj viajeca Zimbabue llactapimi Escuela del Ministerio del Reino nishcata organizarcanchi. Chai reunionga superintendente de circuito huauquicunata ayudangapaj, animangapami carca.

Febrero de 1975 huatapimi Mozambique llactapi Malaui llactamanda pacajushpa shamushca huauquipanicunata visitangapaj rircani. Chai huauquicuna chaipi cashpapash, Jehová Diospa organización cushca instrucciongunataca tucuitami catinajurca. Hasta anciano huauquicunatapashmi nombrashca carca. Cai anciano huauquicunaca discursocunata, texto diariota liingapaj, Villajun revistata estudiangapaj, asambleacunata rurangapapashmi organizarin carca. Chai pushtupi paicuna asambleata organizashpaca, departamento de limpieza tiachun, alimentocunata huauquipanicunaman cungapaj y tucui seguro cachunmi aliguta organizarin carca. Jehovapa ayudahuanmi chai huauquicunaca chai tucui cosascunata rurai ushashcarca. Chai huauquipanicunata visitashpaca ñucarami animarishca llujshircani.

Ña 1970 huata tucurijujpimi Malaui llactamanda huauquipanicunata ayudachunga, Zambia llactamanda sucursalta asignarca. Pero ñucaca Malaui llactamanda huauquipanicunataca yariami catircani. Paicunamandapash Jehovata mañashpami catircani. Zimbabue llactamanda Comité de Sucursalpi sirvijuimandaca, tauca viajecunatami jatun Betelmanda huauquicunahuan tandanajun carcanchi. Chai reuniongunapica Malaui, Sudáfrica y Zambia llactacunapi predicacionda ñaupaman pushanajuj huauquicunapashmi can carca. Ñucanchicunaca siempremi Malaui  llactamanda huauquipanicunamanda imata ashtahuan rurai ushashcapi pensarin carcanchi.

Tiempohuanga Malaui llactapi testigo de Jehovacunata catiriashpa llaquichinataca asha ashami saquinajurca. Chaimandami huauquipanicunaca chai llactamanllata asha asha tigranajurca. Chaimandami Malaui llactapi quidashca huauquipanicunaca más tranquilo causai usharca. Shinallata chai llactapa huaquin pushtucunapica Jehová Diosta sirvichunga ñana ninanda prohibinajurcachu. Y 1991 huatapica Mozambique llactapipashmi testigo de Jehovacuna Jehová Diosta sirvichun saquirca. Pero ñucanchicunaca: “Malaui llactamanda huauquipanicunataca ¿ima horashi Jehovata libre sirvishpa catichun saquinga?” nishpami tapurin carcanchi.

Antsicarinmi 1993 huatapica Malaui llactapi testigo de Jehovacuna Jehovata libremente sirvichun saquirca. Y asha tiempo jipaca shuj misionero huauquigumi: “¿Malaui llactamanga cutin tigranguicha?” nishpa tapuhuarca. Ñucaca ñami 59 huatacunata charircani. Chaimandami huauquitaca: “Cutin tigrangapaca ñucaca ñami mayorllagu cani” nircani. Shinapash chai chishillatami Cuerpo Gobernantemanda shuj cartata chasquircanchi. Chai cartapica Malaui llactaman tigrachunmi invitajurca.

Zimbabue llactapi sirvinataca ninandami gushtarcanchi. Chaipica tauca amigocunatami charircanchi. Chaimandami Malaui llactaman tigranata decidinaca difícil carca. Cuerpo Gobernanteca ñucanchicunataca Zimbabue llactapi quidangapaj munashpaca quidai ushanguichimi nircami. Ñucanchicunapaca chaipi quidanata agllanaca facilmi canman carca. Shinapash Abrahán y Sarapa ejemplotami yarircani. Paicunaca ña mayorllagucuna cashpapashmi paicuna ali causanajushcata saquishpa Jehová Diospa voluntadta rurarca (Gén. 12:1-5).

Jehovapa organización cushca instruccionda catishpami, 1 de febrero de 1995 huatapica Malaui llactaman tigrarcanchi. 28 huatacuna jipami chai llactamanga tigranajurcanchi. Chaiman tigrajpica shuj Comité de Sucursaltami formarca. Chaipica ñuca y ishcai huauquicunahuanmi carcanchi. Y asha tiempo jipaca Jehovata ashtahuan sirvingapami shuj shuj cosascunata organizai callarircanchi.

Jehová Dios bendiciajushcamandami 1993 huatamanda 1998 huatacamanga, 30 mil publicadorcunamandaca 42 mil yali publicadorcuna tucurcanchi. * Jehovapa obra ashtahuan mirajushcamandami Cuerpo Gobernanteca shuj sucursalta construichun aprobarca. Chaimandami Lilongüe llactapica 12 hectariata charij shuj terrenota randircanchi. Y chaipimi Comité de Construccionbi trabajachun asignahuarca.

 Mayo de 2001 huatapimi Cuerpo Gobernantemanda Guy Pierce huauquiguca, cai mushuj sucursalpa discurso de dedicacionda curca. Cai reunionbica cai llactamandallata más de 2 mil testigo de Jehovacunami carca. Paicunamandaca mayoriami 40 huatacunata yali ña bautizarishca carca. Cai huauquipanicunaca catiriashpa llaquichinajujpipashmi tauca huatacunata Jehovata sirvishpa aguantashpa catinajushcarca. Cai huauquipanicunaca ashalla cosasgucunatami charirca. Shinapash Jehová Diosca paicunataca ninandami bendiciashcarca. Chaimandami paicunaca cai mushuj Beteltaca cushijushpa visitanajurca. Chai huauquipanicunaca sucursalta visitanajushpaca canticocunata candai candaimi purinajurca. Chaita ricunaca ñucataca ninandami cushichihuarca. Chai huauquipanicuna shinlli fehuan Jehovata sirvishpa catishcamandami, Jehová Diosca paicunataca ninanda bendiciashcarca.

Sucursalta construishca jipallami shuj shuj Salón del Reinocunata dedicachun asignahuarca. Malaui llactapi shuj shuj Salón del Reinocunata construinajushcamandami, huauquipanicunaca ninanda beneficiarinajurca. Salón de Reinota nara charishpaca, huauquipanicunaca eucaliptohuan rurashca shuj huasi cuendagupimi tandanajun carca. Chai huasipa techocunataca esteracunahuan, turu alpahuanmi tapan carca. Shinallata bancacunapimi tiarin carca. Pero cunanga, huauquipanicunaca ladrillocunata rurashpami Salones del Reinocunata construin carca. Shinapash paicunaca sillacunata utilizanapa randica, bancacunatallatami utilizangapaj munan carca. Porque “bancapimi taucacuna tiari ushanchi” ninmi carca.

Jehová Dios huauquipanicunata imashna espiritualmente ayudashcata ricunami ninanda cushichihuashca. Por ejemplo, Africamanda joven huauquicunaca imata rurangapajpash paicunallatami ofrecirin carca. Y Jehovapa organización imata ruranata yachachijpica ñapashmi yachajun carca. Jehová Diospa organización shina yachachishcamandaca, chai huauquicunaca Betelpi o congregaciongunapipash shuj shuj responsabilidadcunatami chasquirca. Chai llactamandallata chairalla nombrashca superintendente de circuito huauquicunaca congregacionmanda huauquipanicunataca ninandami ayudanajurca. Superintendente huauquicunamandaca mayoriami cazadocuna carca. Y paicunaca Jehová Diosta sirvishpa cati ushangapaca paicunapa familia o shuj gentecuna atichinajujpipashmi, huahuacunata na charishpa Jehovata ashtahuan sirvinata decidishcarca.

52 huatacunatami África llactapica cashcanchi. Pero ñuca saludhuanmi asha asha nali tucushcani. Chaimandami Cuerpo Gobernanteca ñucanchicunata Gran Bretaña sucursalman cachachun aprobarca. Ñucanchi asignacionda saquishpaca llaquillami sintirircanchi. Pero Gran Bretañapi sucursalmanda huauquipanicunaca ñucanchitaca ninandami cuidashca.

Ñuca causaipi Jehová Dios imata ruranata yachachichun saquishcamandaca na arripintirinichu. Ñuca munaitalla rurashca cashpaca cunangunapica imacha tucuiman carcani. Jehová Diosca ñuca ali cachun imata minishtijtaca alimi yacharca (Prov. 3:5, 6). Joven cashpaca jatun empresacuna imashna funcionajtami yachangapaj munan cariani. Pero Jehovapa organizacionga chaicunata yalimi ñucataca yachachihuashca. Jehovata sirvinaca pundacunapash, cunangunapipash cushilla ali causachunmi ayudahuashca.