Gentecunaca tapunmi

Yahuarmanda Bibliapi mandashcacunata ricushpaca, testigo de Jehovacunaca paicunapa yahuartallata llujchishca jipa cutin paicunapa cuerpopillata churarinamandaca ¿imatata yuyan?

Testigo de Jehovacunaca Bibliapa mandashcapi aligutapacha pensarishpami dicidina can. Chaimandami ñucanchipa munaitalla ruranapa randi o doctorcuna nishcatalla ruranapa randica, Jehová Dioshuan ali amigo cashpa catinatara primero ricuna capanchi.

Causaica Jehová Diospa cashcamandami yahuartaca napacha micunachu nishpa mandarca (Génesis 9:​3, 4). Causai yahuarpi cashcamandami israelitacunamanga: “Causaita charijcunapaj causaica yahuarpimi. Yahuartaca, juchata anchuchijuchun cangunapaj almamanda cushpa, altarpi churashpa rupachinajuchunmi curcani” nishpami mandarca. Shinaca animalcunata micungapaj huañuchishpaca ¿imatata rurana carca? Taita Diosca, ‘yahuarta shitashpami alpahuan quilpana’ nishpami mandarca * (Levítico 17:​11, 13). Cai leytaca tauca viajemi mandashpa saquirca (Deuteronomio 12:​16, 24; 15:23). The Soncino Chumash nishca judiocunapa libropica: “yahuartaca na alichinachu, na micunachu, chaipa randica alpapimi talishpa saquina” nircami. Israelitacunaca ima yahuarta cashpapash, chai yahuarta imapapash na utilizanachu carca. Causaica Taita Diospa cashcamandami chashna rurana carca. Ni maijan israelitacunapash yahuartaca na japijuna, na utilizajunachu carca. Causaica Taita Diospa cashcamandami respetana carca.

Moisesman Cushca Leyta cazushpa causanataca, Jesús huañushpami chai mandashcataca tucuchirca. Shinapash cunangamanmi yahuarca Taita Diospa ñaupapica valishca can. Taita Diospa espíritu santo yarichijpimi apostolcunaca, punda Jesusta catijcunamanga ‘yahuartaca napacha micunachu’ nirca. Chai mandashcata cazunaca importantemi carca. Chai mandashcata na cazushpaca, huainayana o yanga dioscunata adorashpa juchata rurajuj cuendallatami carca (Hechos 15:​28, 29; 21:25). 1900 huatacunamanda callarishpami, shujcunata salvangapaj nishpa ñucanchi yahuarta shujcunaman cuna, yahuarta ñucanchi cuerpopi churarina tratamientocunaca ashtahuan rijsishca tucurca. Shinapash testigo de Jehovacunaca yahuarta churarinaca Taita Diospa ñaupapica nali cashcatami ali intindirca. *

Huaquinbica operangapaj huaquin semanacuna faltajpillatami doctorcunaca yahuarta llujchishpa alchichun mandan. Shinami operarijujpi huaquinbi yahuarta churana tucujpica, paipa yahuartallata churashun nishpa. Shinapash yahuarta llujchishpa alchishca jipa, alchishca yahuarta jipaman cutin churashpaca, Bibliapi Levítico, Deuteronomio libropi mandashca leycunata na cazujushcatami ricuchinchiman. Chai librocunapica yahuartaca na llujchishpa alchijunachu, ashtahuangarin Taita Diosman causaita tigrachijui cuenda cangapajmi yahuartaca alpapi talina nijunmi. Cunanbica Moisesman Cushca Leycunata catina obligaciondaca na charinchichu, shinapash testigo de Jehovacunaca Moisesman Cushca Leycunapi yahuarmanda imata nijujta ali intindimandami yahuartaca na churarinchi. Yahuartaca alpapimi talishpa saquina nishpa mandashcata cazuimandami, ñucanchipa yahuarta shujcunapa cuerpopi churachun o ñucanchi cuerpopillata jipaman churachun nishpaca yahuartaca na alchinchi. Yahuarta ñucanchi cuerpopi churarishpaca, yahuartaca na churarinachu nishpa mandashcataca na cazunajunchimanllu.

Yahuarpica imatapash yachangapaca shuj shuj examengunatami ruran. Pero chaita rurashcamanda Taita Diospa mandashcata na cazunajunchichu nitaca na usharinllu. Por ejemplo, ashtaca testigo de Jehovacunaca, examenda rurashca jipa doctorcuna yahuarta shitajta yachaimandaca examen de sangretaca ruranllami. Pero huaquinbica doctorcunaca yahuarta utilizashpa shuj tratamientocunatapash rurachunmi nin.

Por ejemplo, huaquin operaciongunapica hemodilución nishca tratamientotami ruran. Cai hemodilución nishca tratamientoca, shuj maquinaguhuan operaita tucuchingacaman cuerpopi conectashpami, shuj parte yahuartaca separashpa charin. Chai yahuarta separashca jipaca, cuerpopi asha puchushca yahuarhuanmi shuj jambita conectashpa chai yahuarta mirachin. Chai jipami ladoman separashca yahuartaca, cutin cuerpoman tigrachin. Shinami cuerpo ima tanto yahuarta minishtishca tantotallata cuerpopi churashpa saquin. Cutin huaquinbica, operajujpi llujshijuj yahuarta ama ashtahuan pirdingapaca, shuj maquinaguhuan yahuarta japishpa limpiashpami cutin cuerpoman tigrachin. Cutin huaquinbica yahuarta shuj maquinaman yalichishpami ñucanchi corazón, pulmón, riñón rurana trabajotaca rurachin. Chai jipami chai maquinaca yahuartaca cutin cuerpomanllata tigrachin. Shinallata yahuarta shuj maquinaguman yalichishpa, chai maquinahuan yahuarmanda imapash nalicunata anchuchishpa o na cashpaca yahuarmanda imapash partecunata llujchishpami cutin cuerpoman tigrachin. Shinallata huaquinbica shuj maquinaman yalichishca yahuartaca, chai yahuarpi imapash jambihuan chapushpami cutin cuerpoman tigrachin.

Cada doctormi chai tratamientocunataca ashaguta diferenteta ruraita ushan. Shinallata jipamanga shuj shuj tratamientocunapash, shuj shuj examengunapashmi tiai callaringa. Ima tratamientotapacha catinataca ni pipash na ningachu. Testigo de Jehovacunaca imapash operacionda charigrijushpa o imapash examenda ruragrijushpa o imapash terapiata ruragrijushpaca, paipa yahuarhuan imata ruranataca cada unomi decidina can. Operajuj horas ushashca yahuartaiman pirdijujpica, ima tratamientotashi rurahuanguiman nishpami doctortaca nara operación punlla cajpillatami ña tapushcalla cana capangui. Chai jipami concienciapi ali sintirina decisionda agllana capangui (recuadrotapash ricupangui).

Testigo de Jehovacunaca Jehová Diosta candallami siempre sirvisha nishpa bautizarishcata, shinallata Jehová Diostaca candalla ‘tucui shunguhuan, tucui almahuan, tucui ushaihuan, tucui yuyaihuanmi’ juyasha nishcatapash pactachinataca yaipimi charina can (Lucas 10:27). Cai mundopi ashtaca gentecunahuan ricushpaca, testigo de Jehovacunapaca Taita Dioshuan ali amigo canami importantepacha can. Causaita cuj Taita Diosca, Jesús paipa causaita ñucanchimanda cushcapi confiana canguichi ninmi. “Jesucristopaj yahuarmandami, Diosca ninandapacha juyashpa, ñucanchipaj juchacunataca anchuchishpa quishpichirca” (Efesios 1:7).

[Notacuna]

[Recuadro/Foto]

CASHNAMI TAPURITA USHAPANCHI

Imapash maquinata ñuca cuerpopi conectashpa, asha yahuarta separashpa charishpa y chai yahuarta ñuca cuerpopi cutin churajpica ñuca concienciaca ¿alicha sintiringa?

Imapash examenda o terapiata ruragrijushpa, ñuca cuerpomanda yahuarta llujchishpa imapash limpiezacunata o ñuca yahuarhuan tratamientocunata rurashpa ñuca cuerpopi churajpica ñuca concienciaca ¿alichu sintiringa?