¿Imamandata Jehovatalla sirvingapaj decidina canchi?

“Caina tutaca, Taita Diosmi shuj angelta cachamurca. Chai Taita Diostami ñucaca sirvishpa, adorashpa causajuni” (HECH. 27:​23, La Biblia, Traducción del Nuevo Mundo [TNM]).

1. a) Bautizarita ushangapaca ¿imatata rurana can? b) ¿Ima tapuicunatata yachajugripanchi?

“BAUTIZARIGRIJUJCUNAPA discursota ña tucuchingapami bautizarigrijujcunataca ¿ñachu quiquingunapa juchacunamanda arripintirishpa, Jesús huañushcapi crishpa salvari ushashcata, Jehová Dios candallami siempre sirvisha nishpa mañapashcanguichi? nishpa tapun. Shinaca Jesuspa discipulocunaca ¿imamandata Jehovatallami siempre sirvisha nishpa mañana can? Chaita ruranaca ¿imacunapillata ayudan? Taita Diospa ñaupapi ali sirvita ushangapaca ¿imamandata chaita ruranaca minishtirishcapacha can? Cai tapuicunata ashtahuan yachajungapaca primeroca, Jehovatalla sirvingapaj decidina ima cashcatarami aliguta intindina capanchi.

2. Jehovatalla sirvingapaj decidinaca ¿imata can?

² Jehovatalla sirvingapaj decidinaca ¿imata can? Chaipaca apóstol Pablo imata nishcata ricupashunchi. Paica pambarigrijuj barcopi rijushpami, ‘Taita Diostami ñucaca sirvishpa causajuni’ nirca. Shina nishpaca, Jehová Diospalla cashcata y paitalla adorajushcatami apóstol Pabloca ricuchijurca. (Hechos 27:​22, 23, * 24, liipangui).  Cai mundota ‘Diablo mandajujpipash’ ñucanchicunaca Jehová Diostalla adorashpami causanajupanchi (1 Juan 5:19). Jehovatalla adorashpa causai ushachunga ¿imata ayudashca? Chaipaca shuj oracionda rurashpami Jehová Diostalla sirvisha nishpa prometishcanchi. Chaita rurashca jipami bautizaripashcanchi.

3. Bautizarishpaca ¿imatata Jesusca ricuchijurca? Jesuspa ejemplota catingapaca ¿imatata cristianocunaca rurana can?

³ Jesusca ña bautizarishpami paipa Taitapa voluntadtalla rurashpa causangapaj decidishcataca ricuchirca. Jesusca Jehovatallami siempre sirvisha nishpa mañajunataca ñana minishtircachu. Porque paica Taita Diosman pertenecij Israel llactapimi nacirica. Paica, Moisesman Cushca Leypi nishcatallaca na pactachijurcachu. Bibliapi nishcashnaca Jesusca Jehová Diostami cashna nijurca: ‘Ricui Taita Dioslla, canba munaita pactachingapami shamuni’ nirca (Heb. 10:7; Luc. 3:21). Jesusca bautizarishpami paipa Taitapa voluntadta rurashpa causana cashcataca ricuchijurca. Cunanbipash Jesuspa ejemplota catishpami cristianocunaca bautizarishpa Jehovatalla sirvingapaj decidishcataca ricuchipanchi.

Jehovatalla sirvisha nishpa prometinaca ¿imashinata ayudan?

4. David y Jonatanba ejemplomandaca ¿imatata yachajupanchi?

⁴ Jehovatallami sirvisha nishpa prometinaca shuj importantepacha promesami can. Chai promesata ruranaca ¿imashinata ayudan? Chaita intindingapaca huaquin ejemplocunata ricupashunchi. Primeroca amigocuna tucunamanda ricupashunchi. Amigocunata charingapaca ñucanchirami ali amigocuna cana capanchi. Shinallata ñucanchi amigocunata cuidana responsabilidadta charishcataca yaipimi cana capanchi. Bibliapica ishcai ali amigocunamandami parlan. David y Jonatanga ali ali amigocuna caimandami paicunapura shuj promesata rurarca (1 Samuel 17:57; 18:​1, 3, liipangui).  Cunanbica David y Jonatanshna ali ali amigocunaca huaquingunallami tian. Imashinami ricupanchi ali amigocuna cangapaca amigocunapura cuidarina y ayudarina responsabilidadtami charipashcanchi (Prov. 17:17; 18:24).

5. Shuj esclavo paipa amota para siempre sirvishpa causangapaca ¿imatata rurana carca?

⁵ Cati ejemplota ricupashunchi. Israel llactapica huaquin esclavocunaca paicunapa amotalla tucui vida sirvingapaj munashpami shuj tratota ruran carca. Cai tratomanda parlashpami Moisesman Cushca Leypica cashna nijurca: ‘Sirvij runaca: ‘Ñuca amota, ñuca huarmita, ñuca huahuacunatapash juyanimi, na saquishpa Ilujshishachu’ nijpica, paipa amoca, paitaca juezcunapamanmi pushanga. Chai jipaca, paitaca pungu ladopi, na cashpaca pilar ladopi shayachishpami paipa amoca, rinrita utujuna jirruhuan rinrita utujunga. Shina rurajpimi, huañungacaman paita servishpa causanga’ nijurcami (Éxo. 21:​5, 6). Bibliapi nishcashnaca shuj esclavo paipa amota para siempre sirvishpa causangapaj munashpaca shuj tratotami paipa amohuan rurana carca. Shinami esclavoca paipa amo ali ali cashcamandaca paitalla sirvishpa causai usharca.

6, 7. a) Shuj promesata ruranaca ¿imacunapillata ayudan? b) Jehovatalla sirvisha nishpa prometinaca ¿imashinata ayudan?

⁶ Shuj ejemplotapash ricupashunchi. Cazaranaca shuj importante compromisomi can. Porque cazarashpaca papelta firmashca jahuapash ñucanchi huarmiguhuan o cusaguhuanmi shuj promesata ruranajupanchi. Chaimandami chai promesataca cumplingapapacha munapanchi. Shuj pareja nara cazarashpallata igual causai callarishpaca ni paicunapura, ni paicunapa huahuacunatapash aliguta cuidaita na ushangachu. Pero ña cazarashca cusahuarmicunaca Taita Diospa ñaupapi ali ricuringapaj munaimandami ima problemacuna ricurijpipash juyaihuan arreglangapaj esforzaringa (Mat. 19:​5, 6; 1 Cor. 13:​7, 8; Heb. 13:​4).

⁷ Último ejemplota ricupashunchi. Trabajo contratocuna. Punda tiempomandapachami contratocunata ruranaca ninanda ayudashca (Mat. 20:​1, 2, 8). Shinaca shuj negociota nara rurashpallata o pipapash nara trabajai callarishpallata shuj contratota ruranami randimanda beneficiarichun ayudanga. Imashinami yachajupashcanchi, randimanda shuj promesata o shuj contratota firmanami amigocuna canapi, matrimoniopi, trabajopipash ayudan. Porque imata prometishcata y contratopi imata nishcata cumplingapami esforzarishun. Shinallata shuj contratota rurajuj cuendami Jehovatalla sirvisha nishpa prometishcanchi. Shina ruranaca ñucanchi tucui causaipi Jehovatalla sirvishpa causachunmi ayudan. Cati parrafocunapica Jehovatalla sirvisha nishpa prometina imashina punda tiempocunapi ayudashcata y chai promesa imamanda shuj promesacunamanda diferente cashcatapashmi yachajupashun.

Jehovatalla sirvisha nishpa prometinaca ¿imashinata israelitacunataca ayudarca?

8. ¿Imatata israelitacunaca prometirca? Chai promesaca ¿imatata ricuchijurca?

⁸ Israelitacunaca shuj promesata rurashpami Jehovapalla cashcata ricuchirca. Jehová Diosca Sinaí urcu ñaupapi tandachishpami israelitacunataca cashna nirca: “Ñuca imata nijta uyashpa, ñucahuan ari ninajushcatapash cazushpaca, tucui gentecunata ashtahuan yali ñucapajlla cachun agllashca ninan valishca gentecunami canguichi” nircami. Shina nijpimi ‘tucuilla israelcuna, shujllashnalla cashna nishpa tigrachinajurca: Mandaj Dios tucui imatalla nishcataca, tucuitami rurashun’ ninajurcami (Éxo. 19:​4-8). Israelitacunaca obligacionmandallaca na shina nircachu. Paicunaca Jehová Diosman pertenecishcata ricuchingapami shina prometirca. Shina nijpimi Jehová Diospash ‘ñucapalla cachun agllashcacunami’ canguichi nirca.

9. Jehovatallami cazushun nishpa prometinaca ¿imacunapillata israelitacunataca ayudarca?

⁹ Jehová Diostalla cazushpa causangapaj prometinaca israelitacunataca ninandami ayudarca. Jehová Diosca paicunataca nunca na saquircachu. Siempremi llaquishpa paipa huahuacunatashna tratarca. Paicunataca cashnami nirca: “¿Shuj mamaca, pai ungushca huahuataca cungangachu? ¿Paipaj vijsamanda Ilujshishca churitaca, fiñangachu? Chai mama cungajpipash, candaca ima horallapash ñucaca na cungashachu” nirca (Isa. 49:15). Jehová Diosca Leycunata cushpami aliguta causachun paicunataca ayudarca. Shinallata profetacunata cachashpami israelitacunataca shinllichirca. Y angelcunata utilizashpami paicunataca cuidarca. Chaimi Salmo librota escribij runaguca nirca: “Jehová Diosca ‘Jacobopa mirai israelcunamanmi, paipa Shimicunataca villarca. Pactachinajuchun pai cushca shimicunatapash, pai yachachishca shimicunatapashmi curca. Maijan llactacunahuanbash, chashnataca na rurarcachu’ nircami (Sal. 147:​19, 20; Salmo 34:​7, 19; 48:14, liipangui). Jehová Diosca imashinami paiman pertenecij Israel llactata cuidarca shinallatami, cunanbipash paitalla sirvingapaj decidishca cristianocunataca cuidajun.

¿Imamandata Jehovatalla sirvingapaj decidina capanchi?

10, 11. ¿Imamandata Taita Diospa familiapica na naciripanchi?

¹⁰ Huaquingunaca ninmi: “Jehovata sirvi ushangapaca ¿imamandata Jehovatalla sirvingapaj decidishpa bautizarina canchi?” nishpa. Yuyaripashunchi, Adanba huahuacuna caimandaca pecadorcunami capanchi. Chaimandami Taita Diospa familiapica na naciripashcanchi (Rom. 3:23; 5:12). Solo Jehovatalla sirvingapaj decidishpami Taita Diospa familia caita ushapanchi. ¿Imamandata shina nipanchi?

¹¹ Ni maijan taita na paipa huahuacunaman shuj alipacha causaiguta cuitaca ushashcachu (1 Tim. 6:19, TNM). Adán y Evapa culpamandami gentecunaca Taita Diosmanda separado naciripanchi. Chaimandami Taita Diospa huahuacuna caitaca na ushapanchi. Shinallata ñucanchita llaquij y ñucanchita ruraj Taita Diosmandaca carupimi caparcanchi (Deuteronomio 32:​5​huan comparapangui). Adán y Evapa punllacunamandapachami Taita Diospa familia canata saquishpa, Taita Diosmanda caruyashca causanajupashcanchi.

12. a) Jehová Dios ñucanchicunata paipa familiapi chasquichunga ¿imatata rurana capanchi? b) ¿Ima cosascunatata nara bautizarishpallata rurana capanchi?

¹² Jehová Dios ñucanchicunata paipa familiapi chasquichunga cada unomi mañaita ushapanchi. * Pecadorcuna cashpapash Taita Diospa ñaupapi ali ricuringapaca ¿imatata rurana capanchi? Pabloca, “Diosta fiñajcuna cashpapash, paipaj Churi Cristo huañujpimi, Taita Dioshuan ali tucurcanchi” nircami (Rom. 5:10). Taita Dios ñucanchita paipa familiapi chasquichunga shuj ali concienciata carahuai nishpami mañana capanchi. Y shuj ali concienciata charingapaca bautizarinaca minishtirishcapachami can (1 Ped. 3:21). Shinapash nara bautizarishpallatami huaquin cosascunata rurana capanchi. Primeroca Jehová Diosta aliguta rijsishpami paipi tucui shunguhuan confianatapash yachajuna capanchi. Chai jipaca arripintirishpami Jehová Dios munashcashna causai callarina capanchi (Juan 17:3, TNM; Hech. 3:19; Heb. 11:​6). Chai jipaca ¿imatata rurana capanchi?

13. Taita Diosta adoraj familiapurapi cangapaca ¿ima promesatata rurana capanchi?

¹³ Taita Diosta adoraj familiapurapi cangapaca tucui shunguhuanmi shuj promesata rurana capanchi. ¿Imamandata chaitaca rurana capanchi? Chaita intindingapaca cai comparacionbi pensaripashunchi. Comunidadpi shuj rijsishca taitaca, shuj jichushca huahuaguta rijsin. Cai huahuagutaca ninanda juyai callarin. Chaimi chai taitaca cai huahuaguta adoptangapaj decidin. Pero nara adoptashpallatami huahuagu caita prometichun nin: “Ñucataca juyahuangui, respetahuangui, shuj taitashna ricuhuangui” nishpa. Caita ruranaca na dificilchu can. Huahuagu tucui shunguhuan chaita prometijpillami chai taitaca huahuagutaca adoptanga. Shinallatami Jehová Dios paipa familiapi ñucanchita chasquichunga, paitalla para siempre sirvisha nishpa tucui shunguhuan prometina capanchi. Chaitallata rurachunmi Bibliapipash ricuchin. Bibliapica ninmi: “Cangunapaj cuerpotaca, animalta Diosman caranshna cangunapaj tucui causaita cushpami, paipajlla causashpa Taita Diosta cushichina canguichi” (Rom. 12:​1).

Juyaimanda y crimandami Jehovatalla sirvinata decidinchi

14. Jehová Diostalla sirvisha nishpa prometishpaca ¿imatata ricuchinajunchi?

¹⁴ Jehová Diostalla sirvinata prometishpami Jehová Diosta juyashcataca ricuchinajupanchi. Shina prometinaca cazarajushpa shuj promesata rurajuj cuendami can. Shuj huauqui cazarajushpaca, cazarajushca punllapimi paipa noviataca, canhuanmi huañungacaman causasha nishpa tucui shungu prometin. Chai huauquica cazaraitallaca na cazarajunllu. Sino paipa noviata nunca na jichushpa saquishachu nishpami prometijun. Paicunaca shina prometirishpa cazarashpalla pacta causaita ushanataca alimi yachan. Shinallata Jehová Diostalla sirvisha nishpa prometishpallami Jehová Diospa familia tucushpa ima bendiciondapash chasquita ushashun. Imashinami ricupanchi Jehová Diospalla cangapaj munaimanda y pecadorcuna cashpapash tucuipi paitalla cazungapaj munaimandami paitalla sirvisha nishpa prometinchi (Mat. 22:37).

15. ¿Imamandata Jehová Diostalla sirvinata decidinchi?

¹⁵ Jehová Diospi crimanda y paihuan ali amigo cana ñucanchipallata ali cashcata yachaimandami paitalla sirvinata decidinchi (Sal. 73:28). “Nali gentecunapurapi” causanajuimanda Jehová Diostalla sirvishpa causana na fácil canataca alimi yachapanchi. Shina cajpipash Jehová Diosta sirvingapaj esforzarinajujta ricushpa pai ñucanchita bendicianataca seguromi capanchi (Filip. 2:15, TNM; 4:13). Shinallata pecadorcuna caimanda imagupi pandarijpipash pai ñucanchita llaquishpa perdonanataca alimi yachapanchi (Salmo 103:​13, 14; Romanos 7:​21-25, liipangui). Ashtahuanbash paitalla cazungapaj esforzarishcamanda Jehová Dios ñucanchita bendicianataca na dudapanchichu (Job 27:​5).

Jehová Diostalla sirvinata decidishpaca cushillami causashun

16, 17. Cushilla causangapaca ¿imatata rurana capanchi?

¹⁶ Jehová Diostalla sirvinata decidishpaca cushillami causashun. Porque shina rurashpaca ñucanchi causaitami Jehová Diosman entreganajunchi. Jesusca cashnami nirca: “Carajpi japijcunatapash yalimi carajcunaca, ninanda cushijun” nirca (Hech. 20:35). Jesús cai alpapi cashpaca chai shimicunata pactachishpami ninanda cushijurca. Paica samanata y micunatapash saquishpami shujcunapi pensarishpa Taita Diospa shimita shujcunaman yachachirca (Juan 4:34). Paica paipa Taitapa munaita pactachishpami ninanda cushijurca. Chaimi cashna nirca: “Ñucaca siempremi pai imata munashcata rurani” nishpa (Juan 8:29, TNM; Prov. 27:11).

¹⁷ Jesusca cushilla causangapaj imata rurana cashcatami paipa discipulocunamanga yachachirca. Chaimi cashna nirca: “Ñucata catingapaj munajcunaca, ñana paicunapa munaita rurashpa causanachu can” nirca (Mat. 16:24). Ñucanchi munaicunata ruranapa randi Jehovapa munaita rurashpaca ñucanchita juyaj Jehová Diosmanmi ashtahuan quimirinchi. ¿Pipash Jehová Diosta yali ñucanchita cuidaita ushangacha?

18. Jehová Diostalla sirvinata decidinaca ¿imashinata cushilla causachun ayudan?

¹⁸ Gentecunaca shujcunata sirvishpa o charij tucushpapash na cushilla causaita ushanllu. Pero Jehová Diostalla sirvijcunaca Jehovapa munaita ruraimandami ashtahuan cushilla causan. Y shinallata ima charishcacunahuanlla conformemi causan (Mat. 6:24). Jehovapa sirvijcunaca paipa obrapi ayudanajuimandami cushilla causan. Pero paipa obrata ruranamandallaca na Jehová Diostalla sirvisha nishpa prometircachu, sino Jehová Diosta juyaimandami Jehovaman chai promesataca rurarca (1 Cor. 3:​9). Tucuita saquishpa, paitalla cazungapaj esforzarijta ricushpami, Jehová Diosca paipa sirvijcunataca ninanda valichin. Chaimandami Jehová Diosca paipa sirvijcunata jovenyachishpa para siempre cuidanga (Job 33:25; Hebreos 6:10, liipangui).

19. Jehová Diostalla sirvinata decidijcunaca ¿ima bendiciondata chasquin?

¹⁹ Bibliapica ninmi: “Taita Diospajman quimirichi. Shina quimirijpica, paipash cangunapajman quimiringami” nin (Sant. 4:8; Sal. 25:14). Shinaca Jehovatalla sirvingapaj decidijcunaca Jehová Dioshuan ali amigocunami caita ushanga. Cati temapica Jehovatalla sirvinata decidina imashina ayudashcatami ricugripanchi.

[Notacuna]

¿Imatata nipanguiman?

• Jehová Diostalla sirvinata decidinaca ¿imata can?

• Jehová Diostalla sirvinata decidishpaca ¿ima bendiciongunatata chasquishun?

• Jesuspa discipulocunaca ¿imamandata Jehová Diostalla sirvinata decidina can?

[Preguntas del estudio]

[Foto]

Jehová Diostalla sirvishpa causashpaca ciertopacha cushillami causashun