1970 huatapica soldadomi carcani. 20 huatacunatami charircani. Shuj millai ungüihuan contagiarishca caimandami, Estados Unidos llactapa Hospital General Valley Forge de Phoenixville nishcapi internado carcani. Chaipica shuj enfermeroca ñuca cuerpopa presión cada rato bajarijujpimi cada media hora presionda ricungapa shamun carca. Chai enfermeroca ñucapaca huaquin huatagucunahuanllami mayor carca. Shinapash ninan manllarishcami carca. Chaimi ñucaca “¿pipash huañujtaca ima horapash ricushcanguichu?” nishpa tapurcani. Paica ninanda naliyarishpami: “Na, pipash huañujtaca nunca na ricushcanichu” nihuarca.

Imamanda chai hospitalpi huañunalla sirijushcata parlapasha.

Vietnam llactapi enfermero cashpami shuj ungüihuan contagiarircani. Guerrapi llaqui apashca gentecunata, ungüihuan gentecunatapash ayudanataca ninandami gushtan carcani. Ñucaca cirujanomi cangapaj munarcani. Vietnam llactamanga julio de 1969 huatapimi chayarcani. Chairalla chaiman chayashcamandami shuj semanataca tucuita aliguta rijsichihuarca. Chaipi cambiocunamanmi acostumbrarina carcani.

Chai jipaca Dong Tam nishca pushtupi Hospital Quirúrgico nishcapimi trabajai callarircani. Chai hospitalmanga cada ratomi helicopterocunaca huañushcacunata o chugrishca gentecunata apamushpa shamun carca. Trabajanata gushtaimanda, llactata ayudangapaj munaimandaca uchallami trabajai callarircani. Chugrishcacunataca uchilla cuartogucunapimi churan carcanchi. Chaipica aire acondicionado tiashcamandami chirilla carca. Shinapash uchilla cuartogu cashcamandami cirujanopash, anestesiata churaj doctorpash, ishcai enfermerocunapash cuartopica niti niti can carcanchi. Pero usharishca gentecunata ayudangapajmi munarcanchi. Helicopterocunapica jatun yana fundacuna junda tiajujtami ricurcani. Chai fundacunataca ni pipash na uriajuchinajurcachu. Jipaca chai fundacunapica huañushca soldadocunapa cuerpocunahuan o pedazocunahuan chaipi junda cashcatami yachaj chayarcani. Chaica llaquinaimi carca.

Guerraman nara rishpallatami testigo de Jehovacunataca rijsircani. Ñuca mamitami asha tiempotaca testigo de Jehovacunahuan estudiajurca. Shinapash na bautizarircachu. Ñucaca Testigocuna parlajta uyanataca ninandami gushtan carcani. Shuj viajeca shuj pushtuman rinajushpami Tandanajui Huasitaca ricurcani. Chaimi ñuca padrastrotaca “chaipica ¿imata can?” nishpa tapurcani. Paica: “Chai gentecunahuanga parlaitallapash ama parlanguichu” nihuarcami. Ñuca padrastrotaca ninanda juyaimandami pai nishcataca cazurcani.

Vietnam llactamanda tigramushpaca Taita Diosmandaca yachajungapapachami munarcani. Chai llactapi ninan llaquicuna tiashcata ricushcamandaca nalipachami sintirijurcani. Vietnam llactapi causai llaquinai cajtaca ni pipash na cuenta japinllu carca. Gentecunaca Estados Unidos llactamanda soldadocunaca, Vietnam llactapica huahuagucunatami huañuchinajun nishpa huelgacunata ruranajurca. Soldadocunataca, huahuacunata huañuchijcunami canguichi nishpami paicunataca caparinajurca.

Taita Diosmanda yachajungapaj munashpami shuj shuj iglesiacunaman ri callarircani. Siempremi Taita Diostaca juyan cashcani, shinapash chai iglesiacunapi imata rurajta ricushpaca nimamanda nalicachircanichu. Chaimi jipamanga Florida llactapi testigo de Jehovacunapa Salón del Reinoman rircani. Chaica febrero de 1971 huatapi domingo punllami carca.

Salón del Reinomanga discurso tucurigrijujpimi chayarcani. Chaimi Villajun revistata estudianajujta uyangapaj quidarcani. Villajun revistapi imata estudiashcataca na yarinichu. Pero huahuacunapash Bibliapa textocunata mascashpa tianajushcataca nunca na cungashachu. Ñucaca tucuicuna imashna cajta ricushpandimi tandanajuitaca ali ali uyajurcani. Tandanajuimanda ña rigrijujpipachami shuj mayorlla huauquigu quimirimuhuarca. Paica Jim Gardner shutimi carca. Chai huauquica La verdad que lleva a vida eterna nishca librogutami carahuarca. Chai librotaca jueves punllata estudiangapami quidarcanchi.

Ñucaca Florida llactapa shuj clinicapimi trabajajurcani. Tandanajuiman rishca punlla tutataca trabajanami tucurcani. Tutacuna clinicapi trabajashpaca las 11​manda las 7​camanmi trabajan carcani. Clinicapica gentecuna na ashta tiashcamandami huauquigu cushca librota lii callarircani. Librota liijujpimi shuj enfermeraca librota maquimanda quichushpa: “Chai religionmandaca ama tucunguichu” nishpa caparihuarca. Cutin librota quichushpami: “Librotaca chairami lii callarijuni, liishca jipaca talvez Testigo tucushachari” nircanimi. Enfermera rishca jipaca chai tutallatami librotaca liishpa tucuchircani.

Jueves punlla huauqui Gardner ñucata yachachingapaj shamujpica: “¿Imatata yachajugrinchi?” nishpami tapurcani. Pai “ñuca cushca librotami estudiagrinchi nijpimi, ñucaca chai librotaca ñami liishpa tucuchircani” nircani. Shinapash paica “primer capitulotami estudiagrinchi” nihuarcami. Estudiajushpaca ashtaca cosascunata na ricushcatami cuenta japircani. Huauquiguca ñuca propio Bibliapillatami, ashtaca textocunata mascachihuarca. Ñucaca Versión del Rey Jacobo nishca Bibliatami charircani. Bibliata estudiai callarishpami Jehová Diostaca rijsi callarircani. Chai punllaca libropa quimsa capitulocunatami huauquiguhuanga yachajurcani. Cada juevesmi quimsa capitulocunataca cushijushpa yachajun carcani. Huauquigu Gardnerca ungidomi carca. Paica huauqui Ruselltapashmi rijsishca carca. Huauquiguhuan Bibliamanda yachajunaca ñucapaca shuj jatun bendicionmi carca.

Huaquin semanacuna jipallami publicador tucushpa huauquipanicunahuan villachi callarircani. Callaripica villachinataca ninandami manllan carcani. Shinapash huauqui Gardnermi ñucataca ayudahuarca (Hech. 20:20). Huauquiguhuan villachinaman llujshinami chushijushpa villachichun ayudahuarca. Cunangamanmi villachinataca ninanda gushtani. Jehová Diospa ayudajcuna canaca shuj jatun bendicionmi cashca (1 Cor. 3:9).

Cunanga Jehová Diosta juyana imashina ayudahuashcatami parlagripani (Apoc. 2:4). Jehová Diosta juyanami, guerrapi llaqui apashcacunata cungachun y shuj shuj llaquicunatapash aguantachun ayudahuashca (Is. 65:17).

1971 huatapi ima pasashcatami yarini. Ñuca padrastroca testigo de Jehovacuna paipa huasipi causachun na munaimandami ñucataca llujchishpa cachahuarca. Ñuca trabajopica cada ishcai semanami pagahuan carca. Shinapash aliguta mudarishpa villachinaman llujshingapaj munaimandami, ropata randishpa casi culqui illaj quidarcani. Ñucaca asha culquigutami ahorrashca charircani. Shinapash ñuca viñashca pushtupi, Michigan llactapa bancopimi depositashca carca. Chaimi huaquin punllacunataca ñuca carropillata causana tucurcani. Cutin armangapaca gasolineracunapi tiashca bañocunamanmi rin carcani.

Shuj punllaca trabajomanda alzarishca jipami predicacionman llujshingapaj Salón del Reinomanga alihurata chayarcani. Ñuca carrotaca Salón del Reino huasha ladomanmi saquingapaj rircani. Chaipi cashpaca Vietnam llactapi ima pasashcatami yari callarircani. Huañushcacunata rupachinajushcata, gentecuna yahuarsapa cashcatami yari callarircani. Paicunaca llaquinaita “ayudahuai” ninajushcatami yarircani. Paicuna huañuna cashcata yachashpapashmi “na huañunguichu o salvaringuimi” nin carcani. Chaicunata yarishpaca llaquillapachami sintirircani.

Huacai huacaimi Jehová Diostaca tucui shungu mañai callarircani (Sal. 56:8). Shinallata Jehová Dios huañushcacunata causachinapipashmi pensari callarircani. Jehová Diosca huañushcacunata causachishpami cunanbi tiashca tucui llaquicunata tucuchishpa, gentecuna sufrishcatapash cungachun ayudanata cuenta japircani. Jehová Diosca ashtaca huañushca gentecunata causachishpami paita rijsina oportunidadta cunga (Hech. 24:15). Jehová Dios chaita ruranata yachashpaca Jehovataca ashtahuanmi juyai callarircani. Chai punllataca cunangamanmi yaria causani. Y chai punllamandapachami llaquicuna ricurijpipash Jehová Diosmandaca nunca na caruyangapaj ninanda esforzarishcani.

Guerra tiempopica shuj gentecunashnallatami ñucapash nali cosascunata rurarcani. Nali cosascunata rurashcamanda yarishpa ama yapata culparijungapaca ishcai textocunata yarinami ayudahuashca. Shuj textoca Apocalipsis 12:10 y 11mi can. Chaipica Diabloca ñucanchi villachishcacunahuan, shinallata Cristopa yahuarhuan mishai tucushcatami ricuchin. Shinallata chaishuj textoca Gálatas 2:20​mi can. Chaipica Jesús “ñucamanda” huañushcatami ricuchin. Jesús huañushcamanda Jehová Dios ñucata perdonashcatami cuenta japishcani. Jehová Dios perdonahuashcata yachanami ñuca concienciapipash tranquilo sintirichun ayudahuashca. Shinallata shuj gentecunapash Jehová Diosta rijsichun ayudangapaj ninanda esforzarichunmi animahuashca (Heb. 9:14).

Ñuca causaipi pensarishpaca Jehová Dios siempre cuidahuajushcatami cuenta japini. Huauqui Gardner ñuca carropi causajushcata yachashpaca, chai punllallatami shuj paniguhuan ñucata mingachichun parlarca. Chai paniguca paipa huasipica mingachingapaj cuartocunatami charishca carca. Chaipimi mingachihuarca. Jehová Dios chai huauquiguta, chai paniguta utilizashpa ñucata ayudashcataca seguromi capani. Jehová Diosca ninan juyaj Dios caimandami paita sirvijcunataca siempre cuidan.

Mayo de 1971 huatapica, huaquin cosascunata rurana caimandami Michigan llactaman rircani. Chaiman rijushpaca carro huasha cajonbica revistacunata, librocunatapash jundachishcami apajurcani. Maipi usharishcapi villachimandami Michigan llactaman nara chayashpallata revistacunata, librocunatapash gentegucunaman cushpa tucuchishcarcani. Carcelcunapi, carro paradacunapipashmi villachishpaca tratadocunata saquircani. Huaquinbica ñuca villachishca gentecunamandaca ¿maijanllapash Testigo tucurcacha? nishpami pensarini (1 Cor. 3:6, 7).

Jehová Diosta tucui shungu juyaimandami callaripica ñuca familiaman villachijushpaca na manllashpa villachin carcani. Huaquinbica paicunahuanga shinllilla parlanlla carcani. Ñuca ishcai huauquicunata juyaimandami, Bibliapa yachachishcacunata paicunapash crichun obligangapaj munan carcani. Chaimandami jipamanga shina villachishcamandaca disculpahuanguichi nishpa nircani. Ñuca huauqui John y Ronpash Jehová Diosmanda yachajuchunga siempremi Jehová Diostaca mañariani. Jehová Diosca gentecunaman villachijushpa o yachachijushpapash ali modos, juyahuan parlachunmi yachachihuashca (Col. 4:6).

Jehová Diostaca ninandami juyani. Shinallata ñuca huarmigutapashmi juyani. Ñuca huarmigupa shutica Susanmi can. Cazarashpaca Jehová Diosta sirvingapaj ayudaj huarmiguhuan cazarangapami munarcani. Susanga Jehová Diosta sirvishpa catichunga ninandami ayudahuan. Paipashmi Jehová Diostaca ninanda juyan. Noviocuna cashpaca Susandaca paipa huasimanmi visitangapaj rircani. Chayashpaca Villajun revistata liijujtami ricurcani. Paica tandanajuipi yachajuna parte na cajpipash tucui textocunata mascashpa liijujtami ricurcani. Chaita ricushpami ninanda alicachircani. Paipash Jehová Diosta ninanda juyajtami cuenta japircani. 1971 huatapimi cazararcanchi. Chai horasmandami ñucataca tucuipi apoyahuashca. Chaimandami paitaca ninanda agradicini. Susanga ñucata juyashpapash Jehová Diostami ashtahuanbachaca ninanda juyan.

Ñucanchica ishcai churigucunatami charinchi. Paicunaca Jesse y Paulmi can. Paicunataca siempremi Jehová Diosca ayudashca (1 Sam. 3:19). Jehová Diospa ayudahuanmi paicunapash Jehová Diosta tucui shungu juyachun ayudai ushashcanchi. Chaimandami paicunaca cunangaman Jehová Diostaca sirvishpa catin. Ishcandicunallatami Jehová Diostaca veinte huatacunata yali tiempo completopi sirvinajun. Paicunaca Jehovata tucui shungu sirvij huarmigucunahuanmi cazararca. Ñuca jachungunapash Jehová Diosta sirvinajushcamandaca cushillapachami sintirini. Paicunaca Stephanie y Racquelmi can. Paicunataca ñuca propio huahuacunatashnami juyani (Efes. 6:6).

Bautizarisca jipaca Rhode Island nishca llactapimi dieciséis huatacunata sirvircani. Chaipi sirvijushpaca huauquipanicunahuanga alipacha amigocunami tucurcanchi. Shinallata congregacionmanda alipacha huauqui ancianocunahuan Jehová Diosta sirvi ushashcamandaca cushillapachami sintirini. Superintendente huauquicuna ninanda ayudahuashcamandapash agradecidomi sintirini. Jehovata ninanda juyaj huauquicunahuan Jehovata sirvinaca shuj jatun bendicionmi cashca. Cutin 1987 huatapica Carolina del Norte nishca llactamanmi sirvingapaj rircanchi. Chaipipashmi huauquipanicunahuanga alipacha amigocuna tucurcanchi. *

Agosto de 2002 huatapica ishcanditami Patterson Betelpi sirvichun invitarca. Ñucaca Departamento de Serviciopimi ayudai callarircani. Cutin Susanga lavanderiapimi ayudai callarirca. Chaipi trabajanataca Susanga ninandami gushtarca. Cutin agosto de 2005​pica ñucataca Cuerpo Gobernantepi sirvichunmi nombrahuarca. Chaica shuj jatun responsabilidad cashcamandami chaitaca na aliguta pactachi ushashachu yarcani. Shinallata shuj shuj ladocunaman viajana cashcamandami ñuca huarmiguca preocupada carca. Ñuca huarmiguca aviongunapi viajanataca nunca na gushtashcachu. Shinapash cunanga shuj shuj ladocunamanmi viajana tucunchi. Ñuca huarmigutaca Cuerpo Gobernantepi sirvij huauquicunapa huarmigucuna cushca consejocunami ayudashca. Tucuipi apoyahuashcamandami Susandaca ninanda juyani.

Cai tucui huatacunapi Jehová Diosta sirvishcata yaringapami ñuca oficinapica tauca fotocunata charini. Cai fotocunata ricunami Jehová Diosta sirvishpa cushilla yalishcata yarichihuan. Jehová Diosta tucui shungu sirvishcamandaca ashtaca bendiciongunatami chasquishcani.