Bibliami gentecunapa causaita cambiashca

¿IMASHINATA rastafari grupoman pertenecij negroguca paipa punda causaita saquirca y blanco gentecunata na ricunayachinata saquirca? ¿Imamandata shuj runaca mal genio cashpapash y drogacunata jatushpapash chai nali causaita saquishpa cambiarca? Paicunallata imata nijta ricupashunchi.

“Shuj raza gentecunata na ricunayachinataca saqui usharcanimi” (HAFENI NGHAMA)

EDAD: 34 AÑOS

LLACTA: ZAMBIA

PAIPA PUNDA CAUSAI: RASTAFARIMI CARCA

ÑUCA PUNDA CAUSAI: Guerra tiashcamandami ñuca mamitaca Namibia llactamanda pacajushpa rishpa, Organización del Pueblo de África del Suroeste nishca organizacionman afiliarishcarca. Chai organizaciondami inglespica SWAPO nishpa rijsin carca. Chai organizacionga guerrillerocunami carca y chai punllacunapica, Namibia llacta gobiernota tucuchingapami paicunaca munanajurca. Ñuca mamitaca Zambia llactapi campo de refugiadosmanmi rirca. Chaipimi ñucaca nacirircani.

15 añosta charingacamanga SWAPO nishcapa shuj shuj campo de concentraciongunapimi causarcani. Cai grupomi, Namibia llactapi movimiento de liberación nishcapa lider carca. Chai grupopica política cosascunata, blanco gentecunata na ricunayachinatami jovengunamanga yachachin carca.

Cristiano cangapaj munashpami 11 añosta charishpaca confirmacionda rurangapaj munarcani. Chaimi chai pushtupi iglesiapa pastorhuan parlagrircani. Chai iglesiamanga catolicocuna, luteranocuna, anglicanocuna y shujcunapashmi rin carca. Pero chai pastorca ñuca confirmarichunga na munarcachu. Ninanda desanimarishpami ateo tucurcani. Shina ateo cashpapashmi 15 añosta charishpaca rastafari grupo político y religiosoman yaicurcani. Shuj partemandaca reggae musicata gushtaimandami chai grupomanga yaicurcani. Shinallata África llactapi negrocunapa contra yapata racismo tiajpimi chaicunata tucuchingapapash chai grupomanga yaicurcani. Rastafari caimandami ajchataca rastata rurashpa purin carcani. Marihuanatapashmi fumai callarircani, vegetarianopashmi tucurcani y negrocunata difindingapaj movimientotapashmi apoyai callarircani. Shina cashpapash shuj shuj fiestacunaman rinata, yahuarsapa huañuchinajuj peliculacunata ricunata y mala palabracunatalla ninatapash na saquircanichu.

BIBLIAMI ÑUCA CAUSAITA CAMBIASHCA: Año 1995​pi ña 20 añosta charishpami, ñuca causaipica imatata ruragriniyari yashpa seriamente pensarircani. Rastafaripa publicaciongunataca ricurishcatami ña uñaillata liijun carcani. Aunque huaquin publicacionguna Bibliapa textocunamanda parlajpipash Bibliamanda imata explicashcataca na tanto crinllu carca. Chaimi Bibliataca ñucapacha estudiai callarircani.

Rastafari grupomanda shuj amigomi, testigo de Jehovacunapa shuj publicacionda cuhuarca. Chaimi chai rato Bibliahuan comparashpa estudiai callarircani. Chai jipami Testigocunata mascashpa paicunapa ayudahuanga ashtahuan ashtahuan yachajushpa catircani. Pero Bibliata paicunahuan nara estudiai callarishpallatami, ña tauca cambiocunata rurarcani.

Fumanata y machanata saquinaca dificilmi carca. Pero shinapash chaicunata saquitaca usharcanimi (2 Corintios 7:​1). Shinallata aliguta arreglaringapaj munashpami rastacunata ruturircani, yahuarsapa huañuchinajuj peliculacunata y pornografiata ricuchinajuj peliculacunatapash saquircani. Y mala palabracunata ninatapashmi saquirca (Efesios 5:​3, 4). Tiempohuanga blanco gentecunahuan racista canatapashmi saqui usharcani (Hechos 10:​34, 35). Chai tucui cambiocunata rurai ushangapaca, racista musicacunata y nali ñanman apaj amigocunatapashmi primeroca saquina tucurcani.

Nali costumbrecunata saquishca jipami testigo de Jehovacunapa Salón del Reinota mascarcani. Chaipimi paicunahuan Bibliata estudiaitapacha estudiai callarishpa bautizarircani. Chaita yachashpaca ñuca familiaca culirarcami. Ñuca mamitacarin, “cristiano” religiongunamanga maijanmanbash yaicuilla pero menos testigo de Jehovacunapaman nihuarcami. Además ñuca mamitapa shuj familiarca gobiernopami trabajan carca. Paica cada ratomi ñuca Testigo tucushcamandaca rimahuan carca.

Jesuspa yachachishcacunata y paipa ejemplota catishpami ñuca familiacuna jarcajpi, burlarijpipash tucui chaicunata aguantai usharcani. Shinallata testigo de Jehovacuna verdadero, ali religión cajtaca seguromi carcani. Porque paicunaca imata yachachishpapash Bibliahuanmi yachachin carca. Paicunaca Taita Dios Bibliapi imata mandashcataca siempre cazushpami shuj gentecunamanga predican (Mateo 28:​19, 20; Hechos 15:14). Politicapipash na participanllu (Salmo 146:​3, 4; Juan 15:​17, 18).

¿IMASHINATA BENEFICIARISHCANI? Bibliapi imata mandashcata cazunaca ashtacatami beneficiahuashca. Pundaca marihuanata randishpami quillapica ashtaca ashtaca culquita gashtan carcani. Pero cunanbica ñana gashtanichu. Marihuanata fumaimandami imacunatapash ricushpa muspan carcani. Pero cunanga ñuca cuerpopash y mentepash sanomi can.

Huahuamandapachami ñucaca imagutapash rurashpa ali causangapaj munarcani. Pero cunanmi por fin shina causai ushapani. Shinallata cunanbimi Taita Diospa lado ladopi canshna sintiripani (Santiago 4:​8).

“Mal genio canataca saqui usharcanimi” (MARTINO PEDRETTI)

EDAD: 43 AÑOS

LLACTA: AUSTRALIA

PAIPA PUNDA CAUSAI: HUAÑUCHIDOR Y DROGACUNATA JATUDORMI CARCA

ÑUCA PUNDA CAUSAI: Uchilla cashpaca, shuj shuj uchilla pueblocunapi, shuj shuj llactacunapimi ñuca familiahuanga causan carcanchi. Shinallata huaquin tiempotaca protestante misionerocunata apoyashpami, alejado alejado pushtucunapi causangapaj rircanchi. Chai punllacunapi ñuca primocunahuan y tiocunahuan yalishcataca cushijushpami yarini. Paicunahuanga pescashpa, animalcunata cazashpa y caspihuan imacunatapash rurashpami yalin carcanchi.

Ñucaca siempremi jaicata pitapash macanlla carcani. Ñuca taitaca boxeadormi carca y chaimi uchillamandapacha macanajunata yachachihuarca. Ña solteroyashpaca discotecacunapi ufiashpallami yalin carcani. Ñuca y ñuca amigocunapash jaicatami problemataca mascanlla carcanchi. Navajacunahuan y beisbolta pugllana caspicunahuan shayarishpami 20purahuan o huaquinbica más gentecunahuanbash macanajunlla carcanchi.

Culquimandaca drogacunata y muellecunapi trabajadorcuna shuashca cosascunatami jatun carcani. Shinallata, drogata traficajcunapa clientecunata armacunahuan cobrashpa, manllachishpami trabajan carcani. Ñucaca “matar o morir” nishpami purin carcani. Huañuchidorpacha tucungapami munarcani.

BIBLIAMI ÑUCA CAUSAITA CAMBIASHCA: Uchilla cashpami testigo de Jehovacunamandaca uyashcarcani. Pero ña más de 20 añosta charishpami curiosomandalla ñuca mamitataca Testigocunamanda tapurcani. Y ishcai punlla jipallami Dixon shuti testigo de Jehovaca ñuca huasiman predicangapaj shamurca. Largollaguta parlashca jipami paicunapa reuniongunaman invitahuarca. Chaimi por primera vez shuj reunionman rircani y chai punllamandaca ñami ña 20 añosta reuniongunaman rishpa purijushcani. Imata tapujpipash siempremi Bibliahuan contestan carca y chaitami ñucaca gushtan carcani.

Testigocunami yachachihuarca que Jehová Diosca paita na respetajshnalla gentecunamandapash preocuparin cashcata (2 Pedro 3:​9). Shinallata yachajurcanimi shuj gentecuna ñucata na juyajpipash Jehová Diosca Taitashna ñucata juyashpa cuidanata. Ñucaca Efesios 4:​22-24​pi shimicunataca ninandami gushtan carcani. Chaipica nijunmi: ‘Punda mauca causaitaca shitashpami saquina canguichi’ y Taita Dios munashcashnami ‘mushuj causaitaca, mushujta churajunshna causana’ canguichi.

Ñuca punda causaita saquinaca dificilmi cahuarca. Aunque tauca punllacunata nimata na drogarishpa yalishpapash fin de semana chayajpica ñuca amigocunahuan tuparishpami cutin lo mismota ruranlla carcani. Paicunamanda na separarishpaca na cambiai ushana cashcatami cuenta japircani. Chaimi paicunamanda separarishpa shuj llactaman rinata decidircani. Huaquingunaca ñucata saquingapaj rinajushpaca marihuanatami ofrecihuarca. Chaimi ñucaca cai viciotaca saquingapapachami munani nircani. Shinami chai llacta fronteraman chayashpaca separarircanchi. Jipamanga, uchilla escopetacunahuan rishpa shuj bancota asaltashcatami yachaj chayarcani

¿IMASHINATA BENEFICIARISHCANI? Nali amigocunamanda separarishca jipami ashtahuan facillla cambiocunataca rurai usharcani. Shinami año 1989​pi bautizarishpa testigo de Jehová tucurcani. Chai jipaca ñuca panipash y ñuca taitamamacunapashmi bautizarirca.

Cunanbica ñami 17 añosta cazarashca cani y quimsa huahuacunatapashmi charini. Ñuca huarmiguhuanga cushillami causapanchi. Y cunanbica ñami ñucapa mal geniotaca controlaita ushashcani, y hasta shujcuna culirachijpipash ñana culiranillachu. Shinallata maijan raza cajpipash, ima idiomata parlajpipash tucuilla gentecunata juyanatami yachajushcani (Apocalipsis 7:​9). Ñuca casopica Juan 8:31 y 32​pi Jesuspa shimicuna ciertopacha cajtami ricupashcani. Chaipica ninmi: ‘Ñuca yachachijushca shimicunata, quiquinguna cazushpa catishpaca, ñucapa yachajujcunapachami canguichi. Shina cashpami, na llullashpa villachijuj shimitapash rijsinajunguichi. Chai na llullashpa villajushca shimimi, quiquingunataca cacharichinga’.

[Comentario]

Cambiocunata rurai ushangapaca, racista musicacunatami primeroca saquircani.

[Comentario]

Ñuca y ñuca amigocunapash jaicatami problemataca mascanlla carcanchi. Navajacunahuan y beisbolta pugllana caspicunahuan shayarishpami 20purahuan o huaquinbica más gentecunahuan macanajunlla carcanchi.