Bibliami gentecunapa causaita cambiashca

Huahua cashpa ninanda maltratai tucushpa viñashca joven huarmiguca ¿imata rurashpashi cushilla causai usharca? Gobiernopa contra caj, macanajunata gushtaj jarica ¿imamandashi macanajunata saquishpa Bibliamanda yachachi callarirca? Paicunamanda yachajupashunchi.

“Ñucata juyahuachunmi ninanda munan carcani” (INNA LEZHNINA)

NACIRISHCA HUATA: 1981

LLACTA: RUSIA

PAIPA PUNDA CAUSAI: NINANDA MALTRATAI TUCUSHPAMI VIÑASHCA

ÑUCA PUNDA CAUSAI: Ñuca taitacunaca sordogucunami carca. Ñucapashmi shinallata nacirircani. Ñucaca seis huatacunata charingacamanga cushillami causan carcani. Shinapash ñuca taitacuna divorciarijpimi ñucaca ninanda llaquiyarcani. Divorciarishca jipaca ñuca taitaca ñuca rucu turihuanmi Troick shuti pushtupi causangapaj quidarca. Cutin ñuca mamitahuanga Cheliabinsk nishca pushtuman causangapaj rircanchi. Jipamanga ñuca mamitaca cutinmi cazararca. Shinapash ñuca padrastroca machashcallami yalin carca. Paica ñuca mamitata, ñucatapash macashpallami charin carca.

1993 huatapica ñuca rucu turimi ahogarishpa huañuparca. Chaica ninandami llaquiyarcanchi. Chaimi ñuca mamitaca ufiashpalla yalijuimanda paipash maltratai callarihuarca. Ñucaca pipash ñucata juyahuachunmi ninanda munarcani. Ñucaca animachihuanga yashpami shuj shuj iglesiacunaman rircani. Shinapash ñucataca ni maijan iglesiapipash na animachihuarcachu.

BIBLIAMI ÑUCA CAUSAITA CAMBIARCA: Ñuca 13 huatacunata charijpimi escuelamanda shuj compañeraguca Bibliamandaca parlahuarca. Noepash, Jobpash jatun llaquicunata charishpapash Jehová Diosta sirvinataca na saquircachu. Chaimandami paicunamanda yachajunataca ninanda gushtan carcani. Asha tiempo jipaca Bibliamanda yachajushpami tandanajuicunamanbash ri callarircani.

Bibliamanda yachajushpaca ashtacatami yachajurcani. Por ejemplo, Taita Dios shutiguta charijtami yachajurcani (Salmo 83:18, TNM ). Shinallata cunanbi causai imashina cana cashcata Bibliapi ña villajushcatami yachai chayarcani (2 Timoteo 3:1-5). Huañushcacuna causarinata yachajushpacarin ninandami cushijurcani. Cutinmi ñuca turitaca ricusha (Juan 5:28, 29).

Shinapash ñuca mamita y ñuca padrastroca testigo de Jehovacunahuan Bibliamanda ama yachajushpa catichunmi ninanda jarcahuarca. Shinapash testigo de Jehovacunahuan Bibliamanda yachajunataca ninanda gushtaimandami napacha saquishachu yarcani.

Chaita aguantanaca na fácil carcachu. Chai tiempopillatami ñuca último turigupash ahogarishpa huañuparca. Paimi tandanajuicunamanga cumbahuan carca. Chaita pasana shinllipacha cajpipash turiñañagucunami ñucataca animachihuarca. Testigo de Jehovacunami ñucataca siempre juyaihuan tratahuarca. Chaitaca siempremi munan cashcani. Testigo de Jehovacuna ali religión cajta cuenta japishpami 1996 huatapi bautizarircani.

¿IMA BENDICIONGUNATATA CHASQUIPASHCANI?: Cunanga ña seis huatacunatami shuj ali jariguhuan cazarashca capani. Paica Dmitry shutimi can. Ishcandillatami San Petersburgo llactapa sucursalpi sirvipanchi. Antsicarin ñuca taitacunaca ña na imatapash nishpa jarcanllu.

Jehová Diosta sirvi ushaimandaca ninandami Jehová Diostaca agradicipani. Jehová Diosta sirvinami cushilla causachun ayudahuashca.

“Causaimanda shuj shuj tapuicunatami charircani” (RAUDEL RODRÍGUEZ RODRÍGUEZ)

NACIRISHCA HUATA: 1959

LLACTA: CUBA

PAIPA PUNDA CAUSAI: AUTORIDADCUNAPA CONTRAMI IMACUNATAPASH RURAN CARCA

ÑUCA PUNDA CAUSAI: Ñucaca Cuba llactapimi nacirircani. Ñuca causajui pushtupica pobrella, ashtaca macanajuicunapashmi tian carca. Ñuca joven cashpaca yudo nishcata y shuj shuj macanajuna deportecunatami practicai callarircani.

Ñucaca ali estudiantemi carcani. Chaimandami ñuca taitacunaca universidadman richun animahuarca. Chaipimi cai llactapa gobiernoca nalipachami, cambiarinami can yashpa autoridadcunapa contra imacunatapash rurai callarircani. Universidadmanda shuj compañerohuanmi shuj policiapa pistolata shuhuangapaj munashpa policiataca ninanda macarcanchi. Chaimi ñucanchitaca carcelman churashpa huañuchi tucuna sentenciata curca. Chai tiempopica veinte huatacunatallami charircani.

Carcelpi cashpaca, policiacunapa ñaupajpi ña disparai tucugrijushpa ama manllajushcata ricuchingapami, imashina cana cashcata repasarcani. Shinapash shuj shuj tapuicunapimi pensarijurcani: ¿Imamandashi llaquicunaca tian? ¿Sufrishpa causangapallachu nacirishcanchi? nishpa pensarijurcani.

BIBLIAMI ÑUCA CAUSAITA CAMBIARCA: Jipamanga antsicarin huañuchi tucunapa randica treinta huatacunata carcelpi yalina senteciami llujshirca. Chaipimi Bibliapa yachachishcacunata cazungapaj munashcamanda, carcelpi churai tucushca testigo de Jehovacunata rijsircani. Paicunaca carcelpica imapash nalita rurashcamandaca na carcachu. Shinapash paicunaca culiraca na carcachu. Paicunaca tranquilomi can carca. Chaita ricushpami paicunataca ninanda alicachircani.

Chai testigo de Jehovacunami Taita Dios cai alpamanda tucui nalicunata anchuchishpa, ali gentecunatalla cai alpapi causachun saquinatami Bibliapica ricuchihuarca. Shinallata gentegucunaca para siempre causana oportunidadta charinatapashmi ricuchihuarca (Salmo 37:29).

Testigo de Jehovacuna imata yachachijta gushtashpapash ñuca cambiarishpa paicunashna canataca nunca na ushashachu yan carcani. Ñucaca político cosascunata saquinata, pipash imatapash rurajpi na imatapash rurashpa saquinataca nunca na ushashachu yuyarcanimi. Chaimi Bibliataca mejor ñucallami liisha yarcani. Shinapash Biblia enterota lii tucuchishpaca testigo de Jehovacunalla Jesusta punda catijcunapa ejemplota catinajushcatami cuenta japircani.

Bibliamanda yachajunami ñuca cambiarina cashcata cuenta japichun ayudahuarca. Ñucaca malcriado shimicunata nishpa parlanata, tabacota chupanata, político cosascunapi chapurinatapashmi saquina carcani. Chaicunata saquinaca ñucapaca shinllimi cahuarca. Shinapash Jehová Dios ayudajpimi chaicunataca asha asha saqui usharcani.

Ñucaca ñapash culiranllami carcani. Chaita cambiarinami ñucapaca shinllipacha cahuashca. Cunangamanmi Jehová Diostaca ama ñapash culirangapaj ayudahuai nishpa mañapani. Ama ñapash culirangapaca Proverbios 16:​32 versomi ninanda ayudahuashca. Chaipica: “Ninan shinlli runapa randica, na ñapash fiñarij runami ashtahuan ali. Paipa munaita jarcarij runaca, shuj pueblota japij runatapash ashtahuan yali alimi” ninmi.

1991 huatapi carcelpi cashpallatami bautizarircani. Cati huatapica huaquingunata carcelmanda libre saquishpa España llactapi familiacunata charijpimi chaipi causachun cacharca. España llactaman chayashcandimi testigo de Jehovacunapa tandanajuicunaman ri callarircani. Huauquipanicunaca ñucata siempre rijsihuashcashnami chasquihuarca. Paicunami chaipi causai ushachun ayudahuarca.

¿IMA BENDICIONGUNATATA CHASQUIPASHCANI?: Cunanga ñuca huarmigundi, ñuca ushicunandimi Jehová Diostaca cushilla sirvipanchi. Shuj gentegucunapash Bibliamanda yachajui ushachunmi ñucaca mayoría de tiempota Bibliamanda yachachishpa yalini. Ñuca causaipi pensarishpaca, ñuca joven cashpaca ñallapachami huañurcani yashpami Jehová Diostaca paipa bendiciongunamandaca ninanda agradicipani. Jehová Diosca ñallami cai alpataca shuj paraisota ruranga. Chaipica imapash nali ruraicuna, huañuipash na tiangachu. Chaicuna pactarichunmi cushilla shuyajuni (Apocalipsis 21:3, 4).

[Comentario]

“Taita Dios shutiguta charijtami yachajurcani”

[Foto]

Ñuca cusaguhuanga señaspi parlaj gentegucunaman Bibliamanda yachachinataca ninandami gushtapanchi