Eaa taau e manako ra me rongo koe i te tuatua, “Te vaitata maira te openga”? Te manako ra ainei koe e ka tae mai te Mesia ka apai i te aronga meitaki ki runga i te rangi e ka titiri i te aronga kino ki roto i te ai era? Me kore te manako ra ainei koe e ko te mate o tetai tangata? Na te akamanako anga i teia au akatutuanga, penei ka taitaia, ka ekoko, e ka kata aviri tetai pae.

Te akakite maira te Pipiria e ka tae mai te openga. (Mataio 24:14) Kua kapiki katoaia teia tupuanga e ko “taua rā maata o te Atua” e “ko Aramagido.” (Apokalupo 16:14, 16) E tika, e maata te au manako akonoanga kononinoni no runga i teia tumu manako, e te maata atura te au irinakianga tuke e te taitaia. Noatu rai, te taka ua ra ta te Pipiria e taiku ra no runga i te openga​—te akakite maira e eaa te reira. Te tauturu katoa maira te Tuatua a te Atua ia tatou kia mārama meitaki e te vaitata maira te openga. Te mea maata atu, te apii maira te reira e akapeea tatou e ora ai! Ko te mea mua, ka akatikatika tatou i tetai au manako tarevake e ka akanoo i tetai akamāramaanga no runga i te openga. Eaa tikai te aiteanga o “te openga” kia tau ki ta te Pipiria?

1. KARE I TE TAKORE TAKIRI ANGA I TE ENUA KI TE AI.

   Te akakite maira te Pipiria: “[Na te Atua] i akamou i te tumu o te enua, kia kore roa e ngaueue e tuatau ua atu.” (Salamo 104:5) Te akapapu maira teia irava e tetai atu au irava e kare rava te Atua e takore i te enua e kare katoa aia e akatika i te reira kia takoreia!​—Koheleta 1:4; Isaia 45:18.

2. KARE I TE MEA TUPU UA.

   Te akaari maira te Pipiria e kua akanoo takere te Atua i tetai tuatau tikai no te openga. Te na ko ra e: “Kareka te reira rā e te reira ora, kare rava tetai e kite, kare oki te au angela o te rangi, kare katoa oki te Tamaiti, ko te Metua anake ra. E matakite oki ia kotou, e akamaroiroi, e e pure; kare oki taua tuatau ra i kitea e kotou.” (Mareko 13:32, 33) Te taka meitaki ra e kua akanoo “te Metua” ko te Atua i te “tuatau” e akatupu ei aia i te openga.

3. KARE NA TE TANGATA E TE AU TOKA PURURU O TE MAREVA E AKATUPU I TE OPENGA.

   Na teaa ra e akatupu i te openga? Te na ko ra a Apokalupo 19:11 e: “Kite atura oki au i te rangi i te vevete angaia, e i na, e oroenua teatea; e ko tei noo ki rungao ra, kua karangaia aia, i te Pikikaa kore, e te Tuatua-mou.” Akakite katoa te irava 19 e: “E kua akara atura au i taua puaka taae ra, e te au ariki o te ao nei, e to ratou au nuku tamaki, kua putuputu e tamaki iaia i tei noo ki runga i te oroenua ra, e i tona nuku.” (Apokalupo 19:11-21) Noatu e e akatutuanga te maataanga o teia au tuatua, ka kite viviki atu tatou i teia: Ka tono mai te Atua i tetai nuku vaeau angera kia takore i tona au enemi.

1. KO TE OPENGA O TE AU KAVAMANI PUAPINGA KORE A TE TANGATA.

   Te akamārama maira te Pipiria e: “I te au rā o taua au ariki ra, e akatupu ei te Atua no te rangi i tetai  basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.” (Daniela 2:44) Mei tei akakiteia i mua atu ana, i te 3 o te manako, ka takoreia “te au ariki o te ao nei,” te ka “putuputu [mai] e tamaki iaia i tei noo ki runga i te oroenua ra, e i tona nuku.”​—Apokalupo 19:19.

2. KO TE OPENGA O TE TAMAKI, TE TĀ UA, E TE TU TAU KORE.

   Ka “akakore [te Atua] i te tamaki e tae rava akenei ki te openga enua.” (Salamo 46:9) “Na te aronga tiratiratu oki e noo i te enua, e te aronga apa kore te ka akatinamouia ki reira; Ka tipu keia ra te aronga kino i te enua nei, e te aronga rave ara ra, ka kiriti tumuia ïa.” (Maseli 2:21, 22) “I na, te akariro nei au i te au mea ravarai ei mea ou.”​—Apokalupo 21:4, 5.

3. KO TE OPENGA O TE AU AKONOANGA TEI KORE I AKONO I TE ATUA E TE AU TANGATA.

   “Kua totou pikikaa te au peroveta; e i ta ratou e tutaraʼi te kau taunga; . . . e akapeea ra kotou kia tae ki te openga ra?” (Ieremia 5:31) “E manganui te ka tuatua mai kiaku i taua rā ra, E te Atu, e te Atu, kare aina kua apii matou ma toou ingoa; e kua tuaru i te au demoni i toou ingoa; e kua rave i te au akairo e manganui ma toou ingoa? Ko taku ïa e karanga atu, Kare takiri au i kite ia kotou: ka aere ke atu kotou, te aronga rave tuatua kino.”​—Mataio 7:21-23.

4. KO TE OPENGA O TE ARONGA TEI AKATUPU E TEI TURU I TE AKATEREANGA O TE AO NEI.

   Kua akakite mai a Iesu Karaiti e: “Teia taua akaapa ra, ko te mārama kua tae mai ki te ao nei, e i anoano akenei te tangata i te poiri, kare te mārama, no te mea te kino ua ra ta ratou tuatua.” (Ioane 3:19) Te akataka maira te Pipiria i tetai akapouanga i mua ana takapini i teianei ao i te tuatau o te tangata tiratiratu ra ko Noa. “I mate ei te reira enua i te tapoki angaia e te tai: Kareka te rangi e te enua e vai nei, te tāpuia nei ïa e taua tuatua ra no te ai, kia tae ki te rā akavaanga, e te mate o te aronga akono kore i te Atua ra.”​—2 Petero 3:5-7.

Kia mārama tatou e ko “te rā akavaanga, e te mate” e tu mai nei, kua akaaiteia ki te akapouanga o “te reira enua” i to Noa tuatau. Eaa te reira enua tei akapouia? Kua vai ua rai te enua; mari ra ko “te aronga akono kore i te Atua”​—to te Atua au enemi​—tei “mate.” I te tuatau o “te rā akavaanga” o te Atua e tu mai nei, ka takore katoaia te aronga tei riro mai ei au enemi no te Atua. Inara ka ora te au oa o te Atua, mei ia Noa rai e tona ngutuare tangata.​—Mataio 24:37-42.

E akamanako ana mei teaa atura te manea o teia enua me takore te Atua i te au kino ravarai! Te taka ua ra, e nuti meitaki te karere a te Pipiria no te openga, kare i te nuti kino. Penei ka manako rai koe e: ‘Te akakite maira ainei te Pipiria kia tatou e aea te openga e tae mai ei? Te vaitata maira ainei teia? Akapeea au e ora ai?’