APII 9
Akapeea Toou Pamiri e Mataora Ai?
1. Eaa i puapinga ai te akaipoipo i roto i tetai pamiri mataora?
No ko mai te au tuatua meitaki ia Iehova, te Atua mataora, te inangaro ra i te au pamiri kia mataora. (1 Timoteo 1:11, NW) Nana i akatumu mai i te akaipoipo. E e puapinga tikai te akaipoipo kia akamanaia kia mataora te pamiri, no te mea te oronga maira te reira i te turanga tinamou no te utuutu anga i te tamariki. Ka anoanoia te au Kerititiano kia akangateitei i te au ture a te enua no runga i te retita anga i te akaipoipo.—E tatau ia Luka 2:1, 4, 5.
Eaa to te Atua manako i te akaipoipo? Te inangaro ra aia i te reira ei pirianga tinamou i rotopu i tetai tane e te vaine. Te inangaro ra a Iehova i te au tane e te au vaine kia tiratiratu ki tetai e tetai. (Ebera 13:4) E mea riri nana te kopaeanga. (Malaki 2:16) Inara e akatika ana aia i te au Kerititiano kia kopae e kia akaipoipo akaou me akaturi to ratou tokorua.—E tatau ia Mataio 19:3-6, 9.
2. Akapeea te tane e te vaine me akono i tetai e tetai?
Kua anga mai a Iehova i te tane e te vaine kia rave i ta raua tuanga i roto i te akaipoipo. (Genese 2:18) Ei upoko no te pamiri, ka akono te tane i te au mea e anoano ra tona pamiri e kia apii kia ratou no runga i te Atua. Kia akaari aia i te tu akaatinga no tona inangaro i tana vaine. Kia inangaro e kia akangateitei te au tane e te au vaine i tetai e tetai. No te mea e tu apa to te au tane e te au vaine, ko te taviri e mataora ai te akaipoipo, kia akakore raua i te ara a tetai e tetai.—E tatau ia Ephesia 4:31, 32; 5:22-25, 33; 1 Petero 3:7.
3. Ka akaruke ainei koe i tetai akaipoipo kare e mataora ana?
Me te kite ra koe i te au turanga ngata i roto i toou akaipoipo, e angaanga kapiti korua kia akono i tetai e tetai ma te aroa. (1 Korinetia 13:4, 5) Kare te Tuatua a te Atua e akamaroiroi ana i te akatakake anga ei ravenga no te akatikatika anga i te au manamanata tei matauia i roto i te akaipoipo.—E tatau ia 1 Korinetia 7:10-13.
4. Te au tamariki, eaa ta te Atua e inangaro maira no kotou?
Te inangaro maira a Iehova ia kotou kia mataora. Te oronga maira aia i te tauturu meitaki rava atu e akapeea kotou e mataora ai i to kotou oraanga mapu? Te inangaro maira aia kia puapingaia kotou mei te tu pakari e mei ta to kotou au metua i na roto ana. (Kolosa 3:20) Te inangaro katoa maira a Iehova ia kotou kia mataora i te rave i te au mea no Tei Anga mai ia kotou e no tana Tamaiti.—E tatau ia Koheleta 11:9–12:1; Mataio 19:13-15; 21:15, 16.
5. Te au metua, akapeea ta kotou tamariki e mataora ai?
E angaanga pakari koe kia rauka mai te kai, tetai are, e te kakau no taau tamariki. (1 Timoteo 5:8) Inara, e mataora ei taau tamariki, ka anoano katoaia koe kia apii ia ratou kia inangaro i te Atua e kia apiiia mai e ia. (Ephesia 6:4) Ka riro taau akaraanga i te akaari anga i te inangaro i te Atua ei akakeu anga maata i taau tamaiti. Me akatumu koe i taau apiianga ki runga i te Tuatua a te Atua, ka akatikatika te reira i te manako o taau tamaiti na roto i te tu papu.—E tatau ia Deuteronomi 6:4-7; Maseli 22:6.
Ka puapingaia te au tamariki me akamaroiroi e me akameitaki atu koe ia ratou. Ka anoano katoaia ratou kia akatikatikaia e kia akoia. Ka riro taua au terenianga ei paruru ia ratou mei te au tu kino te ka akamaromaroa ia ratou. (Maseli 22:15) Inara, eiaa te akoanga e kino pakari roa.—E tatau ia Kolosa 3:21.
Kua nenei te Au Kite o Iehova i tetai au puka tei tataia ei tauturu i te au metua e te au tamariki. Kua akatumuia teia au puka ki runga i te Pipiria.—E tatau ia Salamo 19:7, 11.