Мангле пхраљален хем пхењален,

Ко ефтато веко а.а.е., о пророко о Езекиел дикхља јекх посебно визија. Ов дикхља јекх бари небесно кочија која со водинела ла о Најбаро ко цело универзум. И кочија движинела пе сине бут сигате хем шај сине те менинел о правцо бизо те тикњарел и брзина или чак бизо те иранел! (Езек. 1:4, 9, 12, 14, 16⁠-27).

Акаја визија сикавела аменге кај о небесно дело тари е Јеховаскири организација секогаш движинела пе. А со керела о дело тари е Јеховаскири организација сој тано ки Пхув? Таро службено берш со накхља шај те дикха кај е Јеховаскоро народо ки Пхув движинела пе сигате!

Акате ки Америка, и бетелско фамилија сине зафатими селибаја таро Бруклин ко амаро нево главно седиште ко Ворвик (Њујорк), хем исто аѓаар ко јавера бетелска објектија или ко подрачје. Ко јавера да подружнице ко свето, о бетелска фамилие исто аѓаар тане зафатиме градибаја хем реновирибаја. Исто аѓаар, несаве подружнице спојнѓе пе или селинѓе пе. А сар тано туменцар? Иако шај на ваљани сине те селинен тумен, сигурно сиен сине зафатиме ки служба башо Јехова.

Бут сием охрабриме кеда дикхаја кај е Девлескоро народо ко цело свето тано позафатимо таро било кеда англедер хем тано ко тек е Јеховаскере организацијаја. Бут објавителија одлучинѓе те селинен пе ко тхана коте со иси побари потреба. Јавера почминѓе те проповединен ки јавер чхиб. Бут џене пробинѓе неви гранка тари служба, или бајрарѓе пли служба ко јавера начинија. Са о верна слуге, машкар кола сој о попхуре хем о насвале, истрајно прастана ки трка со ингарела ко живото. Ола тане зафатиме ки служба башо Јехова хем аѓаар сикавена кај о Сатана тано ховавно (1. Кор. 9:24).

Овен сигурна кај о Јехова дикхела тумари ревност со сикавена ла (Евр. 6:10). Тумаро спремно стави сетинкерела амен ко Авраам хем ки Сара. Кеда сине ле повише таро 70 берш, о Авраам мукхља и диз Ур коте со бијандило хем гело дур ко Ханаан, коте со ваљани сине те живинел ко шаторија панда шел берш џи ко крајо таро пло живото. Ле хем е Сара чаче сине лен спремно стави! (1. Мој. 11:31; Дела 7:2, 3).

Дали тумен да иси тумен асавко спремно стави? Секој со верно хем истрајно служинела е Јеховаске ко акала пхаре времија керела адава со вакерѓа аменге о Исус: „Џан хем керен ученикија таро мануша таро са о народија, хем крстинен лен ко анав е Дадескоро  хем е Чхавескоро хем е свети духоскоро“ (Мат. 28:19).

Адава со о Исус вакерѓа „џан“, сикавела кај ваљани те ова активна. Бахтале сием кеда дикхаја кобор бут буќа керѓе лескере ревна следбеникија ко берш со накхља. Дикхјола пе кај о Јехова денѓа бут баро берекети ко проповедибе колеа со објавинела пе о шукар хабери са е народонге (Мар. 13:10).

Бут мануша прифатинена о шукар хабери. О берш со накхља, најбаро број таро објавителија сине 8.340.847, хем секова масек ко просек водинена пе сине 10.115.264 библиска курсија. Јасно дикхјола кај и небесно кочија движинела пе сигате! Адалеске, понадари да керен и служба соске ачхило панда хари време о мануша те спасинен пе.

Кобор само одговоринела акале бершескоро стихо: „Нека овел тут доверба ко Јехова хем кер адава сој шукар“ (Пс. 37:3). Кеда шунена акала лафија, хем керена адава сој шукар аѓаар со керена свето служба е Јеховаске, сикавена кај иси тумен доверба ки лесте. Никогаш ма бистрен кај на сиен коркори. О Исус секогаш ка икерел пе ко пле лафија: „Ме сиум туменцар ко са о диве џи ко крајо акале светоскоро“ (Мат. 28:20).

О Јехова понадари да ка наградинел тумари верно служба. Бизи разлика дали адава со кераја ле тано хари или бут, ов ценинела кеда даја амаро најшукар хем кеда кераја адава таро исправна мотивија. Тегани, ов тано бахтало хем цело вилеа прифатинела о буќа со кераја баши лесте (2. Кор. 9:6, 7). Адалеске понадари да ачховен паше тумаре мангле Дадеа аѓаар со ка молинен тумен редовно, ка проучинен и Библија, ка џан ко состанокија хем ка овен зафатиме е проповедибаја.

Адалеске со е Бенге иси ле панда „хари време“, ов тано одлучно те керел са со шај само те на ачховен верна е Јеховаске (Отк. 12:12). Ачховен паше е Јеховаја хем о Сатана нане те успејнел ко адава (Пс. 16:8). Бут мангаја тумен хем ценинаја са адава со керена ки служба е Господареске ко акала последна диве.

Тумаре пхраља,

Водечко тело е Јеховаскере сведоконгоро