Sikilem sar si te lashavol so nai vorta

E URSULA MENNE DEL DUMA PA PESKO TRAIO

De tsinorhara kamlem te dikhau o gies kana savorhe traisa ande iek lumia vorta. Gadia but kamavas godo, ke phandade man ande vriama kai sas le comunista anda o Niamtso oriental. Ai kana simas phandadi sikilem sar sas te lashavon le dieli kai nai vorta.

ARAKHADILEM ando 1922 ando foro Halle ando Niamtso, uni 200 kilometria anda o Berlín. E Käthe, murhi phei arakhadili ando 1923; murho dat sas zhandari ai murhi dei gilabalas ando teatro.

Sikilem katar murho dat ke le dieli kai nas vorta trobun te lashavon. Kana meklias te avel zhandari kindias iek bazari. Sar le manush kai zhanas te kinen nas len love, ai sas leske mila, delas len unzhile. Ai gadia jasardias sa. So sas murhe dadesa trobulas te sikavel man ke nai ande amare vast te lasharas le dieli kai nai vorta. Numa, so kames te keres kana san terno, si sar iek iag kai nai vushoro te mundares.

E Käthe ai me sikiliam katar amari dei but dieli. Sar te plachal amen e muzika, te khelas ai te gilabas. Murhi phei ai me samas defial veselime numa ando 1939 parhudilo sa.

Astaren te aven le prame chorhe

Kana sas man uni 15 borsh ai getosardem e escuela, dem ande iek escuela kai sikavenas ballet. Sikilem te khelau sar e Mary Wigman, voi sas iek zhuvli kai khelelas te sikavel sar aliarelaspe (danza expresionista). Ai vi astardem te forbou. Sa godola borsh sikilem but dieli ai simas veselime. Zhi kai areslo o duito mundarimos ando 1939. Dui borsh mai angle ando 1941, aresli aver prama kai andias but kino pe mande: murho dat nasuailo ai mulo ke sas chijotkime (tuberculosis).

O mundarimos si iek prama defial zhungali. Makar kana avilo o mundarimos sas man 17 borsh dem po gor ke e lumia diliaili sas. Dikhlem sar parhudilo o gindo katar but manush kai sas lenge drago e pacha ai astarde te gindinpe sar le nazi. Suako gies dikhasas chorhimos, martia ai sa parhado. Pala iek bomba amaro kher pharhadilo. Ai ande vriama kai sas o mundarimos but anda murhe niamuria mule.

Ando 1945, kana getosailo o mundarimos, murhi dei, e Käthe ai me beshasas ando Halle. Ande godia vriama simas ansurime ai sas man iek tsinorhi. Murhi tsera nas vorta ai pala godia mekliam amen. Akana me korkorho trobuvas te dau te jal murha sha. Pala godo astardem te khelau ai te forbou te avel man love.

Porme ke getosailo o mundarimos, o Niamtso sas ulado ande shtar. Amaro foro ashilo tela e Union Sovietica ai pala godia trobusardiam te trais tela o comunismo. Ando 1949 e rig anda o Niamtso kai samas kerdili República Democrática Alemana.

O traio tela o comunismo

Ande godia vriama, murhi dei nasuaili ai trobusardem te arakhau la. Astardem te kerau buki ande iek oficina katar e Union Sovietica. Numa mai angle prinzhardem ka uni terne kai nas lenge drago so kerenas le manush kai amperetsinas ai kamenas te sikaven le prame kai nas vorta. Iek ejemplo si, ke chi mekle ka iek terno te zhal ande universidad ke lesko dat mai anglal sas nazi. Me kidavas man lesa ai prinzharavas les mishto. Pala godia pushavas man: “Sostar trobulas te pokinel vo pala so kerdias lesko dat?”. Tsirha po tsirha astardias te avel man o gindo kai sas ka godola terne, atunchi thode man lentsa; iek gies thodem rhartii avri anda o tribunal te sikavau ke nas mange drago so nai vorta.

Sar keravas buki ando Comité Regional de Paz, trobuvas te ramou lila makar gindivas ke nas vorta so phenenas. Iek data o Comite alosardias te tradel rhartii comunista ka iek manush phuro kai sas ando Niamtso occidental, te gindin pa leste ke sas iek manush kai del le zea ka pesko them. Godo mange sas vareso defial zhungalo. Pala godia garadem le rhartii ai chi tradem len.

“E zhuvli mai bilashi” dias man vareso lasho te azhukerau

Ando junio katar 1951, dui manush avile kai keravas buki ai phende mange: “San phandadi”. Ningerde man ande rhobia Roter Ochse (O Guruv Lolo), ai iek borsh mai angle shinde murhi kris sar ke dem le zea ka o them. Iek terno phendiasas ka e Staci, e kris chordai, kana thodem le rhartii avri anda o tribunal. Chi shinde kris vorta, ke khonik chi ashundias so sas man te phenau; alosarde te beshau ande rhobia 6 borsh. Kana simas kotse nasuailem ai thode man kai sas le zhuvlia nasualia, von sas 40 zhuvlia. Kana dikhlem lenge muia defial tristo aliardem ke chi trobuvas te avau kotse. Prastaiem ai astardem te marau le vastentsa o vudar.

—So kames?—phendias o zhandari.

—Te ankliau katsar!—tsipisardem—. Phandaven man korkorho, numa ankalaven man katsar!

Numa o zhandari chi lias mange opre. Ande tsirha vriama dem po gor ke sas iek zhuvli ke nas sar le kolaver. Ande lake iakha sas pacha, pala godia gelem te beshau pasha late.

Voi phendias mange: “Te beshesa pasha mande, arakh tu. Savorhe gindin ke katsar sim e zhuvli mai bilashi ke sim marturo le Jehovasko”.

Chi zhanavas ke dikhenas kal marturia le Jehovaske sar dushmaia katar o them. Kana simas tsinorhi, dui manush kai sikionas pa e Biblia (sar prinzharenas len de mai anglal) denas duma murhe dadesa. Ai murho dat phenelas pa lende: “Le manush kai sikion pa e Biblia si len o chachimos”.

Ruiem kana prinzhardem godola zhuvlia ke andias mange pacha, voi bushelaspe Berta Brüggemeier. “De duma mantsa pa o Jehova!”, phendem lake. Le dui nakhasas but vriama ai univar dasas duma pa e Biblia. Iek anda le dieli kai sikilem sas ke o Jehova si o Del o chacho ai ulimasko, iek Del vorta ai katar e pacha. Ai vi sikilem ke si te ankalavel le prame chorhe kai keren le manush bilashe. Sar phenel ando Psalmo 37:10, 29 (E Nevi Viasta ai o Psalmo): “Mai tsirha vramia, ai o nasul chi mai avela [...]. Le vorta avela lengo o them, Ai von beshena pe sakda [siempre]”.

Anklistem anda e rhobia ai zhautar ando Niamtso occidental

Ando 1956, anklistem porme te ashau 5 borsh phandadi. Nakhle pansh giesa ai gelem ando Niamtso occidental. Sas man dui shea kai gele mantsa, e Hannelore ai e Sabine. Porme te pharhadiol murhi tsera rodem kal Marturia. Kana astardem te sikiuau pa e Biblia aliardem ke, te kerau so kamel o Jehova, trobuvas te parhuvau dieli anda murho traio. Thodem but mandar te parhudiuvau, ai ando 1958 boldilem.

Ansurisailem pale, numa akana iekhe manushesa kai sas marturo le Jehovasko, o Klaus Menne. Sas amen iek traio defial shukar ai sas amen dui shave: o Benjamin ai e Tabia. Akana sim phivli ke o Klaus de bish borsh mulo. Numa del man pacha te zhanau ke le mule si te zhuvindin ai ke si te train ande iek shukar paraiso pe Phuv (Lucas 23:43, La Biblia. Traducción del Nuevo Mundo; Le Apostolengo 24:15). Aver prama kai del man pacha si ke murhe shtar shave luvudin ka o Jehova.

Sikilem ande Biblia ke numa o Jehova shai lasharel le prame kai nai vorta. Vo zhanel sa so nakhas, vi le prame kai khonik nashtil te zhanel. Te zhanau kako azhutil man kana nakhau prame kai nai vorta ai vi te del man pacha. Eclesiastés 5:8 phenel: “Te dikhesa ke ande kiro foro kerdiol vareso nasul ka o manush kai nai les love ai ke chi lelpe sama katar le manush ai chi shinelpe kris vorta, na chudisavo. Ke opral katar godo kai ningerel o foro si aver mai baro, ai opral lendar si aver mai bare kai dikhen len”. O mai baro anda sa, si kon kerdias sa le prame, o Jehova. E Biblia phenel pa leste: “Leske iakha dikhen swako fielo kai ame keras. Musai das ame atweto ka Del pala so kerdiam” (Zhiduvuria 4:13).

Dikhau 90 borsh palpale

Butivar pushen mandar sar sas murho traio kana sas le nazi ai le comunista. Phenau “Nas vushoro”. Gindiu ke suako data kai o manush kamlias te amperetsil numa sikavel so phenel e Biblia: ke o manush nashtil te amperetsil le manushen. Pala godia e Biblia phenel: “O manush thodias avre manushes tela pesko vast te anel peske chorhumos” (Eclesiastés 8:9). Chache vorbi!

Kana simas terni ai pakiavas sa, azhukeravas katar le manush te lasharen le dieli kai nas vorta; akana zhanau ke numa o Jehova shai anel iek lumia kai chachimasa avela vorta, kana ankalavela kal manush bilashe ai kana dela ka pesko Shau, o Jesukristo, e Phuv te amperetsil la. Ke vo si o mai malado sostar thodias ande pervo than so trobulas le kolavren ai na so kamelas. E Biblia phenel pa o Shau le Devlesko: “Drago sas tuke so si chacho, ai vurhitsisardia so nai chacho” (Zhiduvuria 1:9). Sim defial naisime ka o Del, te prinzharau ka o Amperato kai thodias kai si lasho ai chacho. Azhukerau te traiu pe sa e vriama tela leski Amperetsia.

[Patreto]

Murhe shea, e Hannelore ai e Sabine, ai me kana aresliam ando Niamtso occidental

[Patreto]

Agies, murho shau o Benjamin ai leski rhomni e Sandra ai me