Kon ningeren le lashe viesti katar e Amperetsia phenen

Arakhlias pala soste te trail

O Jesus phenel ke prinzharel ka peske bakrorhe (Iovano 10:14). Kana iek manush si les iek lasho ilo ai drago leske e pacha ai so si vorta, si te kamel te avel manushentsa kai lenpe pala o Jesus. Si te avel les pala soste te trail, sar iek zhuvli anda Bélgica. E zhuvli phenel:

“Kana le marturia le Jehovaske marde ka murho vudar, simas defial nekezhime ai kamavas te mundardiuvau. Sas mange drago kana phende ke le bedi kai si ande lumia chi mai sas te aven, numa chi plachaias man ke si o Del kon si te kerel godo. De ojto borsh kai chi mai zhavas ka murhi khangeri, sostar chi plachalas man ke chi kerenas so sikavenas. Numa, dem po gor ke so phenenas le Marturia sas chacho, ai aliardem ke nas vushoro te trais bi le Devlesko.

”Polme ke dem duma tsirha le marturentsa, chi mai dikhlem len. Aliardem man defial tristo. Ando gies piavas dui pochiki tsigeri ai vi astardem te piau draba chorhe. Sar kamavas te dau duma murhe paposa kai jaisailo, astardem te zhau kal manush kai kerenas farmichi. Pala so kerdem, nakhle but prame zhungale! De riate, kana simas korkorho aliaravas ke le demonuria sas mantsa. But shon aliardem godo. Kana pherelas o kham daravas te avau korkorho.

”Iek gies kana gelem te phiravau man, gelem pe iek drom nevo kai chi lavas mai anglal ai areslem kai vazdenas iek baro kher. Kana pashilem, dem po gor ke godola manush sas marturia le Jehovaske kai vazdenas iek Rig te kidenpe. Serdem mange kana avenas khere, ai gindisailem ke sas te avel defial shukar te aven sa le manush sar lende.

”Kamavas ilesa te ambolden pale khere, pala godo dem duma uni Marturentsa kai vazdenas e Rig kai sas te kidenpe. Rhugisailem ka o Del, ai desh giesa mai angle o manush kai dias duma mantsa mardias ka murho vudar. Ai pushlias mandar te kamava te estudiu pale, ai phendem ke kamavas. Ande fuga akhardias man te zhau kai kidenpe, ai gelem. Chi dikhlemas vareso gadia! But vriama rodem manush veselime kai kamenpe iek avres ai akana arakhlem len.

”De atunchara gelem suako data kai kidenaspe. Trin kurke mai angle meklem te piau tsigeri. Shudem libruria ai prame kai denas duma pa sar zhinenpe le cheraia ai e muzika bengeski, ai kotse aliardem ke le demonuria zhanastar. Thavas ande murho traio so sikiuavas pa le zakonuria le Jehovaske, ai trin shon mai angle gata ningeravas le lashe viesti. Shou shon mai angle boldilem, ai dui giesa mai angle astardem te dau but anda murhi vriama te ningerau le lashe viesti.

””Naisiu le Jehovaske sa so kerdias pala mande. Akana si man pala soste te traiu. Ei, o anau katar o Jehova si iek kher zuralo kai dem po gor ke shai arakhel man (Proverbios 18:10). Aliarau man sar o manush kai ramosardias o Salmo kai phendias: ‘‘Iek gies ande cho kher si mai mishto ke iek mia ande aver rig! Alosarau te avau ande punrhende angla o vudar katar o kher murhe Devlesko ke de sar te traiu ande le tseri kai si nasul’”.

Kacha zhuvli kai si la lasho ilo arakhlias pala soste te trail. Ai vi fersavo manush shai arakhel godo te rodela lashe ilesa ka o Jehova.