Si millonuria kristianuria kai chi chidenpe ando Krechuno (Navidad). Keinpe pala so alosarde? Si vareso kai sas lenge drago katar le prame kai kerenas? Lenge shave gindin ke jasaren penge vareso shukar? Aida dikhas so mothon uni marturia le Jehovaske anda uni riga la lumiake.

Te seras le Jesusos: “Mai anglal te avau marturo le Jehovasko, univar zhavas ka e khangeri. Numa zhavas ando Krechuno ai e Patrazhi. Chi ande godola giesa chi davas man gogi ando Jesus. Akana ke chi thau o Krechuno, chidau man duvar ando kurko ande murhi congregacion ai sikavau le manushen so mothol e Biblia pa o Jesus” (E EVE, AUSTRALIA).

Te das vareso shukar avren: “Plachal man but kana den man vareso kai chi azhukerau. Kako veselil man but! Drago mange te ramou lilorha ai te dau avreste. Gadia von ai me sam veselime” (O REUBEN, IRLANDA DEL NORTE).

Te azhutis kas trobun: “Plachal amen but te lasharas jabe te das kal nasuale. Univar ningeras lenge vareso guglo, lulugia vai vareso shukar te aliarenpe mai mishto. Ai kako shai keras les fersavo gies ando borsh” (E EMILY, AUSTRALIA).

Te chidas amen la familiasa: “Kana sa e familia chidelpe ande iek than kai si pacha, le tsinorhe shai prinzharen mai mishto ka peske kak, ka peske papuria ai ka peske veri. Sar chi sam phangle ka le zakonuria, amare niamuria zhanen ke zhas te dikhas len sostar kamas len, ai na sostar thol amen e musai” (E WENDY, ISLAS CAIMÁN).

Te rodas e pacha: “Ando Krechuno sas man but dieli te kerau, ke nas man vriama, chi te gindiu man so si e pacha. Sikilem so shinavel e Biblia le manushenge ai arakhlem e chachi pacha. Zhanau ke murhe shave si te train ande iek lumia mai shukar” (E SANDRA, ESPAÑA).