Письмо андо Римо 3:1-31
3 Тоди саво толко тэ авэс евреё? И саво лашымос, кай о мануш опшындёл?
2 Када анэн бут лашымос. Само пэрво, о Дэл дя лэ евреёнэнди и свынти лила*.
3 Но со, если дэсавэ евреёря на патян? Если вонэ на патян, сыкавэл када, кай и мануша будэр на лэна тэ патян лэ Дэвлэсти?
4 Точно най! Дажэ если всаворэ мануша ашэна хохавнэ, о Дэл всаек чачуно, важ кода кай андэ Свынти Лила пистромэ: «Тирэ алава доԥэнэна, кай ту право, и ту победиса, кала тут лэна тэ дошалярэн».
5 Кала амэ терас нэправильно, тоди инке май драго дицол, кай о Дэл вся терэл правильно. Тоди со, вижал о Дэл шылийпэ, кала холявэл? (Мэ ԥэнав кадя, сар гиндон дэсавэ мануша.)
6 Най, никала! Важ кода кай если о Дэл шылийпэ, тоди сар во андярэла сындо пэ люма?
7 Но если мэрно хохаимос потвердий, кай о Дэл ԥэнэн чачимос, и через када во ашэл ашунгло, тоди васо ман сындон сар бэзэхэстирэ манушэс?
8 И васо тоди тэ на ԥэнас: «Амэ ласа тэ терас вэрытимос, кай тэ вижал лашымос?» Дэсавэ мануша припистрон кадэла алава амэнди. Кацавэ манушэндар спушэна па кода, со вонэ затердэ.
9 И со, вижал, амэ май лашэ аврэндар? Най! Сар ужэ сас ԥэндо, и пэ евреёря, и пэ грекоря — пэ всаворэ тасавэл о бэзэх.
10 Кадя пистромэ андэ Свынти Лила: «Нинай ни еқэс, ко терэл правильно.
11 Нинай ни еқэс, ко годявэрно, и нико на родэл лэ Дэвлэс.
12 Всаворэ одбанделэ лэстар, всаворэ вонэ римосайлэ. Нико на терэл лашымос, нинай ни еқэс кацавэс».
13 «Лэндири дума анэн каринг о мэримос*. Лэндэ пэ шыб ек о хохаимос». «Кода, со вонэ ԥэнэн, сар лэ сапэско ядо*».
14 «Лэндэ андэ дума ек и амрая и холи».
15 «Важ лэндэ нинай нисо тэ умарэн».
16 «Вся, со вонэ терэн, анэн бида и ԥаримос.
17 Вонэ на ӷанэн тэ жувэн мирно».
18 «Вонэ на ӷанэн, со када патив* англа Дэл».
19 Амэ ӷанас, кай вся, со пистромэ андо законо, трэбуй тэ ритярэн кодэла, ко находийпэ тала законо. Када трэбуй сас, кай нико тэ на виправийпэ и кай драго тэ дицол: вся и люма дошали англа Дэл и затердя, кай во латар тэ спушэл.
20 Кочай о Дэл никас на прижанэн найдошалэса ек важ кода, кай кацаво мануш ритярэл о законо. Па чачимастэ, о законо просто поможый тэ полас, со када бэзэх.
21 Но акана амэ драго полас: амэ можэм тэ ашас найдошалэ англа Дэл, дажэ если на ритярас о законо. Пала када инке май данглал ԥэнэнаспэ андо законо и пистронас лэ Дэвлэстирэ особи мануша*.
22 Тэ ашэн найдошалэ англа Дэл моӷут всаворэ, ко патял андо Исусо Христос, важ кода кай о Дэл на шол сама, ко анда саво народо.
23 Всаворэ мануша бэзэхэстирэ, и лэндар нэ можэт тэ марэл лэ Дэвлэстири стэма*.
24 Но о Христос Исусо спасысардя лэн лэ бэзэхэстар, кала потиндя и цэмин, и о Дэл прижангля лэн найдошалэнца. О Дэл дя амэнди, важ кода кай лэстэ баро ковло ди.
25 О Дэл домэкля, кай и мануша тэ поладин лэса, если вонэ патян, кай лэ Исусоско рат витинэл лэн. Во стердя када, кай тэ дицол: во сыно справедливо. Пока о Дэл тэрпияс, во простияс и бэзэха, савэ вонэ варикала стердэсас.
26 Во кадяжэ справедливо и акана, кала прижанэн найдошалэса кодэлэс, ко патял андо Исусо.
27 Исин амэндэ васо тэ путювас? Най. Трэбуй амэ тэ путювас, кай ритярас о законо? Най, кати если ритярас о законо, важ саво трэбуй тэ патяс.
28 Важ кода кай амэ ӷанас, кай о мануш ашэл найдошало, кала патял, ай най тоди, кала старыийпэ тэ ритярэл о законо.
29 Хэба во кати лэ евреёнэнго Дэл? Хэба во най Дэл и важ и мануша анда всаворэ народоря? Да, во Дэл важ всаворэ народоря.
30 Важ кода кай исин кати ек Дэл, во прижанэн най дошалэнца и кодэлэн, ко опшындо, и кодэлэн, ко найопшындо, если вонэ патян.
31 Вижал, если амэ патяс, сыкавас амэ, кай о законо ужэ на трэбуй? Най. Наоборот, амэ сыкавас, кай о законо трэбуй.
Сноски
^ Или «лэ евреёнэнди сас пэрэдинэ и свынти алава лэ Дэвлэстар».
^ Ворта «лэнго муй — ԥэрнадо ӷробо».
^ Ворта «лэндэ пэ вуш — лэ сапэско ядо».
^ Ворта «пативали дар».
^ Или «кодэла, ко пэрэдэлас и дэвликунэ алава».
^ Или «нэ моӷут тэ авэн идияльни сар о Дэл».
