Пушэн кодэла, ко адинон

Сар через кода, со пистромэ андэ Библия, лэ Иеговастирэ свидетеля диқэн пэ медицынски процэдуры, кала лэн о рат лэ манушэско, саво личийпэ?

Кала о христианино прилэл ришэния, во трэбуй тэ гиндой най пала кода, сар во пэ када диқэл, или со ԥэнэн и врачоря. Но лэсти трэбуй драго тэ розуӷанэн, со пала када ԥэнэнпэ андэ Библия. Кадэлэстар зависит лэстири дружба лэ Иеговаса.

Иегова кодэва, ко дя амэнди и жызня. Во приԥэндя, кай тэ на хас, тэ на пас и тэ на пэрэшас о рат (Бытие 9:3, 4). Андо законо, саво о Дэл дя пэстирэ народости, лэ израильтянонэнди, сас ԥэндо, кай тэ на хан о рат, важ кода кай андэр лэстэ и жызня. О Иегова ԥэндя: «О рат мэ витидэм важ о жэртвеннико, кай тумэ лэса [лэ ратэса] тэ витинэн пэстири жызня». Ай со если и мануша умарэн лэ жывотнонэн, кай тэ хан? О Дэл ԥэндя, кай если кадя, тоди «о мануш мэк вимэкэл анда кода, со астардя, о рат и зашол о рат ла ԥувьяса» a (Левит 17:11, 13). О Иегова упалэ и упалэ пала када ԥэнэнас (Второзаконие 12:16, 24; 15:23). Андэ ек еврейско источнико сас пистромэ: «О рат нащи тэ фэрис, лэс трэбуй тэ вишос пэ ԥув. Кадэлэса сыкавэс, кай лэ ратэса о мануш ужэ нащи нисо тэ терэл». Нисаво израильтянино нащи сас тэ стидэл, тэ фэрий или тэ использует о рат варикаско, важ кода кай и жызня лэ Иеговастар.

Кала о Христос муля, посли кода, ужэ на трэбуй тэ жувас па лэ Моисеёско законо. Но важ о Иегова кадяжэ о рат свынто. Через лэ Дэвлэско свынто духо и апосталоря ԥэндэ лэ христианонэнди, кай «тэ ритярдён май дур лэ ратэстар». И пэ када нащи тэ на шас сама. Тэ ритярдювас май дур лэ ратэстар трэбуй кадя жэ сар и лэ билажавардимастар и лэ хохавнэ дэвлэндар (Деяния 15:28, 29; 21:25). Андо 20 вико андэ больницы линэ тэ стидэн о рат и тэ пэрэшон о рат и када идоси жал. Но лэ Иеговастирэ свидетеля полинэ, кай када лэ Дэвлэсти нэ уӷодно b.

Дэкала и врачоря мангэн кодэлэс, кас лэна тэ личин, тэ сдэл о рат важ дэсавэ курте май англал жы каринг кода, сар тэ терэн и операцыя (предоперационный забор аутокрови, или ПЗА). Када нужно важ кода, если трэбуй авэла, кай вонэ тэ зашон лэ манушэсти лэско жэ рат. Кай тэ стидас или тэ фэрисарас варикай о рат, када на сжалпэ кодэлэса, сар ԥэнэнпэ андэ Библия андэ книжки Левит и Второзаконие. Котэ пистромэ, кай о рат трэбуй тэ вишон пэ ԥув или, можно тэ ԥэнэс, тэ рис лэс лэ Дэвлэсти. Канешно, амэ адес на жувас па лэ Моисеёско законо. Но амэ, лэ Иеговастирэ свидетеля, стас патив пэ кодэла принцыпоря, савэ о Иегова дя лэ израильтянонэнди через о законо. И амэ стас вся о зор, кай тэ на пэрэшас «о рат». Важ када амэ на сдас амаро рат, сар донороря, и на ласа лэс тэ фэрисарас, кай потом амэнди лэс тэ зашон. Важ кода кай када нэ уӷодно лэ Иеговасти.

Но амэ домэкас, кай амэндар тэ лэн о рат пэ анализоря или тэ терэн авэр дэсавэ процэдуры лэ ратэса, но если када на росжалпэ кодэлэса, со пистромэ андэ Библия пала рат. Ай кала лэн о рат пэ анализоря, лэс потом вишон. И врачоря моӷут тэ ԥэнэн тэ терэн и авэр процэдуры, кай исин о рат.

Када можэт тэ авэл гемодилюцыя, — када процэдура, сави терэн, кала жал и операцыя. Кала жал и операцыя лэ манушэстар одындярэн о рат андэ риг. Ай андо рат, саво ашэляпэ андо мануш, зашон и драба. О рат, саво сас одындярдо через о апарато андэ риг, палпалэ зашон андэ вена, кай тэ поможый тэ нормализуеца о гемоӷлабино андо рат. Авэр процэдура, кала андэ рана питял о рат, во можэт тэ стидэлпэ и тэ фильтруеца. И кадя и эритроцыторя ринапэ андо рат кай о мануш — када называеца сбережением крови. Исин и авэр процэдура, кала о рат промэкэн через о спецыально апарато, саво пэ дэсави время терэл вместо оди или лёхки, или и почки. Потом анда апарато рийпэ о рат андо орӷанизмо лэ манушэско жэ рат. Авэр процэдура, кала о рат лэ манушэско одындярэн андо сепаратаро (центрифуга), во котэ вивужардёлпэ или вилэнпэ частицы, савэ сас римосардэ. Ай инке и врачоря моӷут тэ вилэн анда рат варисаво компоненто, кай тэ личин лэса кодэлэ жэ манушэс. Исин кацави процэдура, сар маркировка, аврэ алавэнца, лэн набут рат лэ манушэско, дошон кордэ и драба, и потом рин андо орӷанизмо.

И врачоря моӷут тэ назначат ек анда кацавэ процэдуры. Инке через и время авэна нэвэ методоря личения, ай кадяжэ лэна тэ терэн нэвэ обследовании. Амэ, лэ Иеговастирэ свидетеля, на старысавас тэ роздиқас кажно андар лэндэ и тэ виандярас варисави ришэния важ и всаворэ. О христианино екжэно трэбуй тэ ришый, со во домэкэла, ай со най тэ терэн лэстирэ ратэса, кала лэла тэ жал и операцыя, лэна тэ лэн о анализо чи лэна тэ терэн авэр варисави личения. Лэсти трэбуй май англал тэ розуӷанэн кай и врачоря или кай авэр спецыалисторя, савэ терэн андэ больница, со вонэ камэн тэ терэн лэстирэ ратэса. Во трэбуй екжэно тэ прилэл ришэния кадя, кай лэстири совесть тэ авэл вужи. (Дик и рамка.)

Лэ христианонэнди трэбуй тэ сэрэн пала кода, кай вонэ посвятили пэстири жызня лэ Дэвлэсти и динэ алав, кай лэна тэ терэн и законо, тэ любин пэстирэ Дэвлэс лэ Иеговас всаворэ́ одеса, всаворя́ жызняса, всаворэ́ зорэса и всаворя́ годяса (Луки 10:27). Лэ Иеговастирэ свидетеля фартэ цэнин и дружба лэ Дэвлэса. О Иегова дя амэнди и жызня и во ԥэнэн амэнди всаворэнди тэ патяс андэ лэ Иисусоско рат, саво питяя важ амэндэ. Андэ Библия ԥэнэнпэ: «Пэстирэ ратэса во (о Иисус Христос) витиндя амэн, кай тэ простинпэ амарэ бэзэха (Эфесянам 1:7).

[Сноски]

[Рамка/Картинки]

ПУШ ПЭСТАР, КАЙ ТЭ ПОЛЭС

Если манди стерэна кацави процэдура, кай через о апарато одындярэна мэрно рат андэ риг и во котэ ашэлапэ пэ дэсави время, домэкэла мэрни совесть, кай мэ тэ диқав пэ кодэва рат, сар пэ часть мэрня тилако и тэ гиндосарав, кай лэс на «трэбуй тэ вишон пэ ԥув»?

Авэла мэрни совесть вужи, сави сытярди па Библия, если манди терэна обследования или варисави личения, и мандэ лэна о рат, дошона или вилэна андар лэстэ дэсо и потом шона лэс манди андо орӷанизмо?