Анда Библия тути кажно разо трэбуй имено о законо?

КАЛА амэ самас бэяцэ, амарэ дад и дэй часто ԥэнэнас амэнди, со трэбуй тэ терас, ай со нащи. Ай кала амэ подбарелям, амэ полям, кай и родителя камэнас важ амэндэ, со май фэдэр. И акана, кала амэ екжэнэ хулая пэр пэстэ, амэ всаек терас дэсо, со приԥэнэнас амэнди дад и дэй.

Амаро небесно Дад Иегова, андэ пэско Алав и Библия, стодя важ амэндэ дэсавэ законоря. Во на домэкэл, кай о мануш тэ тэлёл лэ хохавнэ дэвлэнди, кай тэ терэл о билажавардимос, кай тэ измений андо брако, ай кадяжэ тэ чорэл (Исход 20:1—17; Деяния 15:28, 29). Кала амэ май драго уӷанас лэ Дэвлэс, амэ полас, кай о Иегова заботийпэ, кай амэндэ тэ авэл кати о лашымос, и кай лэстирэ законоря на залэн амэндар и свобода (Эфесянам 4:15; Исаия 48:17, 18; 54:13).

Но андэ Библия най пала кажно дила ԥэнэнпэ, драго када чи най или конкретно законо. Важ када дэсавэ гиндон, кай если нинай о законо, тоди о мануш можэт тэ терэл кода, со камэл. Вонэ ԥэнэн, кай авелоп када важно важ о Дэл, тоди во стодоп пала када о законо.

Кодэла, ко кадя гиндон, часто прилэн найгодявэрнэ ришэнии. Но кала прожал и время, вонэ гиндон, кай кадя вонэ ужэ никала на стердоп. Кацавэ мануша трэбуй тэ полэн, кай андэ Библия исин най кати лэ Дэвлэстирэ законоря, но и кода, сар гиндой о Дэл. Кала амэ сытювас па Библия, и уӷанас, сар о Дэл диқэл пэ дэсавэ вопросоря, амэ сытярас пэстири совесть и амэ сытювас тэ прилас кацавэ ришэнии, савэ прилиноп о Иегова. Кала амэ ласа кадя тэ терас, кадэлэса амэ радосараса лэ Иеговас, и амэндэ андэ жызня авэла бут лашымос кодэлэстар, савэ ришэнии амэ прилас (Эфесянам 5:1).

Лэ Дэвлэстирэ служытеля анда Библия

Кала адиносарас анда Библия пала лэ Дэвлэстирэ мануша, савэ жувэнас фартэ дэлмут, дицол, кай вонэ шонас сама пэ кода, сар гиндой о Иегова, хоть пала кода, со сас лэндэ, инке на сас нисаво законо. Подаса дума пала Иосифо. Андэ кодэя время, кала лэ Патифаростири хулаи ԥэнэнас лэсти, тэ авэл ласа, инке на сас о законо лэ Дэвлэстар, кай када нащи о мануш тэ терэл. Хоть и на сас о законо пала билажавардимос, о Иосифо полэлас, кай если во стерэла када, лэс най кати хала лэстири совесть, но и во «стерэла бэзэх англа Дэл» (Бытие 39:9). Дицол, кай о Иосифо ӷанэнас и полэлас, со пала када гиндой о Иегова через кода, со о Иегова ԥэндя андо Эдэмско садо (Бытие 2:24).

Уӷанаса, со сас кай о Павло. Андэ Деяния 16:3 ԥэнэнпэ, кай о Павло жы каринг кода, сар тэ лэл пэса лэ Тимофеёс андэ мисионерско путишэствия, стердя лэсти обрезания (опшындя лэс). Но андо 4 стихо амэ адиносарас, кай посли када о Павло и о Тимофеё, прожанас па фороря и пэрэдэнас ришэнии, савэ прилинэ и апосталоря и барэдэр ԥрала андо Иерусалимо. И машкар кадэла ришэнии сас ришэния, кай и христианоря на трэбуй будэр тэ терэн обрезания! (Деяния 15:5, 6, 28, 29). Васо жэ тоди о Павло тердя лэ Тимофеёсти обрезания (опшындя лэс)? Важ кода кай всаворэ евреёря, савэ жувэнас пэ кодэла краёря, ӷанэнас, кай «лэ Тимофеёско дад сас ӷреко». О Павло на камэлас варикас тэ холярэл и кай через о Тимофеё варико тэ на закамэл тэ ашунэл пала Дэл. Во камэлас, кай о христианино андэ лэ Дэвлэстирэ яқа тэ ашэл «лашэ манушэса важ кажно манушэско ди» (2 Коринфянам 4:2; 1 Коринфянам 9:19—23).

Кадя гиндонас о Павло и о Тимофеё. Проадиносар Римлянам 14:15, 20, 21, 1 Коринфянам 8:9—13 и 1 Коринфянам 10:23—33 и тоди ту диқэса, пэ скати дэ фартэ о Павло заботияспэ, кай и мануша драго тэ полэн лэ Дэвлэс. Во камэлас, кай и мануша тэ на змардёнпэ через кода, со во терэлас, хоть када и сас можно тэ терэл и на сас бэзэх. Ай пала Тимофеё, о Павло пистросардя: «Мандэ авэр нико нинай, савэстэ авелоп кацаво жэ настроё, кай анда оди тэ позаботийпэ пала тумэндэ. Всаворэ авэр гиндон кати пала пэстэ, ай най пала кода, со камэл о Иисус Христос. Но тумэ ӷанэн саво во: сар шаво лэ дадэса, во ашля манца, сар рабо, кай тэ росԥэнэн бутэнди лащи весть» (Филиппийцам 2:20—22). Амэ можэм тэ сытювас кодэлэстар, сар дэ драго андярэнас пэс кадэла дуй христианоря. Кала на сас конкретно лэ Иеговаско законо, вонэ на витидэнас кода, со лэнди сас май удобно, ай гиндонас, сар посли кода, со вонэ витидэна, терэна или андярэна пэс авэр. Кай кадя тэ терэн, вонэ сытёнас кай о Иегова и кай лэско Шаво.

Сгиндосарам пала Иисус Христос. Када со май фэдэр, кастар можно тэ сытювас. Андэ пэстири ашунгли дума по плай, во ворта сыкадя, кай кодэва, ко поля лэ Дэвлэстирэ принцыпоря, лэла тэ терэл дажэ май бут, чем пистромэ андэ лэ Дэвлэско законо (Матфея 5:21, 22, 27, 28). Ни о Иисусо, ни о Павло, ни о Тимофеё, ай кадяжэ о Иосифо, на гиндонас: если варисо най пистромэ андэ лэ Дэвлэско законо ворта, тоди о мануш можэт тэ терэл кода, со лэсти камэлпэ. Кадэла мануша полэнас, сар гиндой о Дэл, и жувэнас кадя, сар ԥэндя о Иисусо пала законо, саво со май важно: тэ любин пэстирэ Дэвлэс лэ Иеговас, и тэ любин лэ манушэн (Матфея 22:36—40).

Христианоря андэ амари время

Амэ диқас, кай и Библия най варисаво юридическо лил, андэ саво роспистромэ, со амэ трэбуй тэ терас. Кай о Иегова май бари радость, кала амэ полас сар во гиндой, и терас кадя, дажэ если нинай законо, сар тэ терас. Аврэ алавэнца, на трэбуй тэ аштярас конкретно законо, фэдэр тэ полас, со пала кадэя дила гиндой о Иегова (Эфесянам 5:17; Римлянам 12:2). Васо када радуий лэ Иеговас? Кадэлэса амэ сыкавас, кай важ амэндэ май важно тэ уӷодисарас лэсти, чем тэ тердювас по пэско. Инке кадэлэса амэ сыкавас, кай цэнисарас лэстири любовь и камас тэ терас кадяжэ. И камас, кай кацави любовь тэ авэл само важно андэ амари жызня (Притчи 23:15; 27:11). Инке, кала амэ старысавас тэ терас май бут кодэлэстар, со пистромэ андо законо, амэндэ ашэл май лашо зор, и амэ ашас май пашэ каринг о Иегова.

Давайти диқаса, сар кадэва гиндо можно тэ прилас каринг пэстэ андэ амари жызня.

Тэ витидас развличении

Ԥэнаса, ек тэрно мануш камэл тэ тинэн о диско, кай тэ ашунэл и диля. Но во загиндосайля пала кода, со исин пэ картинка пэ обложка. Ай котэ пистромэ, кай дэсавэ диля пала абисо и найшукарнэ. Ай инке кадэва тэрно мануш ӷанэн, кай бут диля пала кода, кай и мануша тэ авэн холинатирэ и тэ цырдэнпэ тэ марэнпэ. Кадэва тэрно мануш любий лэ Иеговас и камэл тэ уӷанэн, со пала када гиндой о Иегова. Сар лэсти када тэ полэл?

Андо письмо галатам о Павло пистросардя, со када и дила, сави терэл и ӷрешно тила, и пистросардя, со када лэ свынтонэ духоско плодо. Амэ ӷанас, кай лэ свытонэ духоско плодо – када «любовь, радость, ладо, терпения, доброта, лашымос, вера, кротость, самообладания». Ай со ужал андэ дила, сави терэл и ӷрешно тила? О Павло пистросардя: «И дила, сави терэл и ӷрешно тила, драго дицол. Када билажавардимос, найвужимос, и кала андярэн пэс билажавардэс. Кадяжэ, кала тэлён хохавнэ дэвлэнди, бэнгалимос, кала вороӷуин, споринпэ, ревнуин, холявэн, на ладин, сытярэн най кадя, сар о Дэл, завидуин, матён, допэнпэ, кай андярэн пэс найманушыканэс и инке варисо кацаво. Мэ ужэ ԥэндэмас тумэнди тэ фэринпэ кацавэстар и инке еқвар ԥэнав, ко терэл кадя, на авэна андэ лэ Дэвлэско Царство» (Галатам 5:19—23).

О Павло на ԥэндя вся, со ужал андэ дила, сави терэл и ӷрешно тила. Во ԥэндя, кай исин инке (авэр найлашымос) «варисо кацаво». Мануш, саво адинояс лэ Павлоско письмо, нэ моӷ тэ ԥэнэн: «Мандэ исин право тэ терав кода, пала со о Павло на пистросардя конкретно». Най, кодэла, ко адинонас, трэбуй сас тэ розполэн, кай када найлащи дила, хоть пала када и на сас пистромэ. Кодэла, ко на каинпэ и терэн кацави дила, «на авэна андэ лэ Дэвлэско Царство».

Кадяжэ и амэнди трэбуй тэ уӷанас и тэ полас, со чалёл лэ Иеговасти. Ԥарэс када? Если о врачо ԥэндя, кай амэнди трэбуй май бут тэ хас фрукты и овощи, и тэ на хас бут пирожыны и морожыны и инке варисаво гуглимос, ԥарэс амэнди авэла тэ полас можно амэнди тэ хас о торто? Ай акана давайте вспомним, со ужал андэ лэ свынтонэ духоско плодо, и со ужал андэ дила, сави терэл и ӷрешно тила. Ай акана сгиндосараса, со ԥэнэнаспэ пала диля, савэ по диско, пала савэ амэ май англал дасас дума. Пала со кадэла диля? Андэр лэндэ нинай любовь, доброта, лашымос, самообладания и авэр лашэ качестворя, савэ исин андэ лэ свынтонэ духоско плодо. Вижал, амэнди на трэбуй конкретно законо, кай тэ полас, кай кацавэ диля на чалён лэ Иеговасти. Кадэла жэ гиндоря поджан, кала амэ витидас кода, со тэ адиносарас, савэ киноря или програмы тэ диқас, андэ савэ компьютэрни иӷры тэ цэлас, пэ савэ сайты тэ зажас, и савэ авэр развличении амэндэ моӷут тэ авэн.

Драго тэ утидаспэ

Андэ Библия исин гиндоря, савэ сыкавэн, сар о мануш трэбуй тэ утидэлпэ. Через кадэла гиндоря кажно христианино можэт тэ полэл, сар тэ утидэлпэ сэжо и шукарнэс. Кодэва, ко любий лэ Иеговас, через кадэла гиндоря додиқэла най кода, со лэсти камэлпэ, ай кода, со лэла тэ радуий лэ небеснонэ Дадэс. Сар амэ ужэ полям, кала о Иегова на стол конкретно законо, када на сыкавэл, кай лэсти всаек, сар лэна тэ андярэн пэс лэстирэ служытеля. Сар и мануша утидэнпэ зависит кодэлэстар, кай вонэ жувэн. Но дажэ андэ ек ҭан, кала прожал и время, и ӥда можэт тэ парудёл. Но андэ Библия о Дэл дэл гиндоря, через савэ лэстирэ служытеля полэн, сар лэнди тэ утидэнпэ вся и время и везде.

Андэ 1 Тимофею 2:9, 10 ԥэнэнпэ: «Кадяжэ мэ камав, кай и жувля тэ утидэнпэ сэжо, и кай када тэ авэл скромно и годяса. Мэк вурявэн пэс най заплетимэ балэнца, сомнакаса, жэмчуӷоса или фартэ кучутня ӥдаса, ай лащя диласа, сар и трэбуй тэ терэн и жувля, савэ предани лэ Дэвлэсти». И христианоря, жувля када чи мурша, трэбуй драго тэ погиндон, сар трэбуй тэ утидэнпэ котэ, кай вонэ жувэн, кай пэр лэндэ тэ ԥэнэн, кай вонэ стон патив по Дэл. О христианино трэбуй тэ сэрэл, кай и мануша моӷут тэ парашэн тэ ашунэн пала Дэл через кода, сар во утидэлпэ (2 Коринфянам 6:3). Лашо христианино на лэла тэ тердёл по пэско андэ ӥда, ай лэла тэ гиндой пала кода, кай тэ на змарэл лэ манушэн па лэ Дэвлэско дром (Матфея 18:6; Филиппийцам 1:10).

Если о христианино додиқэл, кай через кода, сар во утидэлпэ, аврэнди найдраго по ди и во змарэл лэн па лэ Дэвлэско дром, во можэт тэ сытёл кай о апостало Павло. О Павло пистросардя: «Жувэн па мэрно примеро, сар и мэ жував па лэ Христоско примеро» (1 Коринфянам 11:1). Ай пала Иисусо о Павло пистросардя: «О Христос най пэсти уӷодияс». Вижал, лэ христианонэндар аштярэн, кай вонэ тэ жувэн кадяжэ. Андэ Библия пистромэ: «Амэ жэ кодэла, кастэ састи вера, трэбуй тэ поможысарас кодэлэнди, кастэ вой май слабо и тэ уӷодисарас най кати пэсти, но и аврэнди. Кажно андар мэндэ мэк уӷодий аврэсти андэ лашымастэ, кай тэ авэл лэстэ зор» (Римлянам 15:1—3).

Сытювас тэ уӷодисарас лэ Иеговасти

Сар амэнди тэ сытювас кодэлэсти, кай тэ уӷодисарас лэ Иеговасти котэ, кай дажэ нинай о законо? Амэ ласа када тэ полас май драго и май драго, кала кажно дес адиносараса и Библия, ласа тэ сытювас пар латэ и тэ гиндосарас пала кода, со адиносардям. Но ӥто када на вижала. Кадя, сар о бэято барёл най ӥто кода, кай амэ драго тэ полас, сар гиндой о Иегова, авэла най сразу и най ӥто дицола. Важ када, трэбуй тэ аштярас и тэ на умэкас и вас, кала амэ диқас, кай амэндэ на вижал када ӥто. Но и корко пэстар када на вижала. И сар сас пистромэ пала када май данглал, амэ трэбуй тэ на хасарас и время, ай тэ сытювас па Библия, и анда вся зор тэ старысавас тэ жувас кадя, сар амэ адиносарас (Евреям 5:14).

Можно тэ ԥэнас, кай через лэ Дэвлэстирэ законоря дицол, сар амэ кандас лэс. Ай кода, сар амэ полас, со гиндой о Иегова, сыкавэл, пэ скати амэ любисарас лэс и кай анда оди амэ камас тэ уӷодисарас амарэ небеснонэ Дадэсти. Ай кадяжэ амэ закамаса май бут тэ сытювас лэ Иеговастар и лэстирэ Шавэстар. Кала амэ варисо ласа тэ витидас, амэ старысаваса тэ уӷодисарас лэ Иеговасти. Ай кала амэ радосарас амарэ небеснонэ Дадэс андэ вся пэстири дила, амэ екжэнэ ласа тэ радосавас.

[Картинки]

Хоть андэ разни страны и мануша утидэнпэ по разному, амэнди трэбуй тэ полас, со гиндой о Иегова пала кода, сар амэ утидаспэ котэ, кай амэ жувас.